‘नॅक’च्या मूल्यांकन पद्धतीत होणार महत्वाचे बदल, जाणून घ्या तपशील

म. टा. प्रतिनिधी, पुणे

देशातील विद्यापीठे, शैक्षणिक संस्था, महाविद्यालये यांचे मुल्यांकन करणाऱ्या राष्ट्रीय मुल्यांकन आणि मान्यता परिषदेच्या मूल्यमापन प्रक्रियेत (नॅक) आमूलाग्र बदल होणार आहेत. येत्या काळात हे मूल्यांकन संख्येच्या नाही, तर गुणवत्तेच्या आधारे केले जाईल, असे ‘नॅक’द्वारे स्पष्ट करण्यात आले आहे. यामुळे आता कोणत्या महाविद्यालयात किती कम्प्युटर, स्रोत, प्रयोगशाळा आहेत, याहीपेक्षा कोणत्या कॉलेजमध्ये गुणवत्तापूर्ण ज्ञान दिले जाते, यावर भर दिला जाणार आहे.

राष्ट्रीय मूल्यांकन आणि मान्यता परिषद (नॅक) कार्यकारी समितीचे अध्यक्ष डॉ. भूषण पटवर्धन यांच्या मार्गदर्शनाखाली ‘राष्ट्रीय मुल्यांकन व मान्यता परिषद – संकल्पना, पद्धती’ या विषयावर एक दिवसीय परिसंवादाचे आयोजन करण्यात आले होते. या परिषदेत ‘नॅक’ची मूल्यांकन पद्धती बदलली जाणार असल्याची घोषणा डॉ. पटवर्धन यांनी केली. या वेळी‘आयसर’चे माजी प्राध्यापक डॉ. के. पी. मोहनन, सावित्रीबाई फुले पुणे विद्यापीठाचे कुलगुरू डॉ. कारभारी काळे, प्र-कुलगुरू डॉ. संजीव सोनवणे, उत्तर महाराष्ट्र विद्यापीठाचे माजी कुलगुरु डॉ. आर. एस. माळी, कर्वे इन्स्टिट्यूटचे मधुकर पाठक, धनंजय कुलकर्णी उपस्थित होते.

‘तुमच्या ग्रंथालयात किती पुस्तके आहेत, तुमच्याकडे किती ठिकाणी वायफाय सुविधा आहे, असे प्रश्न आता मूल्यांकन प्रक्रियेत असणार नाहीत. या बदलात सर्वांना सामावून घेतले जाणार आहे. आतापर्यंत नॅकच्या मूल्यांकनाच्या मसुद्यात ४७ वेळा बदल करून हा मसुदा नव्या सूचनांसाठी ‘नॅक’च्या वेबसाइटवर प्रसिद्ध केला आहे. शैक्षणिक धोरण २०२० च्या अनुषंगाने हे बदल होत असून यामध्ये शिक्षणाच्या मूळ उद्देशाच्या अनुषंगाने मूल्यांकन करण्याचा प्रयत्न आहे,’ असे डॉ. पटवर्धन यांनी नमूद केले. ‘वन नेशन वन डेटा’बद्दलही त्यांनी माहिती दिली.

Internship Courses: विद्यार्थ्यांसाठी इंटर्नशिप कोर्सेस तयार करुन ‘क्रेडिट’ द्या- AICTE
‘नॅक’ची मूल्यांकन पद्धती गुणवत्तेच्या आधारावर व्हायला हवी. कोणाकडे उपकरणांची किती संख्या आहे, यावर नाही. यानुसार मूल्यांकन पद्धतीत बदल केले जात असून त्यासाठी देशभरातून सूचना मागवल्या जात आहेत. येत्या काळात नॅक समितीकडून चुकीच्या पद्धतीने पैसे घेऊन मुल्यांकन केल्याचे प्रकार समोर आले, तर त्यावर गंभीर कारवाई केली जाईल.
– डॉ. भूषण पटवर्धन, अध्यक्ष, नॅक

शिक्षण हे मूल्यांवर आधारित असायला हवे हे आपल्या गुरू शिष्य परंपरेत सांगितले आहे. नव्या शैक्षणिक धोरणात मूलभूत शिक्षणावर भाष्य केले आहे, त्याचा अभ्यास करत शिक्षकांनी आपल्या पातळीवर त्याच्या अंमलबजावणीला सुरुवात करावी.
– डॉ. कारभारी काळे, कुलगुरू, सावित्रीबाई फुले पुणे विद्यापीठ

NEP: शैक्षणिक धोरणाचा ‘ॲक्शन प्लॅन’ हवा
PhD च्या विद्यार्थ्यांना मुलाखत-परीक्षांसाठी ऑनलाइन, ऑफलाइन असे दोन्ही पर्याय