१० वीत असताना अतुल कुलकर्णी यांनी केलेला पहिल्यांदा अभिनय, ‘चांदनी बार’ सिनेमा आला आणि…

मुंबई- अतुल कुलकर्णी हे एक असं नाव आहे जे फक्त मराठी सिनेसृष्टीपुरतं मर्यादित नक्कीच नाही. अतुल यांची गणना उत्कृष्ट अभिनेते म्हणून केली जाते. १० सप्टेंबर १९६५ रोजी कर्नाटकात जन्मलेल्या अतुल यांच आज वाढदिवस आहे. त्यांनी आपल्या सिनेकारकिर्दीत अनेक अप्रतिम भूमिका साकारल्या. हिंदी व्यतिरिक्त त्यांनी मराठी, मल्याळम, तमिळ, तेलगू, कन्नड आणि इंग्रजी सिनेमांमध्येही त्यांनी आपलं अभिनय कौशल्य दाखवलं. आज अभिनेत्याच्या वाढदिवसानिमित्त त्यांच्या आयुष्याशी संबंधित काही गोष्टी जाणून घेऊ.

असा सुरू झाला अभिनय प्रवास

अतुल कुलकर्णी यांनी सुरुवातीचे शिक्षण कर्नाटकातून केले. दहावीत असताना त्यांनी पहिल्यांदा अभिनयात हात आजमावला. त्यानंतर कॉलेजच्या दिवसांतच त्यांनी रंगभूमीवर प्रवेश केला आणि अभिनयातील बारकावे शिकून घेतले. १९९५ मध्ये नॅशनल स्कूल ऑफ ड्रामामधून डिप्लोमा केला आणि अभिनेता होण्याचं उराशी बाळगलेलं स्वप्न पूर्ण करायला ते सज्ज झाले. १९९७ मध्ये कन्नड सिनेमा ‘भूमी गीता’मधून त्यांनी पदार्पण केलं. यानंतर २००० मध्ये ‘हे राम’ सिनेमात ते दिसले.

अभिनयाने लोकांची मनं जिंकली

२००१ मध्ये आलेल्या मधुर भांडारकर यांच्या चांदनी बार सिनेमाने अतुल कुलकर्णी यांना फक्त मराठी चाहत्यांमध्येच नाही तर देशभरात ओळख मिळाली. या सिनेमातील त्यांच्या अभिनयाचं खूप कौतुक झालं आणि ते प्रेक्षकांची मनं जिंकण्यात यशस्वी झाले. एवढंच नाही तर अतुल कुलकर्णी यांना ‘चांदनी बार’ आणि ‘हे राम’साठी सर्वोत्कृष्ट सहाय्यक अभिनेत्याचा राष्ट्रीय पुरस्कारही मिळाला. यानंतर ते ‘रंग दे बसंती’, ‘पेज ३’, ‘द अटॅक ऑफ २६/११’, ‘दिल्ली ६’, ‘द गाझी अटॅक’, ‘थर्स्डे’ यासह अनेक भाषांच्या सिनेमांमध्ये दिसले. खलनायक होऊनही त्यांनी लोकांच्या हृदयात स्वतःसाठी एक खास स्थान निर्माण केले आहे.

वेब सीरिजमध्येही दिसले

सिनेमांतील यशासोबतच, अतुल यांनी २०१८ मध्ये ‘द टेस्ट केस’ द्वारे OTT प्लॅटफॉर्मवर पदार्पण केलं. यानंतर ते ‘सिटी ऑफ ड्रीम्स’, ‘बंदिश बॅण्डिट्स’, ‘रुद्र: द इज ऑफ डार्कनेस’सह अनेक सीरिजमध्ये दिसले. यासोबतच, अलीकडे पटकथा लेखक म्हणून त्यांचा पहिला सिनेमा ‘लाल सिंह चड्ढा’ प्रदर्शित झाला होता, ज्यामध्ये आमिर खान मुख्य भूमिकेत होता. मात्र, या चित्रपटाला प्रेक्षकांचा चांगला प्रतिसाद मिळाला नाही आणि तो बॉक्स ऑफिसवर अपयशी ठरला.

गीतांजली कुलकर्णी यांच्याशी केलं लग्न

अतुल कुलकर्णी यांच्या वैयक्तिक आयुष्याविषयी बोलायचं झालं तर त्यांनी अभिनेत्री गीतांजली कुलकर्णी यांच्याशी लग्न केलं. गीतांजली याही उत्कृष्ट कलाकार असून अनेक सिनेमांमधील त्यांच्या अभिनयाचं भरभरून कौतुक झालं आहे. विशेषतः ‘गुल्लक’ वेब सीरीजमधील अभिनयासाठी त्यांचे खूप कौतुक झाले. अभिनयाव्यतिरिक्त, दोघे लहान मुलांसाठी एक गैर-सरकारी संस्था (एनजीओ) देखील चालवतात. या एनजीओचे नाव ‘क्वेस्ट एज्युकेशन सपोर्ट ट्रस्ट’ आहे, ज्याद्वारे ते १४ वर्षांपर्यंतच्या मुलांना मोफत शिक्षण देतात.