आदिपुरुषवर भडकले ‘राम’, म्हणाले- धार्मिक भावनांची चेष्टा करू नका

मुंबई- प्रभास, क्रिती सेनन, सैफ अली खान यांच्या प्रमुख भूमिका, तगडं बजेट, व्हीएफएक्स इफेक्टची भव्यता आणि ओम राऊत याचं दिग्दर्शन यामुळे चर्चेत आलेला आदिपुरुष हा सिनेमा सध्या वादाने वेढला आहे. या सिनेमाच्या जेमतेम सव्वा मिनिटांच्या टीझरनंतर सिनेमातील व्यक्तिरेखांच्या लूकवरून जोरदार नाराजीनाट्य सुरू आहे. सोशल मीडियावर तर या सिनेमाच्या बायकॉट ट्रेंडनेही उसळी घेतली आहे.

धार्मिक संघटनांपासून राजकीय नेत्यांनीही या सिनेमाच्या प्रदर्शनाला विरोध केला. रामायण, महाभारत या मालिकेतील कलाकारांनीही आदिपुरुषवर तिखट प्रतिक्रिया दिली आहे. या सगळया प्रकरणात अनेकांचं लक्ष लागलं होतं ते रामायण या लोकप्रिय मालिकेतील रामाची भूमिका केलेले अभिनेते अरुण गोविल अजून काहीच का बोलत नाहीत. पण त्यांनीही आता मौन सोडून या सिनेमाच्या टीझरवर भाष्य केलंय.

३५ वर्षापूर्वी रामायण ही मालिका प्रचंड लोकप्रिय झाली होती. या मालिकेतील प्रत्येक पात्र हे प्रेक्षकांच्या मनात स्थान मिळवण्यात यशस्वी झालं होतं. यामध्येच आजही नाव घेतलं जातं ते राम ही भूमिका साकारलेले अभिनेते अरुण गोविल. राम असाच दिसत असणार अशी जणू प्रेक्षकांची धारणा झाली होती. अरुण गोविल जिथे जातील तिथे लोक त्यांना नमस्कार करत होते.

गेल्याच आठवड्यात विमानतळावर एका महिलेने अरुण गोविल यांना पाहून वाकून नमस्कार केल्याचा व्हिडिओ व्हायरल झाला होता. याला कारण होते ते रामायण मालिकेतील व्यक्तीरेखांचा अगदी खरा वाटणारा लूक. पण आता आदिपुरुष सिनेमातील रावण म्हणजे खिलजी, तालिबानी किंवा मुगल दिसत असल्याच्या प्रतिक्रियांमुळे आदिपुरुष सिनेमाविषयी रोष व्यक्त होत आहे.

आदिपुरुष सिनेमात रामाच्या भूमिकेत प्रभास तर सीतेच्या भूमिकेत क्रिती सेनन आहे. रावण ही व्यक्तीरेखा सैफ अली खान याने साकारली आहे. रामायण मालिकेतील व्यक्तीरेखांचा न पटणारा लूक हा सध्या वादाचा मुख्य विषय बनला आहे. आणि त्यामुळेच रामाच्या भूमिकेतून गाजलेले अरुण गोविल याविषयी काय बोलतात हे जाणून घेण्यासाठी अनेकांचे कान आतूर होते. खरंतर अरुण गोविल यांनी यापूर्वी प्रतिक्रिया देण्यास नकार दिला होता, पण त्यांनी त्यांच्या यूट्यूब चॅनेलवर एक व्हिडिओ शेअर करत या सिनेमाविषयी मौन सोडलं आहे.

अरुण गोविल या व्हिडिओमध्ये असं म्हणत आहेत की, रामायण, महाभारत हे ग्रंथ आपले धार्मिक ठेवा आहेत. संस्कृतीचा पाया आहेत. त्यामुळे या पायाला कुणी धक्का लावू शकत नाही. त्यांच्यासोबत काहीही छेडछाड करणं योग्य नाही. आदिपुरुष सिनेमामध्ये लिबर्टीच्या नावाखाली जर धार्मिक भावनांची चेष्टा केली जात असेल तर ते अत्यंत चुकीचं आहे. आपण आपल्या घराचा पाया हलवतो का? तसच या धार्मिक ग्रंथांमध्ये सांगितलेल्या गोष्टींच्या मुळाला धक्का लागणारी कलाकृती चांगली असू शकत नाही.