“यशस्वी वैवाहिक आयुष्यासाठी…”, आनंद महिंद्रांनी शेअर केला भन्नाट व्हिडीओ! म्हणाले, “शब्दांविना…”

महिंद्रा ग्रुपचे अध्यक्ष आनंद महिंद्रा हे त्यांच्या हटके ट्वीट्ससाठी नेहमीच चर्चेत असतात. राजकीय मुद्द्यांपासून करोनापर्यंत आणि अत्याधुनिक तंत्रज्ञानापासून कौटुंबिक समस्यांपर्यंत अशा सर्वच विषयांवर आनंद महिंद्रा ट्वीट करत असतात. स्पोर्ट्सवर देखील त्यांनी केलेले ट्वीट्स बरेच व्हायरल झाले आहेत. आता आनंद महिंद्रा यांनी केलेलं एक नवीन ट्वीट तुफान व्हायरल होत असून त्यातल्या व्हिडीओवर नेटिझन्सच्या देखील हटके प्रतिक्रिया येऊ लागल्या आहेत.

“५जी पेक्षाही अधिक पॉवरफुल”

आनंद महिंद्रांनी ट्वीट करताना एका ओळींमध्ये या व्हिडीओविषयी आपलं मत मांडलं आहे. “शब्दांविना केलेला संवाद हा ५जी तंत्रज्ञानापेक्षाही जास्त पॉवरफुल असतो”, असं आनंद महिंद्रांनी ट्वीटमध्ये म्हटलं आहे. यासोबत त्यांनी तो व्हिडीओ देखील ट्वीट केला आहे.

काय आहे व्हिडीओमध्ये?

या व्हिडीओमध्ये एक महिला किचनमध्ये भाजी कापताना दिसत आहे. तिच्या मागे एक पुरूष मोबाईलवर काहीतरी करताना दिसतोय. हे दोघे पती-पत्नी असल्याचं व्हिडीओमध्ये दिलेल्या कॅप्शनवरून समजतंय. पतीनं किचनमधलं काम थांबवल्याचं लक्षात येताच पत्नी जोरजोरात भाजी कापू लागते. ही बाब पतीला लक्षात येताच तो मोबाईल ठेऊन पुन्हा किचनमधील काम करू लागतो असं या व्हिडीओत दिसतंय. या व्हिडीओसोबत असलेल्या कॅप्शनमध्ये लिहिलंय, “एका यशस्वी वैवाहिक आयुष्यासाठी एकमेकांना समजून घेण्यासाठी तुम्हाला एकमेकांसोबत बोलण्याची गरज नसते”!