आता आयपीएलमध्ये १५ खेळाडूंसह मैदानात उतरणार संघ! बीसीसीआयच्या नियमांमध्ये मोठा बदल

नवी दिल्ली : पुढच्या वर्षी होणाऱ्या आयपीएलमध्ये आता नवीन नियम पाहायला मिळू शकतात. कारण बीसीसीआयने ट्वेन्टी-२० क्रिकेटमध्ये आता काही मोठे बदल करायला सुरुवात केली आहे. या नियमानुसार आता प्रत्येक संघ ११ नाही तर १५ खेळाडू घेऊन मैदानात उतरणार आहेत.

सध्याच्या घडीला स्थानिक क्रिकेटमध्ये हे बदल पाहायला मिळतील आणि आयपीएल सुरु होईपर्यंत हे नियम चाहत्यांना पूर्णपणे समजलेले असतील. त्यानंतर हे नवीन नियम आयपीएलमध्येही पाहायला मिळू शकतात. बीसीसीआय पुढील महिन्यात सुरू होणाऱ्या देशांतर्गत ट्वेन्टी-२० स्पर्धेतील सय्यद मुश्ताक अली ट्रॉफीमध्ये नवा प्रयोग करणार आहे. बीसीसीआय या स्पर्धेतून प्रभावशाली खेळाडूंचा नवा नियम लागू करणार आहे. जर हा नियम देशांतर्गत स्पर्धांमध्ये पूर्णपणे यशस्वी झाला, तर IPL 2023 मध्येही त्याची अंमलबजावणी केली जाईल. या नियमानुसार, सामन्यादरम्यान संघांतील खेळाडू बदलला जाऊ शकतो.

बीसीसीआय या नियमाबाबत पूर्णपणे गंभीर असून त्यांनी सर्व राज्य क्रिकेट बोर्डांना याबाबत परिपत्रक पाठवले आहे. या परिपत्रकात म्हटले आहे की, “ज्या गतीने ट्वेन्टी-२० क्रिकेट लोकप्रिय होत आहे, ते पाहता या खेळात काही नवीन गोष्टी आणणे आवश्यक आहे. क्रिकेटच्या या फॉरमॅटमध्ये नवीन गोष्टी आल्याने ते अधिक आकर्षक होईल.”

इम्पॅक्ट प्लेअरच्या नव्या नियमांनुसार सामन्यात अतिरिक्त खेळाडूंची भूमिका महत्त्वाची ठरणार आहे. त्यामुळे सामन्यादरम्यानही संघांना त्यांच्या रणनीतीत बदल करून परिस्थितीनुसार योजना तयार करता येणार आहेत. या नवीन नियमांनुसार, जेव्हा नाणेफेक होईल, तेव्हा त्यादरम्यान दोन्ही संघांना त्यांच्या प्लेइंग इलेव्हनला तसेच चार पर्यायी खेळाडूंचा पर्याय सांगावा लागेल, त्यापैकी फक्त एक खेळाडू प्रभावशाली खेळाडू म्हणून वापरला जाऊ शकतो. जरी संघ त्याच्या प्रभावशाली खेळाडूचा वापर करतो की नाही हे आवश्यक नाही.

दुसरीकडे, कोणत्याही डावाचे १४ वे षटक पूर्ण होण्यापूर्वी कधीही प्रभाव पाडणारा खेळाडू वापरला जाऊ शकतो. याशिवाय, जर एखाद्या प्रभावशाली खेळाडूने संघात जागा घेतली तर तो संपूर्ण सामन्यातून बाहेर जाईल आणि कोणत्याही परिस्थितीत त्या सामन्याच्या मैदानावर परत येऊ शकणार नाही. हे पहिल्यांदाच एखाद्या गेममध्ये लागू केले जात आहे असे नाही. क्रिकेटपूर्वी, फुटबॉल, रग्बी आणि बास्केटबॉल सारख्या खेळांमध्ये प्रभावशाली खेळाडूचा नियम आधीपासूनच आहे, ज्यामध्ये संघ केवळ सामन्यादरम्यानच खेळाडू बदलू शकतो. त्यामुळे आता ट्वेन्टी-२० क्रिकेटची रंगत अजून वाढणार असल्याचे दिसत आहे.