College Election: कॉलेजच्या निवडणूक कधी होणार? जाणून घ्या मोठी अपडेट

म. टा. विशेष प्रतिनिधी, मुंबई :

तब्बल २५ वर्षांच्या प्रतीक्षेनंतर राज्य सरकारने कॉलेज निवडणुकांवरील बंदी उठवली आणि निवडणुकीची प्रक्रियाही सुरू झाली. मात्र २०२०मध्ये करोनामुळे ही प्रक्रिया पुन्हा रखडली. त्यानंतर आत्तापर्यंत विद्यार्थ्यांना त्यांच्या हक्काचा प्रतिनिधीच मिळालेला नाही. यामुळे आता विद्यापीठांनी निवडणूक जाहीर करावी किंवा निवड प्रक्रियेद्वारे तरी प्रतिनिधी नियुक्ती द्यावी, अशी मागणी जोर धरू लागली आहे.

विद्यार्थी प्रतिनिधी म्हणून काम करत भविष्यात ज्येष्ठ राजकीय नेते झालेले अनेक उदाहरणे देशाच्या राजकारणात पाहवयास मिळतात. मात्र गेल्या २८ वर्षांत राज्यात कॉलेज प्रतिनिधींच्या निवडणुका पारच पडल्या नाहीत. या काळात निवड पद्धतीने ही प्रक्रिया पार पडत असते. मात्र महाराष्ट्र विद्यापीठ अधिनियम, २०१६नुसार विद्यार्थी प्रतिनिधी हे निवडणुकांच्या माध्यमातूनच निवडले गेले पाहिजे, अशी तरतूद करण्यात आली आहे. यानुसार हा कायदा लागू झाल्यानंतर २०१९मध्ये मुंबई विद्यापीठाने वेळापत्रक जाहीर केले होते. मात्र करोनामुळे ही प्रक्रिया पार पडली नव्हती.

यंदा शैक्षणिक वर्षात सर्व कॉलेजे वेळेत सुरू झाली आहेत. त्यामुळे कॉलेजांमध्ये निवडणुका व्हाव्यात, अशी विद्यार्थी प्रतिनिधींची मागणी आहे.

महाराष्ट्र वगळता पश्चिम बंगाल, केरळ, दिल्ली अशा राज्यांमध्ये विद्यार्थी संघटना आक्रमकपणे काम करत आहेत. अन्य राज्यांत विद्यार्थी निवडणुका सुरू असताना महाराष्ट्रातही या निवडणुका सुरू व्हाव्यात यासाठी अनेक संघटनांनी दोन दशकांहून अधिक काळ लढा दिला. यानंतर अखेर कायद्यात तरतूद झाली. पण अद्याप प्रत्यक्ष निवडणुका होऊ शकलेल्या नाहीत. यंदा या निवडणुका व्हाव्यात यासाठी विद्यार्थी संघटना आक्रमक झाल्या आहेत.

‘विद्यार्थ्यांना त्यांचे प्रश्न मांडण्यासाठी हक्काचे व्यासपीठ मिळणे आवश्यक आहे. त्यासाठी विद्यार्थी प्रतिनिधी हा असलाच पाहिजे कायद्यातील तरतुदीनुसार योग्यप्रकारे नियोजन करून निवडणुकांचे आयोजन करावे किंवा प्रचलित पद्धतीने तरी विद्यार्थी प्रतिनिधींची नियुक्ती करावी तसेच त्याबाबतची प्रकिया जाहीर करावी’, असे मत युवा सेनेचे कोअर कमिटी सदस्य साईनाथ दुर्गे यांनी व्यक्त केले. तर ‘विद्यार्थ्यांना त्यांचे प्रश्न मांडण्यासाठी विद्यार्थी प्रतिनिधी असणे आवश्यक असते. मात्र सध्या विद्यापीठामध्ये कुलगुरू नियुक्तीच रखडली असल्याने विद्यार्थी निवडणुकांबाबत कोण निर्णय घेणार?’, अशी अवस्था निर्माण झाल्याचे एनएसयूआयचे फैजल शेख यांनी सांगितले. ‘सध्याच्या राज्यातील विचित्र राजकीय परिस्थितीची बोध घेता आपण जर निवडणुका केल्या तर राज्याला अनेक चांगले राजकीय नेते लाभू शकतात’, असे मत मनविसेचे मुख्य संयोजक संतोष गांगुर्डे यांनी व्यक्त केले.

‘लोकशाहीसाठी आवश्यक’

लोकशाही टिकवण्यासाठी विद्यार्थी प्रतिनिधी हे आवश्यकच असतात. यामुळे कॉलेज निवडणुका होणे गरजेचे मत कीर्ती कॉलेजचे प्रा. हर्षद भोसले यांनी व्यक्त केले. जर या स्तरावर निवडणुका झाल्या नाही तर नवे नेते निर्माण होत नाही आणि राजकारणात घरणेशाही सुरू होते. हे रोखण्यासाठी या निवडणुका आवश्यक असल्याचे प्रा. भोसले म्हणाले.