अनेकदा वर्षा उसगावकर अडकल्यात वादाच्या भोवऱ्यात, सासऱ्यांनी केलं होतं प्रॉपर्टीतून बेदखल

मुंबई : मनोरंजन विश्वातील ज्येष्ठ अभिनेत्री वर्षा उसगावकर (Varsha Usgaonkar) यांनी ऑनलाईन मासे विकणाऱ्या वेब पोर्टलची जाहिरात केली आहे. त्या जाहिरातीवरून मोठा वादंग उठला आहे. वर्षा उसगावकर यांनी जाहिरातीत ‘बाजारात बऱ्याच वेळा कोळणींकडून माझी फसवणूक झाली आहे. बाजारातल्या पापलेटला इतका घाणेरडा वास येतो की, त्यावेळी मी हे पापलेट का घेतले, असे वाटून निराश झाले’ असं विधान केलं आहे. त्यावरून मच्छिमारांनी संताप व्यक्त केला आहे. यानंतर वर्षा यांनी व्हिडिओ शेअर करून समस्त कोळी बांधवांची हात जोडून माफी मागितली. तसेच कोणाच्याही भावना दुखावण्याचा त्यांचा हेतू नव्हता असंही त्या म्हणाल्या.

तर वर्षा उसगांवकरांना सडके मासे खाऊ घालू, बदनामी केल्यानं कोळी महिला संतापल्या

वर्षा उसगावकर आणि वाद

अर्थात वर्षा उसगावकर आणि वाद हे समीकरण नवीन नाही. वर्षा उसगावकर यांनी रवीशंकर शर्मा अर्थात प्रसिद्ध संगीतकार रवी यांचा मुलगा अजय शर्मा यांच्याशी लग्न केलं. संगीतकार रवी यांनी वर्षा आणि अजय हे दोघं आपला छळ करत असल्याचं एका मुलाखतीमध्ये सांगितलं होतं. त्यानंतर एकच गदारोळ उठला होता. वर्षा, त्यांचे पती आणि सासरे यांच्यातील वाद इतका विकोपाला गेला की त्यांना कोर्टाची पायरी चढावी लागली होती.

इतकंच नाही तर रवी यांनी त्यांच्या संपत्तीमधून या दोघांना बेदखल तर केलंच शिवाय आपल्या मृत्यूनंतरही त्या दोघांना बोलावण्यात येऊ नये अशी इच्छा व्यक्त केली होती. त्यांच्या इच्छेनुसार रवी यांचं २०१२ मध्ये निधन झाल्यानंतर त्याचं पार्थिव त्यांच्या मुलींकडे सोपवण्यात आलं.

आम्ही जर ठरवलं तर… वर्षा उसगांवकरांच्या कोळणींबाबतच्या वक्तव्यानंतर भडकले जयवंत वाडकर

सासऱ्यांच्या मृत्यूनंतर त्यांची संपूर्ण संपत्ती नणंदांनी हडप केल्याचा आरोप वर्षा आणि त्यांचा पतीनं केला होता. तर त्यांच्या नणंदांनी आपल्या वडिलांनी त्याचं राहते घर आपल्या नावावर केलं होतं. परंतु ते घर भावानं आणि त्याच्या बायकोनं हडप केल्याचा आरोप केला होता. हे प्रकरण कोर्टात गेलं. कोर्टानं दोन्ही बाजू ऐकून घेत संगीतकार रवी यांचं घर त्यांच्या मुलींना देण्याचा निर्णय जाहीर केला होता.

अभिनेत्री होण्यासाठी गाठली मुंबई

वर्षा उसगावकर यांचे वडील गोवा राज्याच्या विधानसभेचे उपसभापती होते. वर्षा यांना अभिनयाची आवड असल्यानं त्यांनी मुंबई गाठली. १९९० मध्ये त्यांनी दूरदर्शनसाठी ‘राणी लक्ष्मीबाई’ या मालिकेत राणी लक्ष्मीबाईची भूमिका साकारली. त्यानंतर त्यांचा अभिनय क्षेत्रातील प्रवास सुरू झाला. त्यांनी अनेक मराठी नाटकांमध्य़े, सिनेमांमध्ये काम केलं. त्यानंतर त्यांनी बॉलिवूडमध्येही काम केलं. वर्षा यांनी शिकारी, साथी, हनीमून, घर जमाई, तिरंगा, खलनायिका, इंसानियत के देवता, मुकदम,चेहरा यांसारख्या हिंदी सिनेमांत काम केलं. परंतु मराठीमध्ये ज्याप्रमाणं वर्षा यांना यश मिळालं तसं यश हिंदी सिनेमात मिळालं नाही. सध्या वर्षा उसगावकर स्टार प्रवाहवरून प्रसारित होणाऱ्या ‘सुख म्हणजे नक्की काय असतं’ मालिकेत नंदिनी यशवंत शिर्के ही भूमिका साकारत आहे.

कोळिणींवर केलेल्या वक्तव्यावर वर्षा उसगांवकरांनी मागितली माफी, हात जोडून म्हणाल्या..