Video- आजोबांसमोर मासिक पाळीवर बोलली नव्या नंदा नवेली, सेक्शुअल हेल्थवर म्हणाली…

मुंबई : बॉलिवूडचे महानायक अमिताभ बच्चन (Amitabh Bachchan) यांची नात नव्या नंदा नवेली (Navya Nanda) भलेही सिनेविश्वापासून दूर आहे. परंतु सोशल मीडियावर नव्याचे असंख्य फॉलोअर्स आहेत. नव्या स्वतः उद्योजिका तर आहेच शिवाय ती अनेक सामाजिक कार्यातही सहभागी असते. विशेष करून महिलांच्या आरोग्याबाबत आणि त्यांच्या सक्षमीकरणासाठी नव्या काम करत आहे. अलिकडेच एका कार्यक्रमात नव्या आणि अमिताभ बच्चन सहभागी झाले होते. त्या कार्यक्रमात नव्यानं महिलांच्या आरोग्यवर तिची मते मांडली. यावेळी नव्यानं सेक्शुअल, रीप्रॉडक्टिव्ह हेल्थ आणि मासिक पाळी यावर मोकळेपणानं तिची मते मांडली.

काय म्हणाली नव्या

नव्यानं तिच्या मनोगतामध्ये महिलांच्या आरोग्यावर भाष्य केलं आहे. तिनं सांगितलं की, ‘आपल्या देशातील महिलांसमोर आरोग्य आणि स्वच्छता या दोन गोष्टींची मोठी आव्हाने आहेत. या महिलांसाठी अत्यावश्यक असलेल्या या दोन मुलभूत गरजा अजून पूर्णपणे त्यांना मिळत नाहीत. त्यासाठी अजूनही त्यांना संघर्ष करावा लागत आहे. या गोष्टींवर खुलेपणानं, मोकळेपणानं बोललं जात नाही. परंतु या गोष्टी मी माझ्या आजोबांच्या समोर मोकळेपणानं मांडू शकते. यामुळे या संदर्भात थोडाफार का होईना बदल घडायला लागला आहे. ही गोष्ट नक्कीच सकारात्मक आहे.

माासिक पाळीच्या काळात महिलांच्या शारीरिक तसंच मानसिक आरोग्याची काळजी घ्यायला हवी. त्या विषयावर बोलायचं नाही असं करणं योग्य नाही. या विषयावर कुटुंबातील सदस्यांनी, मित्र-मैत्रिणींनी मोकळेपणानं चर्चा करायला हवी. त्यातील अडचणींवर कशी मात करायची यावर मोकळेपणानं चर्चा करायला हवी.’

मासिक पाळीवर मोकळेपणानं बोला

नव्या पुढं म्हणाली की, ‘मासिक पाळी हा विषय आपल्याकडे निषिद्ध मानला जातो. त्यावर बोलणं टाळलं जातं. परंतु हळूहळू ही परिस्थिती बदलत आहे. लोकांचा यासंदर्भातील वैचारिक दृष्टीकोन बदलत चालला आहे. आज मी इथं स्टेजवर उभं राहून माझ्या आजोबांसमोर या विषयावर मोकळेपणानं बोलत आहे. ही गोष्ट नक्कीच बदलाकडे जाणारी आहे.’ नव्याच्या मते या विषयावर महिलांनी, तरुणींनी मोकळेपणानं एकमेकींशी बोलायला हवे.

मासिक पाळी हा कलंक आहे हा विचार आता मागे पडला आहे. हे महिलांनीच नाही तर पुरुषांनी देखील मान्य केलं आहे. ही गोष्ट नक्कीच स्वातार्ह असल्याचं मत नव्यानं व्यक्त केलं आहे. नव्या पुढं म्हणाली की, ‘समाजामध्ये महिलांनी सर्वात आधी स्वतःच्या शरीराबदद्ल कम्फर्टेबल असणं आवश्यक आहे. मी नशीबवान आहे, कारण ज्या कुटुंबामध्ये मी लहानाची मोठी झाले तिथं माझे विचार मी मोकळेपणानं मांडू शकते.’

नव्यानं सुरू केलंय पोडकास्ट

नव्याचा हा अंदाज तिथं उपस्थित असलेल्या सर्वांना आवडला. नव्यानं AARA हेल्थ संस्थेची सहसंस्थापिका आहे. काही दिवसांपूर्वी नव्यानं तिचं What The Hell Navya हे पोडकास्टही लाँच केलं आहे. त्यात नव्या तिची आई श्वेता नंदा बच्चन आणि जया बच्चन यांच्याशी विविध विषयांवर मोकळेपणानं बोलताना ऐकता येईल.