समस्त भारतीयांना अभिमान वाटावा असे २ रेकॉर्ड विराट करणार, द्रविडचाही विक्रम मोडणार

मुंबई : विराट कोहलीने (Virat Kohli) आशिया कपमध्ये (Asia Cup) केलेल्या शानदार प्रदर्शनानंतर सगळ्यांच्या नजरा भारत विरुद्ध ऑस्ट्रेलिया (India vs Australia) यांच्यातील टी ट्वे्न्टी सामन्यांच्या मालिकेकडे लागल्या आहेत. या आगामी मालिकेत विराट कोहलीच्या नावावर दोन मोठ्या विक्रमांची नोंद होणार आहे. दिग्गज बॅट्समन राहुल द्रविडलाही विराट पिछाडीवर टाकेल.

कोहलीने ९८ रन्स करताच….

विराट कोहली टी ट्वेन्टी क्रिकेटमध्ये ११,००० धावा पूर्ण करण्यापासून फक्त 98 रन्स दूर आहे. ऑस्ट्रेलियाविरुद्धच्या टी ट्वेन्टी मालिकेत जर त्याने ९८ धावा केल्या तर टी ट्वेन्टी क्रिकेटमध्ये ११ हजार रन्स करणारा तो पहिला भारतीय फलंदाज ठरेल. कोहलीच्या नावावर सध्या ३४९ टी ट्वेन्टी सामन्यांमध्ये ४०.३७ च्या सरासरीने १० हजार ९०२ धावा आहेत, ज्यात ०६ शतके आणि ८० अर्धशतकांचा समावेश आहे. यादरम्यान विराट कोहलीचा स्ट्राइक रेट १३२.९५ इतका राहिलेला आहे. विराट कोहलीनंतर टीम इंडियाचा कर्णधार रोहित शर्मा टी-२० क्रिकेटमध्ये सर्वाधिक धावा करणाऱ्या भारतीय फलंदाजांच्या यादीत दुसऱ्या क्रमांकावर आहे. रोहित शर्माने आतापर्यंत खेळलेल्या ३९५ टी-२० सामन्यांमध्ये ३१.३४ च्या सरासरीने आणि १३३.८७ च्या स्ट्राइक रेटने १० हजार ४७० धावा केल्या आहेत. यादरम्यान त्याने ६ शतके आणि ७१ अर्धशतके केली आहेत.

विराट कोहली द्रविडलाही पिछाडीवर टाकणार

एवढंच नाही तर टी-२० क्रिकेटमध्ये ११ हजार रन्स करतानाच विराट कोहली भारतासाठी आंतरराष्ट्रीय क्रिकेटमध्ये सर्वाधिक रन्स करणारा दुसरा फलंदाज होण्याच्या उंबरठ्यावर आहे. विराट कोहलीने ६२ रन्स धावा केल्या तर तो राहुल द्रविडलाही मागे टाकेल. सध्या कोहलीने ४६८ सामन्यांमध्ये ५३.८१ च्या सरासरीने ७१ शतके आणि १२४ अर्धशतकांसह २३ हजार ९४० रन्स केले आहेत. द्रविडने भारतासाठी ५०४ सामने खेळले, त्यात त्याने ४५.५७ च्या सरासरीने एकूण २४ हजार २ रन्स केले आहेत.

भारत विरुद्ध ऑस्ट्रेलिया वेळापत्रक :

• पहिला टी ट्वेन्टी सामना- २० सप्टेंबर, मोहाली
• दुसरा टी ट्वेन्टी सामना- २३ सप्टेंबर, नागपूर
• तिसरा टी ट्वेन्टी सामना- २५ सप्टेंबर, हैदराबाद