RTE Admission 2022: आरटीई प्रवेशांची सोडत लवकरच

आरटीई प्रवेश प्रक्रिये अंतर्गत समाजातील आर्थिक दुर्बल घटकांमधील मुलांना शाळांमध्ये राखीव असणाऱ्या २५ टक्के जागांवर मोफत प्रवेश दिले जातात. या प्रवेश प्रक्रियेला राज्यात १६ फेब्रुवारीपासून सुरुवात झाली. मात्र, आरटीई पोर्टलवर पुणे जिल्ह्यातील शाळांची नोंदणी पूर्ण झाली नव्हती. त्यामुळे या शाळांची नोंदणी पूर्ण झाल्यानंतर, साधारण आठवड्यानंतर प्रवेश प्रक्रियेत ऑनलाइन पद्धतीने अर्ज करायला सुरुवात झाली. यंदाच्या प्रवेश प्रक्रियेत मुलांच्या प्रवेशासाठी राज्यातील नऊ हजार ८८ शाळांमध्ये एक लाख २ हजार २२ जागा उपलब्ध आहेत. त्यासाठी राज्यातून दोन लाख ८२ हजार ९०७ पालकांनी ऑनलाइन पद्धतीने अर्ज केले आहेत. त्यामुळे प्रवेशक्षमतेच्या अडीचपट अर्ज आले आहेत. अशा परिस्थितीत ‘आरटीई’ची प्रवेशाची सोडत कधी जाहीर होणार, याबाबत पालकांमध्ये प्रचंड उत्सुकता आहे. शालेय शिक्षण विभागातील अधिकाऱ्यांनी दिलेल्या माहितीनुसार ‘आरटीई’ची प्रवेशासाठीची सोडत २५ मार्चच्या आसपास जाहीर होण्याची शक्यता आहे. या सोडतीसाठी शालेय शिक्षण विभागाकडून तयारी करण्यात येत आहे. याबाबतची सविस्तर माहिती पालकांना ‘आरटीई’च्या वेबपोर्टलवर प्रसिद्ध करण्यात येईल, असे अधिकाऱ्यांनी सांगितले.

पुणे जिल्ह्यात सर्वाधिक अर्ज

आरटीई प्रवेश प्रक्रियेत पुणे जिल्ह्यातील ९५७ शाळा सहभागी झाल्या आहेत. या शाळांमध्ये प्रवेशासाठी १५ हजार १३२ जागा उपलब्ध असून, एकूण ६२ हजार ९५६ पालकांनी ऑनलाइन अर्ज दाखल केले आहेत. त्यामुळे पुणे जिल्ह्यात प्रवेशक्षमतेच्या चौपट अर्ज आले आहेत. अशा परिस्थितीत आरटीईतून शाळेत मिळण्यासाठी पुणे जिल्ह्यात चुरस राहणार आहे.

MAH LLB CET 2022: महाराष्ट्र लॉ सीईटीसाठी नोंदणी प्रक्रिया सुरु

शालेय शिक्षण विभागाकडून ‘आरटीई’च्या सोडतीची तयारी करण्यात येत आहे. येत्या काही दिवसांत सोडत जाहीर करण्यात येईल. पालकांच्या माहितीसाठी सोडतीची माहिती प्रसारमाध्यमे आणि ‘आरटीई’च्या पोर्टलवर प्रसिद्ध करण्यात येईल.

– राजेश क्षीरसागर, सहसंचालक, प्राथमिक शिक्षण संचालनालय

LSAT 2022: लॉ स्कूल प्रवेश परीक्षेच्या सुधारित तारखा जाहीर