मुकेश अंबानी यांचं आणखी एक मोठं पाऊल, ही परदेशी कंपनी खरेदी करणार

Mukesh Ambani : मुकेश अंबानी यांची कंपनी रिलायन्स इंडस्ट्रीज लिमिटेड आणखी एक कंपनी विकत घेणार आहे. जर्मन रिटेलर मेट्रो एजीचा भारतातील कॅश अँड कॅरी व्यवसाय 500 दशलक्ष युरो (4,060 कोटी) मध्ये खरेदी करण्यासाठी सज्ज आहे. करार पूर्ण झाल्यामुळे, METRO AG 2014 मध्ये फ्रेंच कॅरेफोर नंतर भारतातील कमी-मार्जिन B2B व्यवसायातून बाहेर पडणारा दुसरा बहुराष्ट्रीय किरकोळ विक्रेता बनेल. 2020 मध्ये, ई-कॉमर्स दिग्गज फ्लिपकार्ट समूहाने वॉलमार्ट इंडियाच्या घाऊक व्यवसायात 100% हिस्सा विकत घेतला, जो बेस्ट प्राइस कॅश आणि कॅरी ट्रेडिंग व्यवसाय चालवतो.

गेल्या काही महिन्यांपासून रिलायन्स इंडस्ट्रीज लिमिटेड आणि मेट्रो यांच्यात चर्चा सुरू आहे. कंपनीने गेल्या आठवड्यात RIL च्या ऑफरला सहमती दर्शवल्याचे वृत्त आहे. मेट्रो एजी (Metro AG) किरकोळ विक्रेते, किराणा स्टोअर्स, हॉटेल्स, रेस्टॉरंट्स आणि केटरर्स यांच्यासोबत व्यवसाय करते. कंपनी तोट्यात असल्याने हा व्यवसाय ताब्यात घेण्याची  रिलायन्सची तयारी आहे.

मेट्रो कॅश अँड कॅरीने 2003 मध्ये भारतीय बाजारपेठेत प्रवेश केला. 34 देशांमध्ये असलेली ही कंपनी मेट्रो होलसेल ब्रँड अंतर्गत भारतात 31 घाऊक वितरण केंद्रे चालवतो, ज्यात बेंगळुरूमध्ये सहा, हैदराबादमध्ये चार, मुंबई आणि दिल्लीमध्ये प्रत्येकी दोन. कोलकाता, जयपूर, जालंधर, जिरकपूर, अमृतसर, विजयवाडा, अहमदाबाद, सूरत, इंदूर, लखनौ, मेरठ, नाशिक, गाझियाबाद, तुमाकुरू, विशाखापट्टणम, गुंटूर आणि हुबळी येथे प्रत्येकी एक केंद्र आहे.