रोहित शर्माबरोबर वाद, सर्वात वाईट फॉर्म, तरीही रिषभ पंत संघात कसा, जाणून घ्या एकमेव कारण…

नवी दिल्ली : रिषभ पंत सध्याच्या घडीला वाईट फॉर्मात आहे. त्याचबरोबर कर्णधार रोहित शर्माबरोबर त्याचा वाद झाल्याचेही पाहायला मिळाले होते. पण तरीही पंतला भारताच्या ट्वेन्टी-२० विश्वचषकाच्या संघात का स्थान देण्यात आले, याचे एकमेव कारण आता समोर आले आहे.

आशिया चषक स्पर्धेत पंत आणि रोहित यांच्यामध्ये वाद झाल्याचे पाहायला मिळाले होते. कारण आशिया चषकातील महत्वाच्या सामन्यात पंतने विकेट आंदण दिली होती आणि त्यानंतर रोहित शर्माने त्याला ड्रेसिंग रुममध्ये चांगलेच झापले होते. त्यानंतर पुढच्याच सामन्यात रोहितने रिषभ पंतला डावलून हार्दिक पंड्याला संधी दिली होती. त्यावेळी हा संघातील वाद चव्हाट्यावर आला होता. आशिया चषक स्पर्धेतील एकाही सामन्यात पंतला चांगली फटकेबाजी करता आली नाही. पण तरीही त्याला विश्वचषकाच्या संघात स्थान का देण्यात आले, याचे एकमेव कारण आता समोर आले आहे.

बीसीसीआयच्या सूत्रानी सांगितले की, ” भारतीय संघाच्या निवडीपूर्वी रिषभ पंतच्या जागी संजू सॅमसनचा १५ सदस्यीय संघात समावेश करण्याबाबत बरीच चर्चा होती, पण राजस्थान रॉयल्सचा कर्णधार संजू हा ट्वेन्टी-२० संघात नसल्याचेच समोर आले. त्याचबरोबर पंतला जर संघातून काढले तर एकही डावखुरा फलंदाज टीममध्ये दिसत नाही. संघात एक तरी डावखुरा फलंदाज असायला हवा, हे एकमेव कारण पंतच्या पारड्यात पडले. कारण पंत जेव्हा फॉर्मात येतो तेव्हा तो एकहाती सामना फिरवू शकतो. त्यामुळे त्याची निवड विश्वचषकासाठी करण्यात आली.”

भारतीय संघात तीन फिरकीपटूंना का संधी दिली, पाहा…
भारताने हा संघ निवडताना युजवेंद्र चहल, अक्षर पटेल आणि आर. अश्विन हे तीन फिरकीपटू खेळवण्यात आले आहेत. त्याचबरोबर दीपक हुडाही फिरकी गोलंदाजी करू शकतो. फिरकी गोलंदाजी करत असताना कमी वेळ लागतो. त्यामुळे जर संघात किमान दोन फिरकीपटू आणि एक फिरकी अष्टपैलू असला तर संघाला बराच वेळ वाचवता येऊ शकतो. त्यामुळे विश्वचषकाच्या संघात एकंदरीत चार फिरकीपटू ठेवण्यात आले आहेत. त्यामुळे भारतीय संघाचा पराभव टाळण्यासाठी रोहित शर्माने एक चांगली खेळी खेळल्याचे यावेळी पाहायला मिळाले आहे.