पोषण आहार विद्यार्थ्यांपर्यंत पोहोचेना, विद्यार्थ्यांच्या तक्रारीनंतर धक्कादायक प्रकार उघड

म. टा. वृतसेवा, पालघर

सरकारकडून शाळेतील विद्यार्थ्यांना पोषण आहार पुरवला जात असला, तरी शाळा व्यवस्थापन व शिक्षकांकडून शाळेतील विद्यार्थ्यांना जूनपासून त्यांच्या हक्काच्या पोषाण आहाराचे वाटप केले जात नसल्याचा धक्कादायक प्रकार पालघर जिल्ह्यातील आदिवासी दुर्गम भागातील विक्रमगड तालुक्यात उघड झाला आहे. कुर्झे विभाग हायस्कूलमधील विद्यार्थ्यांच्या पालकांच्या तक्रारी आल्यानंतर, जिल्हा परिषदेचे उपाध्यक्ष व शिक्षण सभापती ज्ञानेश्‍वर सांबरे यांनी प्रत्यक्ष शाळेला भेट दिल्यावर ही बाब समोर आली.

जि. प. उपाध्यक्ष ज्ञानेश्‍वर सांबरे यांनी विक्रमगडचे गटविकास अधिकारी हनुमंतराव दोडके, शिक्षण विस्तार अधिकारी भरत कासले यांच्यासह बुधवारी अचानक कुर्झे विभाग हायस्कूलला भेट देऊन, शाळेतील पहिली ते आठवीच्या विद्यार्थ्यांना दिल्या जाणाऱ्या पोषण आहाराबाबत आढावा घेतला. सरकारकडून या शाळेला शालेय पोषण आहार उपलब्ध करून देण्यात आला असला, तरी इयत्ता आठवीच्या पटावरील ७७ विद्यार्थ्यांना जून महिन्यात शाळा सुरू झाल्यापासून आतापर्यंत एकदाही पोषण आहार दिला गेला नसल्याचे विद्यार्थ्यांनी सांगितले.

असे असताना, कुर्झे विभाग हायस्कूलने मात्र पंचायत समितीच्या शिक्षण विभागाला दिलेल्या लेखी अहवालात सर्व विद्यार्थ्यांना पोषण आहार देत असल्याचा दावा केल्याचे समोर आले. या शाळेतील आठवीचे विद्यार्थी हे चार ते पाच किलोमीटरवरून येतात, त्यांना पोषण आहार दिला जात नसल्याने आश्चर्य व्यक्त होत आहे.

शालेय विद्यार्थ्यांसाठी मोफत नाश्ता योजना, ‘या’ मुख्यमंत्र्यांकडून मोठी घोषणा
उमेदवारांच्या प्रवेशपत्रावर PM मोदी आणि MS धोनीचा फोटो, धक्कादायय प्रकार समोर
पोषण आहारासंदर्भातील नमुना क्र.१मध्ये पोषण आहाराच्या नोंदी नसल्याचे, तसेच साठा रजिस्टर उपलब्ध नसल्याचे उघड झाले आहे. तसेच शाळेच्या शिक्षकांच्या व नॉन टीचिंग स्टाफच्या हजेरी बुकात रजा नोंदवल्या नसल्याचेही समोर आले आहे. याबाबतचा अहवाल पुढील कारवाईसाठी जिल्हा परिषदेकडे पाठवणार असल्याचे गट विकास अधिकारी हनुमंतराव दोडके यांनी सांगितले.

सरकारकडून दिलेला पोषण आहार आठवीच्या विद्यार्थ्यांना न देणे ही गंभीर बाब असून आदिवासी विद्यार्थ्यांच्या टाळूवरचे लोणी खाण्याचा हा प्रकार आहे. या शाळेवर आणि संस्थेवर कारवाई करण्याची मागणी शिक्षण विभागामार्फत जिल्हा परिषदेच्या मुख्य कार्यकारी अधिकाऱ्यांकडे करण्यात आली आहे.
– ज्ञानेश्वर सांबरे, जिल्हा परिषद उपाध्यक्ष व शिक्षण सभापती, पालघर

ऑनलाइन शिक्षणाचे असेही तोटे, विद्यार्थ्यांना जडले डोळ्यांचे आजार