महापालिकेच्या २९ शाळा मुख्याध्यापकांविना

मटा प्रतिनिधी, नवी मुंबई

नवी मुंबई महापालिकेच्या शाळेत आधीच शिक्षकांची कमतरता असल्याने विद्यार्थ्यांचे शैक्षणिक नुकसान होत आहे. त्यापाठोपाठ आता महापालिकेच्या २९ शाळांमध्ये मुख्याध्यापक नसल्याची बाब समोर आली आहे. त्यामुळे शालेयस्तरावर निर्णय घेण्यास अनंत अडचणी येत असून महत्त्वाचे निर्णय घेण्यासही विलंब होत आहे. महत्त्वाचे म्हणजे अनेक वरिष्ठ शिक्षकांना पदोन्नती मिळाली नसल्याने ही पदे रिक्त आहेत. त्यामुळे अनेक वरिष्ठ शिक्षक पदोन्नतीच्या प्रतीक्षेत आहेत. त्यामुळे शाळेतील ही महत्त्वाची पदे लवकरात लवकर भरावीत, अशी मागणी होत आहे.

नवी मुंबई महापालिकेच्या ५३ शाळा आहेत, त्यापैकी २९ शाळांना मुख्याध्यापक नाहीत. त्यामुळे या शाळांवर आता प्रभारी मुख्याध्यापक नेमण्यात आले असून त्यांच्यावरच मुख्याध्यापकांची जबाबदारी देण्यात आली आहे. प्रभारी पदाला फारसे महत्त्व नसल्याने हे पद असून नसून सारखेच आहे. त्यामुळे शाळेच्या व्यवस्थापनावर या प्रभारीपदाचा परिणाम होत आहे. तसेच, जे वरिष्ठ शिक्षकांनी आता मुख्याध्यापक होण्याची पात्रता पूर्ण केली आहे, त्यांनाही या पदाची आस लागली आहे. विशेष म्हणजे पदोन्नतीसाठी पात्र असलेले ज्येष्ठ शिक्षक आता निवृत्तीच्या जवळ पोहोचले आहेत. त्यामुळे किमान निवृत्त होताना तरी पदोन्नती व्हावी, अशी त्यांची आशा आहे. येत्या डिसेंबरपर्यंत तर सध्या कार्यरत असलेल्या मुख्याध्यापकांपैकी पाच मुख्याध्यापक निवृत्तही होणार आहेत.

GMC Recruitment: शासकीय वैद्यकीय महाविद्यालयांत १२०० पदे रिक्त
पालिकेच्या शाळेतील शिक्षकांसह मुख्याध्यापकांच्या कमी संख्येबाबत गांभीर्याने विचार करून तत्कालीन शिक्षण उपायुक्त जयदीप पवार यांनी याची दखल घेतली होती. त्यानुसार शिक्षण विभागातील वरिष्ठांना त्याची दखल घ्यावी लागली आणि त्यानुसार मुख्याध्यापकपदावर पदोन्नती करण्याची कार्यवाहीदेखील सुरू झाली होती. त्याची यादीही तयार करण्यात आली होती. मात्र दोन आठवड्यांपूर्वी जयदीप पवार यांची मंत्रालयात बदली झाली आणि हा विषय ‘जैसे थे’ राहिला. संबंधित शिक्षण विभागाकडे याबाबत विचारणा केली असता, शिक्षकांना पदोन्नती देण्याचा विचार सुरू असल्याचे सांगण्यात आले. त्यामुळे लवकरच हा प्रश्न मार्गी लागेल, अशी आशा शिक्षकांना वाटते आहे.

Teacher Recruitment: सरकारी शाळांमध्ये शिक्षकांची ३१ हजार पदे रिक्त
‘शाळांमध्ये व्यवस्थापन समिती स्थापन करा’