सृष्टी देशमुखचा जन्म २८ मार्च १९९६ रोजी भोपाळमध्ये झाला. तिच्या वडिलांचे नाव जयंत देशमुख तर आईचे नाव सुनीता देशमुख असे आहे. तिचे वडील जयंत देशमुख हे एका खासगी कंपनीत इंजिनीअर म्हणून कार्यरत आहेत. तर सृष्टीची आई सुनीता या खासगी शाळेत शिक्षिका आहे.
मध्य प्रदेशातील भोपाळ येथे राहणाऱ्या सृष्टीने इंटरमिजिएटनंतर इंजिनीअरिंगला प्रवेश घेतला होता. ती मध्य प्रदेशातील भोपाळ येथील कस्तुरबा नगर येथील रहिवासी आहे. कारमेल कॉन्व्हेंट स्कूल भेल भोपाळमधून तिचे शालेय शिक्षण पूर्ण केले.
इंजिनीअरिंगच्या तिसऱ्या वर्षाला असताना सृष्टीच्या मनात सरकारी अधिकारी बनण्याची इच्छा निर्माण झाली. आपण आयुष्यभर इंजिनीअरची नोकरी करायची का? असा प्रश्न तिला पडू लागला. यानंतर तिने यूपीएससीची तयारी करण्याचा निर्णय घेतला. इंजिनीअरिंगच्या तिसऱ्या वर्षापासूनच तिने यूपीएससीची तयारी सुरू केली.
ग्रॅज्युएशन पूर्ण केल्यानंतर तिने परीक्षेची तयारी आणखी मजबूत केली आणि पहिल्याच प्रयत्नात परीक्षा उत्तीर्ण झाली. २०१८ मध्ये तिने यूपीएससी परीक्षा दिली आणि पहिल्याच प्रयत्नात पाचवा क्रमांक मिळवून आयएएस बनली. २०१८ बॅचची आयएएस अधिकारी सृष्टी जयंत देशमुखची पहिली पोस्टिंग मध्य प्रदेशातील दिंडोरी येथे सहाय्यक जिल्हाधिकारी म्हणून झाली. आता नुकतीच सृष्टी देशमुखची मध्य प्रदेशातील नरसिंगपूर जिल्ह्यातील गादरवाडा येथील उपविभागीय अधिकारी या पदावर बदली करण्यात आली आहे.
यूपीएससी परीक्षेत यश मिळवायचे असेल तर नकारात्मक लोकांपासून दूर राहिले पाहिजे, असे सृष्टीचे मत आहे. तयारी दरम्यान असे लोक तुम्हाला डिमोटिव्हेट करण्याचा प्रयत्न करतील, ज्यामुळे तुमच्या कामगिरीवर परिणाम होईल असेही ती सांगते.