MHT CET Result: २७ विद्यार्थ्यांना १०० पर्सेंटाइल

म. टा. विशेष प्रतिनिधी, मुंबई
इंजिनीअरिंग, फार्मसी आणि कृषी अभ्यासक्रमाच्या प्रवेशासाठी आवश्यक असलेली राज्य सामायिक प्रवेश परीक्षा एमएचटी-सीईटी २०२२चा निकाल गुरुवारी सायंकाळी ५ वाजता जाहीर करण्यात आला. या परीक्षेत २७ विद्यार्थ्यांना १०० पर्सेंटाइल गुण मिळाले आहेत. यामध्ये पीसीएम ग्रुपमधील १३, तर पीसीबी ग्रुपमधील १४ विद्यार्थ्यांचा समावेश आहे. यामध्ये बहुतांश विद्यार्थी हे जेईई मेन्स आणि अॅडव्हान्स या परीक्षेमध्येही अव्वल आले आहेत.

राज्यामध्ये एमएचटी सीईटीची परीक्षा ५ ते १८ ऑगस्टदरम्यान घेण्यात आली होती. या परीक्षेदरम्यान आलेल्या तांत्रिक अडचणीमुळे परीक्षेला मुकलेल्या विद्यार्थ्यांची पुन:परीक्षा घेण्यात आली होती. त्यानुसार राज्यातील ३६ जिल्ह्यांमध्ये २७ परीक्षा केंद्रावर १३ दिवसांमध्ये २५ सत्रांमध्ये ऑनलाइन पद्धतीने ही परीक्षा घेण्यात आली. या परीक्षेसाठी राज्यातून सहा लाख पाच हजार ९४४ विद्यार्थ्यांनी नोंदणी केली होती. त्यातील चार लाख ६७ हजार ३७९ विद्यार्थ्यांनी परीक्षा दिली. यामध्ये मुलांची संख्या दोन लाख ६४ हजार ७६७ तर मुलींची संख्या दोन लाख दोन हजार ६१२ इतकी आहे.

MHT CET Result 2022: महाराष्ट्र कॉमन एन्ट्रन्स टेस्टचा निकाल जाहीर
यामध्ये पीसीबी ग्रुपमधून दोन लाख ३१ हजार २६४, तर पीसीएम ग्रुपमध्ये दोन लाख ३६ हजार ११५ विद्यार्थ्यांचा समावेश आहे. पीसीबी ग्रुपमधून १३ विद्यार्थ्यांना १०० पर्सेंटाइल गुण मिळाले आहेत. यामध्ये मुंबईतील सात विद्यार्थ्यांना, पुणे दोन तर ठाणे, सोलापूर, अकोला आणि नागपूरमधील प्रत्येकी एका विद्यार्थ्याला १०० पर्सेंटाइल गुण मिळाले आहेत. त्याचप्रमाणे पीसीबी ग्रुपमधून १४ विद्यार्थ्यांना पर्सेंटाइल गुण मिळाले आहेत.

यामध्ये मुंबईतील ४, पुणे २ आणि सांगली, सातारा, अमरावती, नागपूर, पालघर, ठाणे, लातूर, नांदेड जिल्ह्यातून प्रत्येकी एका विद्यार्थ्याला १०० पर्सेंटाइल गुण मिळाले आहेत. त्याप्रमाणे ओबीसी, एससी प्रवर्गातून ९९.९९ पर्सेंटाइल गुण मिळवून विद्यार्थी अव्व्ल आला आहे, तर एसटी प्रवर्गातून ९९.९३, एनटी प्रवर्गातून ९९.९८ पर्सेंटाइल मिळवून विद्यार्थी अव्वल आले आहेत.

JEE Advance Result: ‘आयआयटी’चा कट ऑफ घसरणार