आधी चेहरा झाला खराब आता पुन्हा बिघडली २८ वर्षीय प्रसिद्ध गायकाची तब्येत, चाहते चिंतेत

मुंबई: ‘बेबी’ या गाण्याने एकेकाली भारतात धुमाकुळ घातला होता. हे गाणं गाणारा प्रसिद्ध गायक जस्टिन बीबरबाबतीत (Justin Bieber) एक महत्त्वाची बातमी समोर आली आहे. त्याने त्याचा जागतिक दौरा पुन्हा एकदा रद्द करण्याचा निर्णय घेतला आहे. एक लांबलचक पोस्ट शेअर करत गायकाने याविषयी माहिती दिली. गंभीर आजाराशी सामना करणारा हा जगप्रसिद्ध गायक पुन्हा एकदा वैद्यकीय अडचणींशी लढत आहे.

काही महिन्यांपूर्वी एक व्हिडिओ शेअर करत जस्टिनने तो झुंज देत असणाऱ्या गंभीर आजाराविषयी सांगितले होते. जस्टिन रामसे हंट सिंड्रोम (Ramsay Hunt Syndrome) या आजाराने त्रस्त होता, ज्यामुळे त्याचा अर्धा चेहरा पॅरालाइझ्ड झाला होता. त्याने व्हिडिओ (Justin Bieber Video) शेअर करत असे म्हटले आहे की काहीसा ब्रेक घेऊन त्याचे पुढील शो रद्द करणार आहे. यानंतर त्याने मोठा ब्रेक घेतला होता, मात्र त्यानंतर तो पुन्हा एकदा संपूर्ण जगाला त्याचं गाणं ऐकवण्यासाठी सज्ज झाला. त्याची भारतातही कॉन्सर्ट होणार होती. मात्र त्याच्या जगभरातील चाहत्यांना निराश करणारी बातमी पुन्हा एकदा समोर आली आहे.

हे वाचा-ऋषभ पंतनंतर आता पाकिस्तानी क्रिकेटपटूच्या प्रेमात उर्वशी? शेअर केलं रोमँटिक रील

जस्टिनने लांबलचक पोस्ट शेअर करत अशी माहिती दिली आहे की तो त्याचा जगभरातील दौरा रद्द करत आहे. या पोस्टमध्ये जस्टिन म्हणतो आहे की, ‘यावर्षी सुरुवातीला मी माझ्या रामसे हंट सिंड्रोम या आजाराविषयी जाहीरपणे सांगितले होते, ज्यात माझ्या चेहऱ्याचा काही भाग पॅरालाइझ्ड झाला होता. या आजारामुळे मला उत्तर अमेरिकेत जस्टिस टूर पूर्ण करता आली नव्हती. आराम केल्यानंतर आणि डॉक्टर, कुटुंबीय आणि टीमचा सल्ला घेतल्यानंतर मी टूर पूर्ण करण्यासाठी युरोपमध्ये गेलो. मी त्याठिकाणी ६ लाइव्ह परफॉर्मन्स दिले. पण त्याचा माझ्यावर खरोखर परिणाम झाला. गेल्या आठवड्यात मी रिओमध्ये परफॉर्म केलं आणि मी ब्राझिलच्या लोकांना माझ्याकडून जेवढं शक्य होईल तेवढं दिलं.’

जस्टिन पुढे म्हणाला की, ‘स्टेजवरुन उतरल्यानंतर मला खूप थकवा जाणवत होता आणि त्यावेळी मला जाणवले की मला आता माझ्या आरोग्याला महत्त्व द्यायला हवे. त्यामुळे मी काही काळासाठी विश्रांती घेणार आहे. मी ठीक होईन, पण मला एकदम बरं वाटण्यासाठी आराम करायला हवा.’ गायकाने त्याला नेहमी पाठिंबा देणाऱ्यांचेही या पोस्टमध्ये आभार मानले आहेत.

हे वाचा-महाकाल मंदिरात नतमस्तक झाला ‘ब्रह्मास्त्र’चा दिग्दर्शक; आलिया-रणबीरला नो एंट्री!

व्हिडिओ शेअर करत दाखवली होती परिस्थिती

जस्टिन बीबर याने जून महिन्यात एक व्हिडिओ शेअर करत त्याच्या आजाराची माहिती दिली होती. त्याने असे म्हटलं होते की, एका भयंकर व्हायरसमुळे तो या सिंड्रोमशी सामना करत आहे. हा व्हायरस त्याच्या चेहऱ्याच्या आणि कानांच्या नसांवर हल्ला करत आहे. त्यामुळे त्याचा चेहऱ्याला अर्धांगवायू झाला आहे. जस्टिनने या व्हिडिओमध्ये दाखवले होते की त्याला एका बाजूच्या डोळ्याची उघडझाप करता येत नाही नव्हती.

जस्टिन बीबर त्याच्या ‘जस्टिस’ या अल्बमच्या प्रमोशनसाठी जगातील विविध देशांमध्ये दौरा करत होता. यादरम्यानच त्याला हा आजार जडला होता. त्याची पत्नी हेली बीबरदेखील आजारी असल्याचे काही महिन्यांपूर्वी समोर आलेले. तिच्या मेंदूमध्ये रक्ताच्या गुठळ्या झाल्यामुळे रुग्णालयात दाखल करण्यात आले होते. आता जस्टिनने त्याला आरोग्यविषयक कारणासाठी ब्रेक हवा असल्याचे म्हटल्यानंतर चाहत्यांची चिंता वाढली आहे.