HSC Result 2022: बारावी परीक्षेचे उत्तरपत्रिका संकलन ठप्प! एसटी संपाचा फटका

माध्यमिक व उच्च माध्यमिक शिक्षण मंडळातर्फे दहावी, बारावींच्या लेखी परीक्षा सुरू आहेत. बारावीचे पेपर चार मार्च तर, दहावी पेपर १५ मार्चपासून सुरू झाले. याच दरम्यान राज्यातील एसटी कर्मचाऱ्यांचा संप असल्याने एसटी बंद आहेत. परीक्षेचे होम सेंटर असल्याने परीक्षार्थी विद्यार्थ्यांना मोठ्या प्रमाणात अडचणी आल्या नाहीत. मात्र, आता परीक्षा झाल्यानंतर उत्तरपत्रिका तपासणीत संप अडचणीचा ठरतो आहे. तपासणीकांकडून जमा होणाऱ्या उत्तरपत्रिका मंडळ कार्यालयात कशा पोहचवायच्या असा प्रश्न अनेक मॉडरेटरांना पडला आहे.

एसटी बंद असल्याने आणि प्रवासाची साधने व उपलब्धता कमी आहे. अशा परिस्थितीत शिक्षकांनी तपासलेल्या उत्तरपत्रिका जमा करणे व मंडळाकडे जमा करणे अडचणी ठरत असल्याचे अनेक शिक्षक मॉडरेटरांनी सांगितले. उत्तरपत्रिकांचे गठ्ठे नेण्यासाठी खासगी वाहने किंवा इतर वाहनांची व्यवस्था करावी लागते आहे. पेपर संपला की, दुसऱ्या दिवसापासून तपासणीची प्रक्रिया सुरू होते. कस्टोडियनच्या नियंत्रणाखाली उत्तरपत्रिकांचे वितरण होते. कस्टडीतून मॉडरेटरांकडे उत्तरपत्रिका तपासणीसाठी दिल्या जातात. त्यांच्याकडून तपासणीकांकडे जाते. तपासणीकांडून पुन्हा मॉडरेटरकडे उत्तरपत्रिका येतात व मॉडरेटर विषय शिक्षकांकडून जमा झालेल्या उत्तरपत्रिका विभागीय मंडळ कार्यालयात जमा करतात.

SSC Result 2022: दहावी, बारावी परीक्षेच्या उत्तरपत्रिकांचे गठ्ठे पडूनच

विभागात २२ लाख उत्तरपत्रिका

विभागात दहावी, बारावीच्या तपासणीसाठी असलेल्या उत्तरपत्रिकांची संख्या सुमारे २१ लाख २८ हजार ३३८ एवढी आहे. विभागातून दहावीला परीक्षेला बसलेल्या विद्यार्थ्यांची संख्या १ लाख ८५ हजार ४३४ तर, बारावीला १ लाख ६९ हजार २८९ विद्यार्थ्यांनी नोंदणी केली आहे. दहावीची परीक्षा २ हजार ४४७ शाळांमधून देत आहेत. बारावीची परीक्षा विद्यार्थी १ हजार २६३ उच्च माध्यमिक, कनिष्ठ महाविद्यालयातून देत आहेत. लातूर विभागात दहावीची परीक्षा १ लाख १० हजार ३९२ तर बारावीची परीक्षा ९२ हजार ३३ विद्यार्थी देत आहेत. मराठवाड्यात उत्तरपत्रिकांची संख्या ३५ लाखांपेक्षा अधिक असल्याचे अधिकारी सुत्रांनी सांगितले. या उत्तरपत्रिकांच्या नियोजनाच्या प्रक्रियेवर परिणाम झाला आहे.

शिक्षक मंडळात; निकाल लांबणार!

विनाअनुदानित शिक्षकांनी उत्तरपत्रिकेवर टाकलेला बहिष्कार आणि त्यासह आता एसटी बंदचा बसलेला फटका यामुळे निकाल लांबणीवर पडणार का, असा प्रश्न उपस्थित झाला आहे. उत्तरपत्रिकांचे संकलन एसटी बंदमुळे काहीसी विस्कळीत झाले आहे. याबाबत कनिष्ठ महाविद्यालयीन शिक्षक संघटनेच्या पदाधिकाऱ्यांनी मंडळ सचिवांची भेट घेतली. उत्तरपत्रिका संकलनाच्या अडचणी मांडत उत्तरपत्रिका संकलनाचे काम मंडळाने जिल्हा, तालुकास्तरावर करावे अशी मागणी केली.

औरंगाबाद विभाग दहावीचे विद्यार्थी १,८५,४३४

लातूर विभाग दहावीचे विद्यार्थी १,१०,३९२

औरंगाबाद विभाग बारावीचे विद्यार्थी १,६९,२८९

लातूर विभाग बारावीचे विद्यार्थी ९२,०३३

एकूण उत्तरपत्रिका ३५ लाखांपेक्षा अधिक

दहावीचा विज्ञान-तंत्रज्ञान – २ विषयाचा पेपर फुटला? अवघ्या ५०० रुपयांना मिळाली प्रश्नपत्रिका

एसटी बंदमुळे काही ठिकाणी शिक्षकांना उत्तरपत्रिका वेळेत पोहचण्याचा काहीसा प्रश्न निर्माण झाला आहे. जिल्हास्तरावर संकलन करणे शक्य नाही. कारण उत्तरपत्रिका ठराविक दिवशीच मिळतील असे नसते. विषयनिहाय त्याची प्रक्रिया असते. त्यामुळे ते शक्य नाही. याबाबतची चाचपणी आम्ही केली आणि इतर काय करता येईल याचा विचारही करतो आहोत, परंतु यामुळे निकाल लांबेल असे वाटत नाही.

आर. पी. पाटील, विभागीय सचिव, माध्यमिक व उच्च माध्यमिक शिक्षण मंडळ, औरंगाबाद.

ISC ICSE बोर्ड परीक्षा 2022: परीक्षेपूर्वी बोर्डाने जारी केली मार्गदर्शक तत्त्वे; ‘या’ गोष्टी लक्षात ठेवा