गँग्ज ऑफ वासेपुरपासून ते देव डीपर्यंत, अनुराग कश्यपच्या करिअरमधले हे ५ सिनेमे पाहिलेत का?

मुंबई-अनुराग कश्यप वाढदिवस- प्रसिद्ध बॉलिवूड दिग्दर्शक आणि निर्माता अनुराग कश्यप चा आज वाढदिवस आहे. दिग्दर्शक अनुराग आउट ऑफ द बॉक्स सिनेमे बनवण्यासाठी ओळखला जातो. त्याच्या चित्रपटांव्यतिरिक्त, दिग्दर्शक त्याच्या निर्भिड बोलण्यासाठीही विशेष ओळखला जातो. यामुळे तो अनेकदा ट्रोलही होतो. पण या सर्वाची पर्वा न करता तो आपलं मत सतत व्यक्त करताना दिसतो. अनुराग कश्यपचा जन्म उत्तर प्रदेशातील गोरखपूर इथे झाला.

दिग्दर्शकाचा सुरुवातीचा प्रवास खूप संघर्षमय होता. मनोज बाजपेयीने अनुरागचं नाव राम गोपाल वर्मा यांना लेखक म्हणून सुचवलं. अशाप्रकारे अनुरागला सौरभ शुक्लासोबत सत्या चित्रपटात काम करण्याची संधी मिळाली. अनुरागने २००३ मध्ये ‘पांच’ चित्रपटातून दिग्दर्शन क्षेत्रात पदार्पण केले. मात्र त्याचा पहिलाच सिनेमा आजपर्यंत प्रदर्शित होऊ शकला नाही. अनुराग कश्यपने ‘रमन राघव २.०’, ‘मनमर्जियां’, ‘गँग्स ऑफ वासेपूर’, ‘देव डी’ यांसारख्या हिट सिनेमांचं दिग्दर्शन केलं आहे. आज अनुरागच्या वाढदिवसानिमित्त त्याच्या पाच सर्वोत्तम सिनेमांबद्दल जाणून घेऊ.

गँग्ज ऑफ वासेपूर (१,२)

अनुराग कश्यपचा गँग्ज ऑफ वासेपूर हा एक मास्टर पीस आहे. कौटुंबिक वैर आणि रक्तपात या चित्रपटात दाखवण्यात आला आहे. हा चित्रपट इतका हिट झाला होता की आजही सिनेमातील पात्रांपासून ते संवादांपर्यंत लोकांना सर्व काही आठवतं. चित्रपटात नवाजुद्दीन सिद्दीकी, मनोज बाजपेयी सारखे स्टार्स दिसले होते.

देव डी (२००९)

अनुराग कश्यपचा देव डी हा एक ब्लॅक कॉमेडी रोमान्स चित्रपट आहे. या चित्रपटात अभय देओल मुख्य भूमिकेत दिसला होता. देवदास या क्लासिक चित्रपटाची ही आधुनिक आवृत्ती होती. चित्रपटात सर्वच कलाकारांनी अप्रतिम काम केले आहे.

गुलाल (२००९)

अनुराग कश्यपचा गुलाल हा एक राजकीय ड्रामा चित्रपट आहे. महाविद्यालयीन राजकारण चित्रपटात उत्तमरीत्या दाखवण्यात आले आहे. चित्रपटात जातीवादाशी निगडित प्रश्नही गंभीरपणे दाखवण्यात आले आहेत.

मनमर्जियां

मनमर्जियां हा एक रोमँटिक चित्रपट आहे. या चित्रपटात तापसी पन्नू, विकी कौशल आणि अभिषेक बच्चन मुख्य भूमिकेत आहेत. या चित्रपटाची कथा नायिका तापसीभोवती फिरते. मनमर्जियांमध्ये प्रेमाचा अर्थ सांगण्याचा प्रयत्न करण्यात आला आहे.

रिटर्न ऑफ हनुमान (२००७)

अनुराग कश्यपने लहान मुलांसाठी हा चित्रपट बनवला. चित्रपटात हनुमान त्या मुलाला मदत करतो, ज्याला त्याच्या आजूबाजूचे लोक त्रास देतात. या चित्रपटाच्या माध्यमातून मुलांमध्ये ग्लोबल वॉर्मिंगबाबत जनजागृती करण्याचा प्रयत्न करण्यात आला.