NAC Assessment: विद्यापीठांप्रमाणे शाळांचेही होणार ‘नॅक’ मूल्यांकन

म. टा. प्रतिनिधी, पुणे

राष्ट्रीय, आंतरराष्ट्रीय पातळीवरील सरकारी, खासगी विद्यापीठे आणि शिक्षणसंस्थांसह आता राज्यातील शाळांचेही ‘नॅक’ (राष्ट्रीय अधिस्वीकृती परिषद) मूल्यांकन होणार आहे. शाळांच्या गुणवत्तेचा दर्जा सुधारणे, विद्यार्थ्यांना कौशल्यपूर्ण शिक्षण देण्यासाठी शाळांमधील पायाभूत सुविधांचा वाढविणे हा त्यामागचा हेतू आहे. त्यामुळेच पुणे जिल्ह्यात याबाबत प्रायोगिक तत्त्वावर मूल्यांकन करण्यात येणार आहे.

राज्यातील शाळांचा दर्जा आणि शैक्षणिक गुणवत्ता सुधारण्यासाठी जिल्हा परिषदेचे मुख्य कार्यकारी अधिकारी आयुष प्रसाद यांच्या अध्यक्षतेखाली सरकारने समिती स्थापन केली होती. त्या समितीने आराखड्याचा अहवाल; तसेच राज्यात आदर्श शाळांच्या मूल्यांकनासाठी कोणते निकष असावेत याबाबत अभ्यास करून अहवाल तयार केला आहे. तो नुकताच राज्याच्या शिक्षण सचिवांना सादर करण्यात आला आहे.

शाळांच्या मूल्यांकनाबाबत विविध क्षेत्रांतील तज्ज्ञांची मते जाणून घेण्यात आली. त्या संदर्भात राष्ट्रीय, आंतरराष्ट्रीय पातळीवरील सीबीएसई, आयसीएसई बोर्ड; तसेच खासगी शाळांसह विद्यापीठांचे ‘नॅक’च्या धर्तीवर मूल्यांकन करण्यात येते. त्या सर्वांच्या निकषांचा एकत्रित अभ्यास करून समितीने अहवाल तयार केला आहे. त्यानुसार, त्यांना श्रेणीही (गुणांकन) देण्यात येणार आहे. त्याकरिता शाळांचे आता नॅकच्या धर्तीवर मूल्यांकन करण्याचा राज्य सरकार गंभीर विचार करीत आहे. त्यामुळेच शाळांचा दर्जा सुधारण्याचा सरकारचा प्रयत्न आहे. म्हणून मूल्यांकनासाठी कोणत्या निकषांची अंमलबजावणी शाळांनी करावी याचीही शिफारस करण्यात आली आहे.

शाळांना श्रेणी कशी मिळणार?

प्राप्त गुणे ………….. श्रेणी

९१ ते १०० टक्के…………अ +

८१ ते ९० टक्के ……….अ

७१ ते ८० टक्के…………ब +

६१ ते ७० टक्के………..ब

५१ ते ६० टक्के………….क+

५० टक्के……………….क

मान्यता रखडल्याने विद्यार्थ्यांवर दुसऱ्या शाळेत प्रवेश घेण्याची वेळ
PCMC School: पालिका शाळेतील वर्गखोल्यांचा वापर फक्त शिक्षणासाठी करा, आयुक्तांचे आदेश
अनेक राज्यांचे निकषांचा विचार
राज्याच्या ‘माझी समृद्ध शाळा’, ‘शाळा ग्रेडेशन’ या उपक्रमासह राष्ट्रीय स्तरावरील शाळासिद्धी, ‘स्वच्छ शाळा, सुंदर शाळा’ तसेच गुजरात राज्याचा गुणोत्सव, ओडिशाचा समीक व कर्नाटक राज्याने विकसित केलेला गुणवत्ता व प्रमाणीकरण आराखडा या सर्व प्रचलित शाळा मूल्यांकनाच्या बलस्थानांचा अभ्यास समितीने केला आहे. त्या सर्वांचा समावेश करून पुणे जिल्ह्यात राबविण्यात येत असलेल्या शाळा सुधार कार्यक्रमांतर्गत मूल्यांकनाचा प्रायोगिक प्रकल्प राबविला जाणार आहे.

पुणे जिल्ह्यातील पहिली ते बारावीपर्यतच्या शाळांचे मूल्यांकन या शैक्षणिक वर्षापासून करण्यात येणार आहे. पुणे जिल्ह्यातील सुमारे सात हजार खासगी अनुदानित, विनाअनुदानित; तसेच सरकारी शाळांचे मूल्यांकन होणार आहे. त्यामध्ये जिल्हा परिषदांच्या शाळांचाही समावेश असेल अशी प्रतिक्रिया जिल्हा परिषदेचे मुख्य कार्यकारी अधिकारी आयुष प्रसाद यांनी दिली.

शैक्षणिक धोरणाचा आराखडा तयार, राज्याच्या शिक्षणाला मिळणार वेगळी दिशा