Boycott Thank God Movie: कोण आहे देव चित्रगुप्त, ज्यांच्या अपमानामुळे ‘थँक गॉड’ होतोय बॉयकॉट

अजय देवगण, सिद्धार्थ मल्होत्रा, रकुल प्रीत सिंग स्टारर ‘थँक गॉड’ २५ ऑक्टोबरला चित्रपटगृहात प्रदर्शित होणार आहे. इंद्र कुमार यांच्या दिग्दर्शनाखाली बनलेल्या या चित्रपटाचा ट्रेलर ज्या दिवशी प्रदर्शित झाला, त्याच दिवसापासून चित्रपटाच्या विरोधात आंदोलनही सुरू झाली. ट्विटरवर #Boycott_ThankGodMovie हॅशटॅग ट्रेंड होऊ लागला. चित्रपटात भगवान चित्रगुप्त यांचा अपमान केल्याचा आरोप नेटकऱ्यांनी केला आहे. बॉलिवूड चित्रपटांमध्ये हिंदू देव-देवतांचा अपमान करून लोकांच्या धार्मिक भावना किती काळ दुखावल्या जाणार आहेत, असा प्रश्न ट्विटरवर सातत्याने विचारला जात आहे. तुम्हाला माहिती आहे का की चित्रगुप्ताला विश्वाचा पहिला लेखपाल म्हटले जाते. तो ब्रह्मदेवाचा १७ वा मुलगा आहे आणि त्याला कायस्थ वंशाचा प्रमुख देव मानला जातो. हे संपूर्ण प्रकरण काय आहे ते आज जाणून घेऊ.

अजय देवगणवर भडकले लोक

आधी थँक गॉडच्या सिनेमाबद्दल जाणून घेऊ. सिनेमाचा ट्रेलर जेव्हा प्रदर्शित झाला त्यानंतर या विरोधाला सुरुवात झाली. ३ मिनिट आणि ६ सेकंदाच्या या व्हिडिओमध्ये सिद्धार्थ मल्होत्राचा कार अपघातात मृत्यू होतो आणि जेव्हा तो डोळे उघडतो तेव्हा त्याच्या समोर यमराज आणि चित्रगुप्त असल्याचे दाखवण्यात आले आहे. फक्त इथे चित्रगुप्त म्हणजेच अजय देवगणच्या आजूबाजूला अनेक मुली आहेत, ज्यांनी तोकडे कपडे घातले आहेत. हे पाहून नेटकरी भडकले. हिंदूंचे देव नेहमी खोडकरच असतात का असा प्रश्न त्यांनी विचारला.

देव चित्रगुप्त कोण आहे?

चित्रगुप्त एक हिंदू देवता आहे. वेद आणि पुराणानुसार, धर्मराजा/यमराजाच्या दरबारात, चित्रगुप्ताचे वर्णन लेखपाल किंवा लेखापाल म्हणून केले गेले आहे, जो मनुष्यांच्या पापांचा आणि पुण्यांचा हिशेब ठेवतो. आधुनिक विज्ञानाने हे सिद्ध केले आहे की आपल्या मनात येणारे सर्व विचार चित्रांच्या रूपात असतात. या सर्व विचारांची चित्रे चित्रगुप्त गुप्तपणे ठेवतो. सरतेशेवटी, सर्व चित्रे आणि चित्रगुप्ताने दिलेल्या माहितीनुसार यमराज एखाद्या व्यक्तीचे मृत्यूनंतरचे जीवन आणि पुनर्जन्म ठरवतात.

चित्रगुप्त हा विश्वाचा पहिला लेखपाल

विज्ञानाने हेही सिद्ध केले आहे की मृत्यूनंतर सजीवाचा मेंदू काही काळ काम करतो आणि या काळात जीवनात घडलेल्या प्रत्येक घटनेची छायाचित्रे मेंदूत धावत राहतात. हे आपल्या वेदांमध्ये हजारो वर्षांपूर्वी लिहिलेले आहे. ज्याप्रमाणे शनिदेव हे विश्वाचे पहिले दंडाधिकारी आहेत, त्याचप्रमाणे चित्रगुप्त हे विश्वाचे पहिले लेखपाल आहेत. मनुष्याच्या मृत्यूनंतर यमराजाकडे पृथ्वीवर केलेल्या कार्याच्या आधारे मनुष्यासाठी स्वर्ग किंवा नरक ठरवण्याचा अधिकार आहे.

कायस्थ कुळातील इष्ट देवता

चित्रगुप्त हा भारतातील कायस्थ वंशाचे प्रमुख देवता आहे. हिंदू मान्यतेनुसार, चित्रगुप्त हा ब्रह्मदेवाचा १७ वा पुत्र आहे. भगवान चित्रगुप्ताविषयी स्वामी विवेकानंद म्हणतात की मी भगवान चित्रगुप्ताचा मुलगा आहे, ज्याची पूजा केल्याशिवाय ब्राह्मण मुक्त होऊ शकत नाहीत. ब्राह्मण हा ऋषींचा पुत्र आणि कायस्थ हा देवाचा पुत्र. त्याच वेळी, ग्रंथांमध्ये चित्रगुप्ताला महाशक्तिशाली राजा म्हणून संबोधण्यात आले आहे. वैदिक ग्रंथात चित्रा नावाच्या राजाचा उल्लेख आहे, जो चित्रगुप्ताशी संबंधित असल्याचे मानले जाते.