अरे देवा! ‘आदिपुरुष’मधील रामायणाच्या इस्लामीकरणावरील आरोपात ओम राऊतला लीगल नोटीस

मुंबई-आदिपुरूष सिनेमाचा आत्ता कुठे फक्त टीझर प्रदर्शित झाला आहे, तोपर्यंतच या सिनेमाला वादाचं ग्रहण लागलं आहे. रोज एक नवा वाद उफाळून येत आहे. या सिनेमातील सैफ अली खान साकारत असलेल्या रावणाचा लूक प्रेक्षकांना रूचला नसल्याच्या प्रतिक्रिया सोशल मीडियावर येत आहेत. रावणाचा लूक तालिबानी असल्याचं मत अभिनेता पुनीत इस्सार यांनी नुकतच व्यक्त केलं होतं, आता यालाच दुजोरा देणारा आरोप करत या सिनेमातून रामायणाचं इस्मालीकरण केलं जात असल्याचा आरोप ब्राह्मण महासभेने केला आहे. सात दिवसात माफी मागावी अशी मागणी करत महासभेने दिग्दर्शक ओम राऊतला कायदेशीर नोटीस पाठवली आहे.

१२ जानेवारी २०२३ ला आदिपुरूष हा सिनेमा प्रदर्शित होणार आहे. टीझर प्रदर्शित होताच या सिनेमातील व्यक्तीरेखा कशा दिसतात हे समोर आल्यानंतर वादाला सुरूवात झाली. सिनेमातील राम, हनुमान आणि रावण यांच्या लूकमुळे नाराजीचा सूर आहे. सिनेमातील वादग्रस्त दृश्य हटवली नाहीत तर कायदेशीर कारवाई करण्यासाठी पावले उचलली जातील असा इशाराही दिला आहे. आमदार राम कदम यांनीही याच मुद्द्यावरून या सिनेमाच्या प्रदर्शनाला रोखण्याचा इशारा दिला आहे.

ब्राह्मण महासभेचे अध्यक्ष पंडित सुरेश मिश्रा यांच्यावतीने वकील कमलेश मिश्रा यांनी ही नोटीस ओम राऊत याला पाठवली आहे. या नोटीसमध्ये असं म्हटलं आहे की, सिनेमात हिंदू देवदेवतांना चुकीच्या पद्धतीने दाखवण्यात आलं आहे. तसेच काही संवादही वादग्रस्त आहेत. यामुळे धार्मिक भावना दुखावल्या जाऊ शकतात. जातीय तेढ निर्माण करणारे सीनही या सिनेमात आहेत. रामायण हा हिंदूंचा इतिहास आहे. आदिपुरूष सिनेमात भगवान हनुमानला मोघलांप्रमाणे दाखवणं, रावणाला तालिबानी रूप देणं हे चुकीचं आहे.

नोटीसमध्ये असंही म्हटलं आहे की हिंदू हे मिशी शिवाय दाढी ठेवत नाहीत, पण हनुमान या रूपात सिनेमात दिसतो. या सिनेमातील प्रत्येक व्यक्तिरेखा ही इस्लामी दिसते. रावणाची भूमिका करणाऱ्या सैफ अली खानचा लूकही मुस्लिम वाटतो. धार्मिक भावनांशी खेळ करण्याचा प्रयत्न या सिनेमात करण्यात आला आहे. त्यामुळेच दिग्दर्शक ओम राऊत याने जाहीर माफी मागावी अन्यथा या सिनेमाविरोधात आंदोलन केले जाईल.