धक्कादायक! एड्सबाधित मुलाला शाळेत प्रवेश नाहीच

म. टा. प्रतिनिधी, औरंगाबाद

निवेदन, विनंत्या, उपोषण, निषेध नोंदवूनही बीड जिल्ह्यातील पाली गावातील एड्सबाधित पालकांच्या मुलाच्या शाळा प्रवेशाचा प्रश्न अद्यापही अनुत्तरित आहे. या मुलाचा शाळेतील प्रवेश कायम राहावा, ही मागणी घेऊन पालीच्या ‘आनंदग्राम’चे संचालक दत्ता बारगजे यांचे नऊ दिवसांच्या उपोषणानेही यंत्रणेला फरक पडला नाही. परिणामी शाळेत प्रवेश असूनही हा मुलगा शिक्षणापासून वंचित आहे.

नेटकऱ्यांनी या घटनेचा सोशल मीडियावर तीव्र शब्दांमध्ये निषेध नोंदवून शिक्षण विभाग व यंत्रणेवर ताशेरे ओढले. पाली गावातील या मुलाला शाळेत येण्यास मनाई करण्यात आली आहे; त्याचप्रमाणे गावाचे सरपंच, प्रतिष्ठित नागरिकांनी संबंधित मुलाच्या आईला मुलाला शाळेत पाठवू नका, असा धमकीवजा इशारा दिला आहे. शाळा प्रशासनानेही या बाबीला विरोध केला नाही.

संबंधित मुलाची आई आणि वडील एड्सबाधित आहेत. त्याची आई आनंदग्राम संस्थेत काम करते, तर वडील चालक आहेत. या मुलाला एड्स नाही. ‘आनंदग्राम’चे दत्ता बारगजे यांनी मुलाचा निगेटिव्ह रिपोर्ट दाखवला. मात्र, संपूर्ण कुटुंबाचा रिपोर्ट निगेटिव्ह असल्याचे रिपोर्ट दाखवा, असे शाळा प्रशासनाचे म्हणणे होते. त्यानंतर मुलाच्या शिक्षणासाठी आईने शिक्षण विभागाकडे धाव घेऊन शिक्षणाधिकाऱ्यांच्या दालनात मुलाची शाळा भरवली; तसेच लेखी निवेदन दिले. त्यावर समितीची स्थापना करण्यात आली. संबंधित शाळेतील पालकांनी ‘या मुलाला शाळेत ठेवाल तर आम्ही आमच्या मुलाला शाळेतून काढू,’ अशी भूमिका घेतली होती, त्यानंतर बारगजे यांनी मुलाला शाळेत प्रवेश मिळावा यासाठी जिल्हाधिकारी कार्यालयासमोर सुमारे नऊ दिवस आंदोलन केले.

महापालिकेच्या २९ शाळा मुख्याध्यापकांविना
विद्यार्थ्यांना पंचतंत्र शिकवा, अमित शाह यांचा शिक्षकांना सल्ला
बालहक्क आयोगाला जुमानले नाही या घटनेची दखल घेत राज्य बालहक्क संरक्षण आयोगाने २७ ऑगस्टला पालीला भेट दिली. ग्रामस्थ, सरपंच, शिक्षणाधिकारी, शाळाचालक, महिला व बालविकास अधिकारी व इतर पालकांशी चर्चा केली. एड्सबाबतीत असणारे गैरसमज दूर होऊन अशा केसेसमध्ये बालकांवर अन्याय होणार नाही याबाबत दक्षता घेण्याची सूचना केली. गणेशोत्सव, नवरात्रात प्रबोधन करणारे जनजागृतीपर उपक्रम प्रशासन व ग्रामस्थांनी राबवून याबाबत समाजातील गैरसमज दूर करण्यासाठी प्रयत्न करावेत, असे आवाहन केले. मात्र, ही भेटही पालकांचे मत बदलू शकली नाही, असे सांगण्यात आले.

शाळेने संबंधित मुलाला अजून काढले नसले तरी ‘शाळेत ये’ असेही म्हटलेले नाही. या शाळाबाह्य मुलास इतर कोणती शाळा मुलाला सन्मानाने स्वीकारत असेल, तर संबंधित शाळेने आमच्याशी संपर्क साधावा.
– दत्ता बारगजे, आनंदग्राम संस्था

‘शाळांमध्ये व्यवस्थापन समिती स्थापन करा’