मराठी लेखक-दिग्दर्शकासोबत काम करणार सुष्मिता सेन; किन्नर भूमिकेत दिसणार अभिनेत्री

मुंबई: बॉलिवूड अभिनेत्री आणि मिस युनिव्हर्स सुष्मिता सेन (Sushmita Sen Upcoming Web Series) गेल्या काही दिवसांपासून उद्योजक ललित मोदीसोबतच्या रिलेशनशिपच्या चर्चांमुळे चर्चेत आली होती. बॉलिवूडपासून लांब असलेल्या सुष्मिताची तिच्या लव्हलाइफमुळे विशेष चर्चा झाली. पण आता सुष्मिताचं नाव एका वेगळ्याच कारणामुळे चर्चेत आलं आहे, हे कारण आहे तिने स्विकारलेली ‘आउट ऑफ द बॉक्स’ भूमिका. तिची नवी वेबसीरीज लवकरच प्रेक्षकांच्या भेटीला येणार आहे. या वेबसीरीजमधील सुष्मिताचा लूक नुकताच समोर आला आणि तिला या रूपा पाहून चाहते अवाक झाले. सुष्मिताने तिचा नवा लूक शेअर करत दमदार कॅप्शनही लिहिली आहे.

तृतीयपंथी समाजसेविका गौरी सावंत यांच्यावर आधारीत वेब सीरीज बनवणार असल्याची घोषणा दोन महिन्यांपूर्वी करण्यात आली होती. टाइमपास, दुनियादारी या मराठीतील हिट सिनेमांचे दिग्दर्शक तसेच न्यूड या वादग्रस्त पण तितक्याच बोल्ड सिनेमाची मांडणी करणारे दिग्दर्शक रवी जाधव यांनी हिंदीत पदार्पण करत असल्याचं जाहीर केलं होतं. तो हाच प्रोजेक्ट असून या वेबसीरीजचं नाव ‘ताली’असं (Sushmita Sen in Taali) आहे.

हे वाचा-अनन्या पांडेची झाली फजिती, आर्यन खानला म्हटलं क्रश पण त्याने भर पार्टीत केलं दुर्लक्ष

सुष्मिताने तिच्या सोशल मीडिया पेजवर ‘ताली’ वेब सीरिजचा पहिला लूक चाहत्यांशी शेअर केला आहे. ठसठशीत कुंकू, डोळ्यातले करारी भाव आणि तृतीयपंथीयांची ओळख असलेली टाळी वाजवणारे हात असा हा लूक आहे. ‘आता टाळी वाजवणार नाही, तर वाजवायला लावेन’ अशी कॅप्शन देत सुष्मिताने नेटकऱ्यांचं लक्ष वेधलं आहे.

‘ताली’ या वेब सीरीजमध्ये सुष्मिताचं हटके रूप पाहायला मिळणार असल्याने तिचे चाहते तर खुश आहेतच पण ती स्वत:ही खूपच उत्सुक आहे. तृतीयपंथी असलेल्या आणि तृतीयपंथीयांच्या हक्कासाठी लढणाऱ्या गौरी सावंत यांच्या भूमिकेत सुष्मिताला पाहता येणार आहे. एक सुंदर भूमिका, वास्तवातील व्यक्तिरेखा साकारण्याची संधी मिळणं, गौरी सावंत यांचं कार्य समाजापर्यंत पोहोचवणं हे भाग्य मिळाल्याची भावना सुष्मिताने व्यक्त केली आहे.

मराठीतील प्रयोगशील दिग्दर्शक रवी जाधव यांच्याकडे या वेबसीरीजच्या दिग्दर्शनाची जबाबदारी आहे. रवी जाधव यांनी यापूर्वी अनेक रोमँटिक सिनेमांचं दिग्दर्शन तर केलं आहेच पण न्यूड या बोल्ड सिनेमाला जगभरात पोहोचवण्याचंही काम त्यांनी केलंय. अलीकडे रवी जाधवांचे अनन्या आणि टाइमपास ३ हे चित्रपट येऊन गेले. तर ‘तमाशा लाइव्ह’, ‘फास्टर फेणे’, ‘डबल सीट’, ‘माऊली’ फेम लेखक क्षितीज पटवर्धनने या वेब सीरीजचं लेखन केलं आहे. त्यामुळे सुष्मिता सेनचा अभिनय असलेली आणि गौरी सावंत यांच्यावर बेतलेली ‘ताली’ ही सीरिज मराठमोळी आहे असं म्हटलं तर वावगं ठरणार नाही.

हे वाचा-तू माझ्यासाठी जग… अंजली बाईंनी शेअर केला राणादाचा कधीही न पाहिलेला VIDEO

सुष्मिताच्या या नव्या लूकवर तिची मुलगी रेने आणि वहिनी चारू असोपा यांनीही कमेंट केली आहे. तुझा गर्व आहे अशा शब्दात सुष्मितावर कौतुकाचा वर्षाव होतो आहे. ‘आर्या’ या वेब सीरीजमुळे सुष्मिताचं नाव ओटीटीच्या दुनियेत गाजलं होतं. आता ‘ताली’मधूनही यश मिळू दे अशा शुभेच्छा सुष्मिताच्या चाहत्यांनी दिल्या आहेत.

कोण आहेत गौरी सावंत?

ताली ही वेबसीरीज ज्यांच्या आयुष्यावर आधारीत आहे त्या गौरी सावंत या एक सामाजिक कार्यकर्त्या आहेत. त्या तृतीयपंथी असून २०१० मध्ये त्यांनी तृतीयपंथीयांच्या हक्कांसाठी सखी चारचौघी ही संस्था स्थापन केली. तृतीयपंथी असल्याचे जाणवल्यानंतर ज्यांना त्यांच्या कुटुंबीयांनी नाकारले आणि त्यामुळे घर सोडलेल्या तृतीयपंथीयांना आधार देण्यासाठी गौरी सावंद यांचं कार्य मोठं आहे. ६ एपिसोडच्या ताली या वेबसीरीजमध्ये गौरी यांच्या आयुष्यातील संघर्ष दाखवण्यात आला आहे. अलीकडेच गौरी सावंत यांनी झी मराठीवरील ‘बस बाई बस’ या कार्यक्रमातही हजेरी लावली होती.