आयएएस तपस्या परिहारचा जन्म २२ नोव्हेंबर १९९२ रोजी मध्य प्रदेशातील नरसिंगपूर येथील एका गावात झाला. तपस्याने तिचे शालेय शिक्षण केंद्रीय विद्यालयातून पूर्ण केले आणि त्यानंतर इंडियन लॉ सोसायटीच्या लॉ कॉलेज, पुणे येथून कायद्याचे शिक्षण घेतले. कायद्याचे शिक्षण पूर्ण केल्यानंतर तपस्याने केंद्रीय लोकसेवा आयोग म्हणजेच यूपीएससी परीक्षा देण्याचा निर्णय घेतला आणि तयारी सुरू केली.
तपस्याला पहिल्याच प्रयत्नात अपयश आले होते. त्यानंतर तिने कठोर परिश्रम केले आणि सेल्फ स्टडीवर विशेष लक्ष केंद्रित करत यूपीएससी परीक्षेत यश मिळवले. तपस्या परिहारचे वडील, मध्य प्रदेश (मप्र) मधील नरसिंगपूर येथील रहिवासी असून ते शेतकरी आहेत.
मिळविला २३ वा क्रमांक
आयएएस तपस्याचे वडील विश्वास परिहार हे शेतकरी आहेत. त्याचबरोबर तिचे काका विनायक परिहार हे सामाजिक कार्यकर्ते आहेत. तपस्याने घरी राहून यूपीएससी परीक्षेची तयारी पूर्ण केली. तिला घरच्यांचा पूर्ण पाठिंबा मिळाला. तपस्या परिहारने दुसऱ्या प्रयत्नात अभ्यास सुरू केला तेव्हा तिने शक्य तितक्या नोट्स बनवून मॉडेल पेपर सोडवला. पहिल्याच प्रयत्नात अपयशी ठरल्यानंतर तपस्याने आपली रणनीती बदलली. त्याचा तिला फायदाही झाला. सरतेशेवटी, तपस्याला तिच्या मेहनतीचे फळ मिळाले आणि तिने नागरी सेवा परीक्षा २०१७ मध्ये अखिल भारतीय २३ वा क्रमांक मिळवला. आयएएस तपस्या परिहारचा विवाह आयएएफएस गरवित गंगवार यांच्याशी झाला होता.