ब्लॉकबस्टर ठरणार हृतिक-सैफचा विक्रम वेधा? प्रदर्शनाआधीच होतोय चाहत्यांकडून कौतुकाचा वर्षाव

मुंबई : गेल्या अनेक दिवसांपासून विक्रम वेधा (Vikram Vedha Trailer Release) सिनेमाची खूप चर्चा आहे. या सिनेमाचा ट्रेलर प्रदर्शित झाला असून तो पाहून सिनेमा पाहण्याची उत्सुकता अधिकच शिगेला पोहोचली आहे. विक्रम वेधाचा ट्रेलरमध्ये मनोरंजनाचा मसाला ठासून भरला आहे. सैफ अली खान आणि हृतिक रोशन यांची ॲक्शन पाहून त्यांचे चाहते भारावून गेले आहेत. या सिनेमामध्ये ॲक्शनच्या बरोबरीनं ड्रामा आणि सस्पेन्स आहे. त्यामुळे प्रेक्षकांना बऱ्याच दिवसांनी एक चांगला सिनेमा बघायला मिळणार हे नक्की.

काय आहे ट्रेलरमध्ये

तमिळ सिनेमा विक्रम वेध सुपरहिट ठरला होता. त्याच्या हिंदी रिमेकच्या ट्रेलरला लोकांनी भरभरून प्रतिसाद दिला आहे. त्यामुळे हा सिनेमा प्रेक्षकांना आवडेल आणि तो बॉक्स ऑफिसवरही चांगली कमाई करेल असं सांगितलं जात आहे. ट्रेलरला सोशल मीडियावर देखील उत्स्फूर्त प्रतिसाद मिळत आहे.

हे वाचा-गोव्यातील ज्याठिकाणी सोनाली फोगट यांना दिलं ड्रग्ज, त्या रेस्टॉरंटवर फिरणार बुलडोझर!

टॉप लेव्हलची ॲक्शन, जबरदस्त डायलॉग्ज, थ्रिलरचा संपूर्ण मसाला या सिनेमात आहे. हा ट्रेलर पाहून प्रेक्षकांच्या अंगावर शहारा आल्याशिवाय रहात नाही. सैफ आणि हृतिक यांचा जबरदस्त अंदाज पाहून चाहते भारावून गेले आहेत. या ट्रेलरमध्ये दोघांचाही लूक जबरदस्त आहे. हृतिकला खलनायकाच्या रुपात पाहण्यासाठी त्याचे चाहते उत्सुक आहेत. एकूणच हा ट्रेलर पाहता सिनेमा नक्की बघणार अशा प्रतिक्रिया अनेकांनी कमेंटमध्ये व्यक्त केल्या आहेत.

असं आहे कथानक

विक्रम वेधा सिनेमात अनेक ट्विस्ट आहेत. एक कर्तव्यदक्ष पोलीस अधिकारी (सैफ अली खान) एक खतरनाक गँगस्टर वेधा (हृतिक रोशन) याचा माग काढून त्याला पकडण्यासाठी प्रयत्न करत आहे. परंतु या दोघांमध्ये उंदीर मांजराप्रमाणं लपाछपी सुरू असते. शेवटी कोणाची सरशी होते हे सिनेमा पाहिल्यावर कळेल.

ब्लॉकबस्टर होणार का विक्रम वेधा?

सिनेमाचा ट्रेलर पाहून अनेक प्रेक्षकांनी कमेंट सेक्शनमध्ये हा सिनेमा २०२२ मधला ब्लॉकबस्टर सिनेमा ठरेल असं म्हटलं आहे. हृतिकच युपी स्टाईलचं बोलणं, हाणामारी, डायलॉग्ज एकून प्रेक्षक फिदा झाले आहेत. हृतिकनं त्याच्या भूमिकेला योग्य न्याय दिलेला दिसत आहे. त्याचप्रमाणं या सिनेमात सैफचा एक वेगळाच अंदाज बघायला मिळाला आहे. त्या हा अंदाज नक्कीच कौतुकास्पद आहे. त्याच्या एकूण शरीरयष्टीमध्ये जे काही बदल त्यानं घडवून आणले आहेत ते जबरदस्त आहेत. त्याच्या या डॅशिंग लुकचंही नेटकरी भरभरून कौतुक करत आहेत. हृतिक आणि सैफ ही जोडी अनेकांना आवडली आहे.

हे वाचा-राणी एलिझाबेथने दिलेल्या निमंत्रणाला बिग बींनी दिलेला नकार

सैफ आणि हृतिकच्या अभिनयाची जुगलबंदी

विक्रम वेधामध्ये सैफ अली खान आणि हृतिक रोशन यांच्या अभिनयाची तुफान जुगलबंदी बघायला मिळणार आहे. सैफचा रवाडी लुक कमाल आहे. पोलीस अधिकाऱ्याच्या भूमिकेत तो कमाल दिसतो आहे. सैफच्या चाहत्यांना हा सिनेमा म्हणजे मेजवानी आहे. विक्रम वेधा सिनेमातून हृतिक रोशन तीन वर्षानंतर मोठ्या पडद्यावर दिसणार आहे. मूळ विक्रम वेधा सिनेमाचं दिग्दर्शनही पुष्कर-गायत्रीनं केलं होतं, त्यांनीच हिंदी रिमेकचंही दिग्दर्शन केलं आहे. तमिळ सिनेमात आर माधवन आणि विजय सेतुपथी यांनी भूमिका केल्या होत्या. सिनेमाच्या हिंदी रिमेकमध्ये राधिका आपटेही महत्त्वाच्या भूमिकेत आहे.

विक्रम वेधा सिनेमा येत्या ३० सप्टेंबर रोजी रिलीज होणार आहे. सिनेमात राधिका आपटे, रोहित सराफ, शारिब हाश्मी, योगिता बिहानी यांच्याही प्रमुख भूमिका आहेत.