राजू श्रीवास्तव यांचा मृत्यू कसा झाला, सगळं ठीक होत असताना अचानक काय झालं?

आपल्या कॉमेडीने जगाला हसायला लावणारे राजू श्रीवास्तव आता आपल्यात नाहीत. दिल्लीच्या एम्समध्ये ४२ दिवस आयुष्याची लढाई लढल्यानंतर बुधवारी २१ सप्टेंबर रोजी सकाळी त्यांचे निधन झाले. १० ऑगस्ट रोजी हृदयविकाराच्या झटक्याने राजू श्रीवास्तव यांना एम्समध्ये दाखल करण्यात आले होते. तेव्हापासून ते कोमात होते आणि आयसीयूमध्ये व्हेंटिलेटरवर होते. दरम्यानच्या काळात त्यांच्या शरीराची अनेकवेळा हालचाल झाली होती, पण त्यांना शुद्ध कधी आली नाही. राजू श्रीवास्तव यांच्या निधनाच्या वृत्ताने सिनेसृष्टीत आणि त्यांच्या चाहत्यांमध्ये दु:खाचे वातावरण निर्माण झाले आहे. यावेळी राजू श्रीवास्तव यांच्या कुटुंबावर शोककळा पसरली आहे. गुणी अभिनेता एक दिवस डोळे उघडतील, शुद्धीत येतील आणि सर्वांना पुन्हा गजोधर म्हणून हसवतील, अशी आशा प्रत्येक दिवस, प्रत्येक क्षणाला होती. पण हे होऊ शकले नाही.

डॉक्टरांनी त्यांना ब्रेन डेड घोषीत केले

राजू श्रीवास्तव यांच्या निधनाच्या बातमीने सर्वांनाच धक्का बसला आहे, कारण मध्ये त्यांच्या प्रकृतीत सुधारणा होत असल्याचे कुटुंबीयांकडून सांगण्यात येत होतं. दरम्यान, डॉक्टरांनी त्यांना ब्रेन डेड घोषीत केले होते. काही दिवसांपूर्वी त्यांना खूप ताप आला होता, शरीरात इन्फेक्शन झाल्याचीही चर्चा होती. डॉक्टरांनी राजू यांच्या डोक्याचे सीटी स्कॅन केले तेव्हा मेंदूच्या एका भागात सूज दिसून आली.

हृदयाच्या मोठ्या भागात १०० टक्के ब्लॉकेज

१५ दिवसांनंतर बातमी आली की राजू यांनी त्यांचा एक पाय हलवला होता परंतु ते शुद्धीवर आले नव्हते. त्यांचा मेंदू कोणताही प्रतिसाद देत नव्हता. राजू यांची एम्समध्ये अँजिओप्लास्टी करण्यात आली, ज्यामध्ये हृदयाच्या मोठ्या भागात १०० टक्के ब्लॉकेज दिसून आले. राजू यांच्या पश्चात पत्नी शिखा, मुलगी अंतरा, मुलगा आयुष्मान, मोठा भाऊ सीपी श्रीवास्तव, धाकटा भाऊ दीपू श्रीवास्तव, पुतण्या मयंक आणि मृदुल असा परिवार आहे. त्यांचे संपूर्ण कुटुंब दिल्लीतच आहे.

मेंदूला ऑक्सिजन पुरवठ्याची समस्या

राजू श्रीवास्तव एम्समधील नामांकित डॉक्टरांच्या टीमच्या देखरेखीखाली होते. त्यांच्या मृत्यूचे सर्वात मोठे कारण म्हणजे ऑक्सिजनचा पुरवठा त्यांच्या मेंदूला होत नव्हता. डॉक्टरांना अशी आशा होती की सतत मॅन्युअल ऑक्सिजन पुरवठा केल्याने मेंदूच्या पेशी स्वतःच कार्य करण्यास सुरवात करतील परंतु तसे झाले नाही. राजू श्रीवास्तव यांच्या प्रकृतीबाबत सातत्याने अपडेट्स येत होते आणि त्यांच्या शरीराच्या काही भागात हालचाल होत असल्याचे सांगण्यात येत होते.

राजू श्रीवास्तव यांच्या हृदयात समस्या होती

अलीकडे, त्यांच्या पीआर टीमकडून सांगण्यात आले होते की डॉक्टरांनी राजू यांच्या तब्येतीची माहिती देताना सांगितले होते की ते आठवडाभरात शुद्धीवर येईल, परंतु असं काही झालं नाही. या दरम्यान, त्यांचे चाहते आणि प्रियजन दररोज त्यांच्या आरोग्यासाठी प्रार्थना करत होते. मीडिया रिपोर्टनुसार असे सांगण्यात आले की, ब्रेन डेड होण्यासोबतच त्यांचे हृदयही काम करत नसल्याचे डॉक्टरांनी सांगितले होते. याबद्दलची अधिकची माहिती डॉक्टरांनी त्यांच्या कुटुंबियांना दिली.

राजू श्रीवास्तव यांच्या डोक्याची नस दबली गेली होती

राजू श्रीवास्तव कामानिमित्त १० ऑगस्ट रोजी दिल्लीत होते. दररोजप्रमाणे ते हॉटेलमध्ये ट्रेडमिलवर कसरत करत होते आणि याच दरम्यान त्यांना हृदयविकाराचा झटका आला आणि ते बेशुद्ध झाले. त्यांना तातडीने दिल्लीतील एम्समध्ये दाखल करण्यात आले. इस्पितळात दाखल झाल्यापासून ते व्हेंटिलेटरवर होते आणि त्यांच्या मेंदूने काम करणं बंद केल्याचं सांगण्यात आलेलं. उपचारादरम्यान डॉक्टरांनी दोन स्टेंट लावले होते. यानंतर १३ ऑगस्ट रोजी एमआरआयमध्ये राजू श्रीवास्तव यांच्या डोक्याची एक नस दबली गेल्याचे सांगण्यात आले होते.

अनेक अवयव निकामी होणे

डॉक्टरांच्या वतीने राजू श्रीवास्तव यांच्या मृत्यूचे कारण मेंदूपर्यंत ऑक्सिजन न पोहोचणे असं सांगण्यात आलं. याचमुळे मल्टिपल ऑर्गन फेल्युअर असेही सांगितले जात आहे. मल्टिपल ऑर्गन फेल्युअर म्हणजे शरीराचे दोनपेक्षा जास्त अवयव काम करणं थांबतात. याला मल्टिपल ऑर्गन डिसफंक्शन सिंड्रोम असेही म्हणतात जे बहुतेकदा प्राणघातक ठरते आणि राजू श्रीवास्तव यांच्याबाबतीतही असेच घडले.

राजू श्रीवास्तव यांना आधीच हृदयविकाराचा त्रास होता

रिपोर्टनुसार, राजू श्रीवास्तव यांना आधीच हृदयविकाराचा त्रास होता. १० वर्षांपूर्वी त्यांना हृदयविकारामुळे पहिल्यांदा मुंबईतील कोकिलाबेन इस्पितळात दाखल करण्यात आले होते आणि दुसऱ्यांदा सात वर्षांपूर्वी हृदयविकारामुळे त्यांना मुंबईतील लीलावती इस्पितळात दाखल करण्यात आल्याचे वृत्त आहे. असे म्हटले जाते की, डॉक्टरांनी राजू यांना हेवी वर्कआउट टाळावं, असा कोणताही सल्ला दिला नव्हता. ज्या दिवशी ते वर्कआउट करताना बेशुद्ध पडले, त्या दिवशी ते सर्वसामान्य माणसासारखेच होते. त्यांना कोणताही त्रास नव्हता.

मुलगी अंतरा वडिलांच्या तब्येतीबाबत काय म्हणाली होती-

राजू श्रीवास्तव यांना इस्पितळात दाखल करण्यात आले तेव्हा त्यांची मुलगी अंतरा श्रीवास्तव म्हणाली, ‘माझे वडील कामानिमित्त अनेकदा दिल्ली आणि देशभरातील इतर शहरांमध्ये जातात. ते रोज जिममध्ये वर्कआउट करतात. हा त्यांचा दिनक्रमच आहे. ते पूर्णपणे बरा होते. हे जे घडले त्यानंतर आम्ही सारेच हैराण आहोत. त्यांच्या प्रकृतीत हळूहळू सुधारणा होत आहे. आम्ही आशा करतो की ते लवकरच बरे होतील. त्यानंतर अंतरा म्हणाली की संपूर्ण वैद्यकीय टीम आपले सर्वोत्तम देत आहे.