गोव्यातील ज्याठिकाणी सोनाली फोगट यांना दिलं ड्रग्ज, त्या रेस्टॉरंटवर फिरणार बुलडोझर!

पणजी : भारतीय जनता पक्षाच्या नेत्या सोनाली फोगट यांच्या हत्या प्रकरणात (Sonali Phogat Murder Case) गोवा सरकारनं एक मोठा निर्णय जाहीर केला आहे. गोवा सरकारनं काही दिवसांपूर्वीच त्यांना ज्याठिकाणी ड्रग दिलं होतं ते रेस्टॉरंट सील केलं होतं. आता लवकरच त्यावर बुलडोझर फिरवून ते जमीनदोस्त केले जाणार आहे. कर्लीज हॉटेलमध्ये सोनाली यांची हत्या झाल्याचे वृत्त समोर आले आणि हे हॉटेल वाऱ्याच्या वेगाने प्रसिद्ध झाले होते.

सोनाली फोगट मृत्यूसंबंधित सर्वच बातम्यांमध्ये या हॉटेलचा उल्लेख पाहायला मिळाला. याठिकाणी सोनाली यांचा पीए सुधीर सांगवान यानं त्यांना ड्रग्जचा ओव्हर डोस देऊन त्यांची हत्या केली. त्यानंतर कर्लीज रेस्टोरंट चर्चेत आलं.

रेस्टॉरंटच्या मालकाला मिळाला जामीन

उत्तर गोव्यामधील न्यायालयानं कर्लीज रेस्टॉरंटचे मालक एडवीन नून्स याला सशर्त जामीन मंजूर केला. एडवीनला जामीन देताना या गुन्ह्याप्रकरणी जोपर्यंत आरोपपत्र दाखल होत नाही तोपर्यंत त्याला त्याच्या कर्लीज रेस्टॉरंटमध्ये जाण्यास मनाई केली आहे.

एडवीन यांच्या वकिलांचे प्रश्न

एडवीन नून्स यांच्या वकील सुरेंद्र देसाई यांनी बुधवारी न्यायालयाला सांगितलं की, वागाटोरमधल्या ज्या हॉटेलमधून सोनाली यांना ड्रग्ज विकलं त्याच्याविरोधात पोलिसांनी कोणतीही कारवाई केलेली नाही. कारण हे हॉटेल प्रसिद्ध राजकारण्याच्या मित्राचे आहे. देसाई यांनी असंही सांगितलं की लोकांचे लक्ष विचलीत करण्यासाठी कर्लीज हॉटेलवर कारवाई केली जात आहे.

कर्लीजच्या मालकाची काय चूक?

देसाई यांनी न्यायालयात युक्तीवाद करताना पुढं सांगितलं की, कर्लीज हॉटेलला ४० वर्षे झाली आहेत. २०१७ मध्ये एक लहान घटना सोडली तर त्यांच्यावर ड्रग्ज संदर्भात कोणताही आरोप झालेला नाही. जर या हॉटेलमध्ये राहणाऱ्या लोकांनी बाहेरून ड्रग्ज आणून ते घेतले तर त्यात कर्लीजच्या मालकांची काय चूक आहे.