गोदामातील परीक्षा रडारवर; कॉलेजची मान्यता रद्दची प्रक्रिया सुरू

माध्यमिक व उच्च माध्यमिक शिक्षण मंडळाच्या सुरू असलेल्या दहावी, बारावी परीक्षेत अनेक परीक्षा केंद्रांनी भौतिक सुविधाबाबतच्या नियमांना केराची टोपली दाखवली. निलजगाव येथील लक्ष्मीबाई माध्यमिक व उच्च माध्यमिक विद्यालयाने मंडपात परीक्षा घेण्याचा प्रकार समोर आला. या प्रकारावरून परीक्षा चर्चेत आली नाही तोच चक्क गोदामात बारावीची परीक्षा घेतली जात असल्याचा धक्कादायक प्रकार उघडकीस आला आहे. पैठण रोडवरील गेवराई तांडा परिसरातील स्वप्नपूर्ती आर्ट, सायन्स व कॉमर्स कनिष्ठ महाविद्यालय परीक्षा गोदामात घेत आहे. परीक्षेसाठी रूम नसल्याने पडद्याच्या भिंती उभारत एकाच हॉलचे दोन, तीन वेगवेगळे कक्ष करण्यात आले. याच गोदामात परीक्षा सुरू असलेल्याच ठिकाणी मसाला निर्मिती कारखाना आहे. कारखान्यात मसाला निर्मितीसाठी लागणारा कच्चा माल तसाच पडून आहे. तिखट, हळद, मिरचीची पोती पडलेली आहेत. त्याच्याच बाजुला असलेल्या जागेत विद्यार्थी बारावीची परीक्षा देत आहेत. कारखान्यात पसरलेली मिरची, मसाला अशाच वातावरणात परीक्षा देत असून विद्यार्थ्यांचा आरोग्याचाही विचारही करण्यात आलेला नाही. हा प्रकार समोर आल्यानंतर पुन्हा परीक्षा केंद्रावरील भौतिक सुविधांचा प्रश्न उपस्थित झाला आहे. माध्यमिक व शिक्षण मंडळाने यावर कारवाईची प्रक्रिया सुरू केली. शिक्षणाधिकाऱ्यांना याबाबत पत्र पाठवित, मान्यता काढण्याची शिफारस करण्याचे निर्देश दिले आहेत. त्यानुसार शिक्षणाधिकारी कार्यालयानेही कार्यवाही सुरू केली आहे.

केंद्रावर सामूहिक कॉपीचा प्रकार

स्वप्नपूर्ती आर्ट, सायन्स व कॉमर्स कनिष्ठ महाविद्यालयात जीवशास्त्राच्या पेपरवेळी केंद्रावर बहुतांशी विद्यार्थ्यांच्या प्रश्नपत्रिकेवर पेन्सिलीने उत्तरे लिहिलेली आढळून आल्याचे भरारी पथकाच्या लक्षात आले होते. परीक्षा केंद्रावर उत्तरे कोणीतरी सांगितली अन् त्यानंतर विद्यार्थ्यांनी ही लिहिली असावीत असे सांगण्यात येते. विषय शिक्षक परीक्षा केंद्रावर होते का, असाही प्रश्न उपस्थित केला जात आहे. सामुहिक कॉपीचा हा प्रकार असल्याचे सांगण्यात येते. पथकाने याबाबतचा सविस्तर अहवाल मंडळाकडे सादर केला. यावर मंडळ काय कारवाई करते याकडे सर्वांचे लक्ष लागले आहे.

गोदामात होतेय बारावीची परीक्षा; परीक्षा केंद्रातच मसाला निर्मिती कारखाना

शिक्षक मान्यतेचा प्रश्न

स्वप्नपूर्ती महाविद्यालय विभागीय शिक्षण मंडळ, शिक्षणाधिकारी कार्यालयापासून जेमतेम दहा ते बारा किलोमीटरवर आहे. शिक्षणाधिकारी कार्यालय, माध्यमिक व उच्च माध्यमिक शिक्षण मंडळाने परीक्षेपूर्वी भौतिक सुविधांबाबत केंद्रप्रमुख, मुख्याध्याध्यापक, प्राचार्यांची बैठक घेतली. त्यानंतर मंडळाने अनेक केंद्रांना मंडळ मान्यता दिली. परीक्षेपूर्वी प्रक्रिया केल्यानंतरही केंद्रांवर भौतिक सुविधा पुरविण्याबाबत दुर्लक्ष कसे केले जाते असा प्रश्न उपस्थित केला जात आहे.

अधिकाऱ्यांची परीक्षा केंद्राला भेट

शिक्षणाधिकारी कार्यालयाने गोदामातील परीक्षेबाबतचे वृत्त प्रकाशित झाल्यानंतर पथक संबंधित केंद्रावर पाठवले. यामध्ये दोन अधिकाऱ्यांचा समावेश असून त्यांनी पाहणी करत, सविस्तर माहिती घेतली. परीक्षा केंद्रातील विद्यार्थी, बैठक व्यवस्था, कार्यालय, परिसराबाबत माहिती जाणून घेतली. याबाबतचा सविस्तर अहवाल शिक्षाणिकारी कार्यालयाला सादर केला जाणार आहे. त्यानंतर शिक्षण उपसंचालक, विभागीय मंडळाकडे अहवाल सादर केला जाणार आहे. त्यानुसार मान्यता काढण्याची प्रक्रिया केली जाईल, असे मंडळातील अधिकाऱ्यांनी सांगितले.

Hijab Row: परीक्षेत न बसलेल्या विद्यार्थिनींना पुन्हा संधी मिळणार का? शिक्षणमंत्र्यांनी दिले उत्तर

स्वप्नपूर्ती कनिष्ठ महाविद्यालयाची मान्यता काढण्याबाबतचे पत्र शिक्षणाधिकाऱ्यांना दिले आहे. त्यानुसार पुढील कार्यवाही होईल. राज्य शासन, राज्यमंडळालाही याबाबत माहिती देण्यात आली आहे. मंडळ मान्यता देण्यासाठी शिफारस शिक्षणाधिकारी कार्यालयाकडून होते. त्याची प्रक्रियाही तपासून पाहिली जात आहे. मंडळस्तरावरूनही कारवाई केली जाईल.

आर. पी. पाटील, विभागीय सचिव, माध्यमिक व उच्च माध्यमिक शिक्षण मंडळ, औरंगाबाद.

‘बिगर नेट-सेट’बाबतचा निर्णय कोर्टाच्या आदेशानंतर