अंगात ताप होता, बसताही येत नव्हतं तरी… ‘आई कुठे काय करते’ फेम आप्पांचं होतंय कौतुक

मुंबई: मराठी मालिकांचा प्रेक्षकवर्ग दिवसेंदिवस वाढत चालला आहे. मात्र काही मालिका अशा आहेत की ज्या अनेक वर्षांपासून प्रेक्षकांच्या मनात घर करून बसल्या आहेत. ‘आई कुठे काय करते’ ही अशा मालिकांपैकी एक मालिका आहे. गेल्या अनेक महिन्यांपासून आई कुठे काय करते टीआरपीच्या यादीमध्ये टॉप १० मध्ये आहे. त्यामुळे या मालिकेतील कलाकारांविषयी त्यांचे चाहते नेहमी अपडेट जाणून घेत असतात. या मालिकेत अनिरुद्धची भूमिका साकारणारे मिलिंद गवळीही सोशल मीडियाच्या माध्यमातून प्रेक्षकांशी नेहमी संवाद साधत असतात. मात्र अलीकडेच मिलिंद यांनी शेअर केलेला व्हिडिओ विशेष व्हायरल होत झाला. मात्र आता मिंलिंद यांनी हा व्हिडिओ इन्स्टाग्रामवरुन हटवला आहे.

मिलिंद यांनी यावेळी शेअर केलेल्या व्हिडिओमध्ये त्यांनी या मालिकेतील त्यांचे आप्पा अर्थात अभिनेते किशोर महाबोले यांच्याविषयी भरभरुन लिहिले होते. या व्हिडिओनंतर आप्पांचे विशेष कौतुक सोशल मीडियावर झाले. मात्र मिंलिंद यांनी हा व्हिडिओ डिलिट का केला, याचे कारण मात्र अद्याप अस्पष्ट आहे. मिलिंद यांनी शेअर केलेल्या व्हिडिओमध्ये आई कुठे काय करतेचा सेट होता. या बीटीएस व्हिडिओमध्ये आप्पांसह मालिकेची संपूर्ण कास्टही दिसत होती.

हे वाचा-श्रेयस तळपदेचा आलियाला सल्ला, ‘प्रेक्षक प्रेयसीप्रमाणे असतात’

का होतंय आप्पांचं कौतुक?

मिलिंद यांनी व्हिडिओच्या कॅप्शनमध्ये दिलेल्या माहितीनुसार, किशोर यांच्या अंगात ताप होता, त्यांना बसताही येत नव्हतं तरी त्यांनी मालिकेचं शूटिंग अडून राहू नये म्हणून काम पूर्ण केलं. या वयातही त्यांच्या या जिद्दीचं, कामाप्रति असणाऱ्या निष्ठेचं कौतुक झालं.

मिलिंद यांनी हा व्हिडिओ शेअर करताना म्हटलं होतं की, ‘आप्पांच्या अंगात ताप होता, अंगात कणकण होती, थकवा आला होता, त्यांना बसता सुद्धा येत नव्हतं. त्यांना खूपच त्रास होत होता, गोळ्या औषध घेऊन सुद्धा दोन-तीन दिवस तो ताप उतरत नव्हता, कणकण थांबत नव्हती. पण ते शूटिंग करत होते कारण एपिसोड जायचा होता. आपण शूटिंग केलं नाही तर एपिसोड अडकेल. ‘आई कुठे काय करते’ यशस्वी होण्याचं एक कारण हे पण आहे की कलाकार जीव ओतून काम करतात. आपल्या कामावर अतोनात प्रेम करतात’.

हे वाचा-गायक जुबिन नौटियालला अटक करण्याची होतेय मागणी, होतोय विरोध

आप्पांविषयी मिलिंद पुढे म्हणतात की, ‘काही महिन्यांंपूर्वी किशोरजी एक सीन करत होते आणि त्यांच्या घरून फोन आला की त्यांच्या वडिलांचं निधन झालं आहे. सोलापूरला लगेच निघावं लागणार आहे. डायरेक्टर रवी करमरकर म्हणाले की आप्पा तुम्ही ताबडतोब निघा. पण आप्पांनी सीन पूर्ण करायचा निर्णय घेतला. वडिलांच्या निधनाची बातमी कळल्यानंतर एक विनोदी सीन करणं किती यातना देणारं असू शकतं याची कल्पना करणं खूप कठीण आहे.’

गेल्या जवळपास तीन वर्षांपासून ही मालिका प्रेक्षकांचे मनोरंजन करत आहे. या मालिकेने वेगळा चाहतावर्ग निर्माण केला आहे. याविषयी बोलताना मिलिंद या पोस्टमध्ये पुढे म्हणाले की, ‘या पावणेतीन वर्षांमध्ये बहुतेक सगळ्या कलाकारांनी आणि ‘आई कुठे काय करते’च्या टीम ने शारीरिक, मानसिक, कौटुंबिक समस्या बाजूला ठेवून खूप कठीण परिस्थितीमध्ये शूटिंग पूर्ण केलं आहे. बरं या गोष्टींचा बाऊ न करता, त्याची सहानुभूती न घेता, हे जे काय काम आहे ते प्रामाणिकपणे करत राहणे, कामालाच महत्त्व देl राहाणे. आपल्या मुळे ८० लोकांच्या युनिटला त्रास होऊ नये, त्यांचं नुकसान होऊ नये, हे एक खूप महत्त्वाचं कारण असतं.
हे सगळं हसत खेळत मस्ती करत चाललेलं असतं. हा जो बीटीएस BTS मी शूट केला आहे त्याच्याने तुम्हा प्रेक्षकांना थोडासा अंदाज येईल.’

या व्हिडिओच्या शेवटी मिलिंद म्हणतात की, ‘दुनिया मे रहना है तो काम कर प्यारे’. मिलिंद अनेकदा या सेटवरचे व्हिडिओ शेअर करतात. मात्र हा व्हिडिओ पाहून किशोर यांच्यावर कौतुकाचा वर्षाव होतो आहे. ‘तुम्ही भारी आहात’, ‘कमाल’, ‘म्हणून आम्ही एकही एपिसोड मिस करत नाही’इ. अशा विविध कमेंट्स या व्हिडिओवर आल्या आहेत.