Brahmastra चा विजय तर बॉयकॉट करणाऱ्यांची हार! या पाच कारणांमुळे बॉक्स ऑफिसवर धमाका

Ranbir Kapoor and Alia Bhatt Brahmastra: रणबीर कपूर आणि आलिया भट्ट या खऱ्या आयुष्यातील पहिला-वहिला सिनेमा ‘ब्रह्मास्त्र’ बॉयकॉटच्या ट्रेंडमध्येही यशस्वी ठरला आहे. या सिनेमावर बहिष्कार टाकला जावा अशी मागणी जोर धरत होती. नेपोटिझम विषयावरुन करण जोहरवर होणारी टीका, रणबीरचा बीफ संदर्भातील व्हिडिओ आणि याशिवाय विविध कारणांमुळे सिनेमावर बॉयकॉटचे सावट वाढतच होते. ‘बीफ आवडतं’ हा रणबीरचा व्हिडिओ तर सिनेमा आपटण्याचं मुख्य कारण ठरेल असंही बोललं जात होतं. कारण हा व्हिडिओ व्हायरल झाल्यानंतर रणबीर-आलियाला उज्जैनच्या महाकालेश्वर मंदिरात प्रवेश नाकारण्यात आला होता. हिंदू संघटनांनी त्याला प्रवेश करण्यास विरोध केल्याने, केवळ अयाननेच मंदिरात दर्शन घेतले होते.

काय आहेत ब्रह्मास्त्र हिट होण्याची कारणं?

दरम्यान भावना दुखावल्याचा आरोप, नेपोटिझम, बॉयकॉट ट्रेंड या समस्यांचा सामना करतानाच ०९ सप्टेंबर रोजी हा सिनेमा प्रदर्शित झाला. ‘ब्रह्मास्त्र’ प्रदर्शित झाल्यादिवसापासूनच सिनेमाने धमाका केला आहे. त्यामुळे सिनेमा बॉयकॉट करणाऱ्यांना मोठा धक्काच बसला आहे. ‘ब्रह्मास्त्र’च्या बुडत्या नावेला कुणी वाचवलं, याची कारणं फार रंजक आहेत. पहिल्या दिवसापासून ‘ब्रह्मास्त्र’ बॉक्स ऑफिसवर चांगली कमाई करत आहे. अयान मुखर्जीच्या या सिनेमाने पहिल्याच वीकेंडमध्ये वर्ल्डवाइड २२५ कोटी रुपये कमावत अनेकांना आश्चर्यचकित केले. जाणून घ्या काय आहेत या यशाची कारणं…

​दाक्षिणात्य स्टार्सची झाली मदत

सध्या देशभरातच दाक्षिणात्य चित्रपटांची क्रेझ वाढली आहे. बॉलिवूडकरही साऊथ सिनेमात काम करताना दिसतात. ‘ब्रह्मास्त्र’च्या मेकर्सनाही दाक्षिणात्य स्टार्सची मदत झाली. अलीकडेच प्रमोशनदरम्यान दाक्षिणात्य कलाकार ब्रह्मास्त्रच्या टीमबरोबर दिसले होते. ब्रह्मास्त्रच्या प्रमोशन कार्यक्रमात एस एस राजामौली आणि ज्युनिअर एनटीआर आले होते. सुपरस्टार नागार्जुन तर या सिनेमाचा एक महत्त्वाचा भाग आहे. याशिवाय एक व्हिडिओ असा समोर आला होता, ज्यात रणबीर कपूर राजामौली आणि नागार्जुन यांच्या पाया पडताना दिसला. याशिवाय एका प्रमोशनल इव्हेंटमध्ये आलिया भट्टने ‘केसरिया’ गाणं तामिळ भाषेत गायलं. या सर्वांचा परिणाम भावनिकरित्या झाला असल्याचे पाहायला मिळते आहे. दक्षिणेतही ब्रह्मास्त्रने चांगली कमाई केली.

​सिनेमातील व्हिएफएक्सची कमाल

अयान मुखर्जीच्या सिनेमाची तुलना एस एस राजामौली यांच्या ‘बाहुबली’शी केली जात आहे. चाहते या सिनेमातील व्हीएफएक्सचं कौतुक करताना थकत नाही आहेत. व्हीएफएक्सशिवाय सिनेमात वापरण्यात आलेल्या इतर तंत्रज्ञानाचं कौतुक केलं जातंय. यामुळे सिनेमाचं बजेटही कोट्यवधींच्या घरात आहे. बॉलिवूडमध्ये अशाप्रकारचं व्हीएफएक्स फार कमी सिनेमात पाहायला मिळालं आहे. काहीजणांनी तर यातील व्हीएफएक्सची तुलना हॉलिवूडशीही केली आहे. या सिनेमाचे कथानक धमाकेदार नसल्याचे जरी बोलले जात असले तरी, यातील तंत्रज्ञान-व्हीएफएक्समुळे सिनेमा बॉक्स ऑफिसवर कमाल करण्यात यशस्वी ठरला

​3D मध्ये प्रदर्शित झाला सिनेमा

दीर्घकाळापासून आपण अनेकदा हॉलिवूड चित्रपट पाहण्‍यासाठी ३ डी चष्मा घातला आहे. बॉलिवूडचे फार कमी चित्रपट ३ डी मध्ये पाहिले गेले. मात्र ‘ब्रह्मास्त्र’ने ही संधी आहे आणि त्यामुळेही हा चित्रपट खूप खास आहे. ३ डीचा अनुभव घेण्यासाठीही थिएटरमध्ये गर्दी झाली. हा चित्रपट २डी, ३डी आणि IMAX ३ डी अशा तीन वेगवेगळ्या फॉरमॅटमध्ये प्रदर्शित झाला आहे. अशा परिस्थितीत चाहते या बॉलिवूड चित्रपटाचा अनुभव घेण्यासाठी उत्सुक आहेत.

​हॉलिवूडच्या ‘अ‍ॅव्हेंजर्स’प्रमाणेच मांंडली अस्त्रांची कथा

समीक्षकांडून आलेल्या प्रतिक्रियांनुसार या सिनेमाचे कथानक काहीसे कमकुवत आहे, मात्र यातील पार्श्वभूमी बहुतेकांसाठी भावनिक ठरू शकते. चित्रपटाची ही कथा ऋषीमुनींना वरदान म्हणून मिळालेल्या शस्त्रांची देवता ब्रह्मास्त्राची आहे. ज्यांच्या संरक्षणाची जबाबदारी त्याच्या संरक्षकांची म्हणजेच ब्रह्मांशांची असते. ज्याप्रमाणे अ‍ॅव्हेंजर्स इन्फिनिटी स्टोन्सचे संरक्षण करण्यासाठी सर्वतोपरी प्रयत्न करतात, अशीच काहीशी ही कथा आहे. या सिनेमात नागार्जुन हा नंदी अस्त्राचा रक्षक दाखवण्यात आला आहे, शाहरुख खान वानरास्त्राचा तर अमिताभ बच्चन हे हे ब्रह्मांशमधील लोकांना प्रशिक्षण देणारे गुरू दाखवले आहे. रणबीर कपूर स्वत:च एक अग्नि अस्त्र आहे.

​रणबीर-आलियाचा पहिलाच सिनेमा

आलिया-रणबीर हे खऱ्या आयुष्यातील जोडपे पहिल्यांदाच एकत्र सिनेमा करत आहेत. रणबीर-आलियाच्या प्रेमकहाणीही या सिनेमाच्या सेटवर सुरू झाली होती. त्यांनी लग्न केल्यानंतर काहीच महिन्यात बाळ होणार असल्याचीही घोषणा केली. त्यामुळे या रिअल लाइफ कपलला एकत्र पाहण्यासाठी आलिया आणि रणबीर यांचे चाहते फार उत्सुक होते. त्यांची ऑनस्क्रिन केमिस्ट्री पाहण्यासाठी चाहत्यांनी ‘ब्रह्मास्त्र’ला पसंती दिली. या सिनेमातील लव्ह स्टोरीज जरी चाहत्यांना आकर्षित करण्यास विशेष यशस्वी ठरले नसले तरी त्यांना एकत्र पाहून चाहते खूश आहेत. ईशा आणि शिवाच्या आयुष्यात पुढे काय होतं, हे चाहत्यांना जाणून घ्यायचे आहे