MPSC Exam:राज्य लोकसेवा आयोगाच्या परीक्षा पद्धतीत होणार बदल

म. टा. विशेष प्रतिनिधी, मुंबई
राज्य लोकसेवा आयोग (एमपीएससी)ने परीक्षा पद्धतीमध्ये अमुलाग्र बदल करत परीक्षेचा दर्जा केंद्रीय लोकसेवा आयोगाच्या परीक्षेशी समकक्ष केला आहे. यानुसार आता मुख्य परीक्षा १७५० गुणांची होणार आहे.
राज्यसेवा पूर्व परीक्षेतील पेपर क्रमांक दोनबाबत अनेक उमदेवारांनी नाराजी व्यक्त केली होती. यानुसार यावर अभ्यास करण्यासाठी सेवानिवृत्त सनदी अधिकारी चंद्रकांत दळवी, धनंजय कमलाकर आणि माजी कुलगुरू एस. एफ. पाटील यांची समिती नेमण्यात आली होती.

या समितीच्या शिफारशींनुसार राज्य लोकसेवा आयोगाने परीक्षेच्या स्वरुपात बदल करण्याचा महत्वपूर्ण निर्णय घेतला आहे. याबाबतचे प्रसिद्धपत्रक शुक्रवारी प्रसिद्ध करण्यात आले. यानुसार पूर्व परीक्षेतील पेपर क्रमांक २ (सीसॅट) आर्हताकारी करण्यासाठी २ मे रोजी प्रसिद्ध केलेल्या परिपत्रकानुसार किमान ३३ टक्के गुणांची अट निश्चित करण्यात आली आहे.

हा निर्णय येत्या २१ ऑगस्ट रोजी होणाऱ्या पूर्व परीक्षेपासून लागू करण्यात येणार आहे. याचबरोबर सर्वात महत्त्वाचा बदल मुख्य परीक्षेत करण्यात आला आहे. हा बदल करताना ही परीक्षा केंद्रीय लोकसेवा आयोगाशी समकक्ष करण्यात आली आहे. सध्या मुख्य परीक्षा ७०० गुणांची होते आणि १०० गुणांची मुलाखत घेण्यात येते. मात्र आता ही मुख्य परीक्षा १७५० गुणांची होणार आहे. तर २७५ गुणांची मुलाखत घेण्यात येणार आहे. अशाप्रकारे एकूण २०२५ पैकी गुण देण्यात येणार आहेत. यामध्ये एकूण नऊ पेपर होणार आहेत. ही संपूर्ण परीक्षा वर्णनात्मक स्वरुपाची असणार आहे.

Career in NDA: बारावीनंतर करा ‘एनडीए’त करिअर, संपूर्ण प्रवेश प्रक्रिया जाणून घ्या
यामध्ये भाषा पेपर १ मराठी आणि भाषा पेपर २ इंग्रजीचा प्रत्येकी ३०० गुणांचा होणार असून यामध्ये प्रत्येकी २५ टक्के गुणांची आर्हता निश्चित करण्यात आली आहे. याशिवाय अन्य सात पेपर असतील यामध्ये दोन्ही माध्यमाच्या निबंधासाठी २५० गुणांचा पेपर, सामान्य अध्ययनाचे चार पेपर आणि दोन वैकल्पिक विषयांच्या पेपरचा समावेश असणार आहे. सामान्य अध्ययन १, सामान्य अध्ययन २ व सामान्य अध्ययन ३ या पेपरमध्ये आंतरराष्ट्रीय, राष्ट्रीय व महाराष्ट्राशी संबंधित विषयांचा अभ्यासक्रमांचा समावेश राहील. तर सामान्य अध्ययन-४ हा पेपर उमेदवारांसाठी नैतिकता, चारित्र्य व योग्यता या विषयावर राहील असेही आयोगाने स्पष्ट केले आहे.

Bank Job: सतत बॅंंक भरती परीक्षा देऊनही नोकरी मिळत नाही? मग आधी हे समजून घ्या
वैकल्पिक विषयांसाठी २६ विषयांचे पर्याय विद्यार्थ्यांना देण्यात आले आहे. राज्यसेवा मुख्य परीक्षेकरीता हे बदल मुख्य परीक्षा २०२३पासून लागू करण्यात येईल असे आयोगाच्या सचिवांनी स्पष्ट केले.
….
अशी आहे नवी परीक्षा योजना
परीक्षेचे स्वरुप : वर्णनात्मक
एकूण पेपर – नऊ
अर्हताकारी पेपर
१. भाषा पेपर १ – मराठी – ३०० गुण
२. भाषा पेपर २ – इंग्रजी – ३०० गुण
गुणवत्ता यादीकरीता विचारात घ्यावयाचे पेपर
१. निबंध (मराठी किंवा इंग्रजी माध्यम) – २५० गुण
२. सामान्य अध्ययन – १ – २५० गुण
३. सामान्य अध्ययन – २ – २५० गुण
४. सामान्य अध्ययन – ३ – २५० गुण
५. सामान्य अध्ययन – ४ – २५० गुण
६. वैकल्पिक विषय पेपर क्रमांक १ – २५० गुण
७. वैकल्पिक विषय पेपर क्रमांक २ – २५० गुण
एकूण गुण – १७५०
मुलाखत – २७५ गुण
एकूण गुण – २०२५

ICSI CSEET २०२२ च्या नोव्हेंबर सत्रासाठी नोंदणी सुरु, परीक्षा पॅटर्न जाणून घ्या