MHT CET २०२२ पुन्हा पुढे ढकलली, प्रवेश प्रक्रियाही लांबणीवर

म. टा. प्रतिनिधी, पुणे

केंद्र सरकारतर्फे घेण्यात येणाऱ्या ‘जेईई’ (JEE Mains 2022) आणि ‘नीट’ (NEET 2022) परीक्षांसाठी राज्याच्या सीईटी सेलतर्फे (MHT CET 2022) घेण्यात येणाऱ्या सर्व प्रकारच्या सामाइक प्रवेश परीक्षा (Commen Entrance Test, CET) पुन्हा एकदा पुढे ढकलण्याचा निर्णय घेण्यात आला आहे. काही दिवसांपूर्वी ‘सीईटी’ सेलकडून (CET Cell) जुलै महिन्यात परीक्षा घेण्याचे जाहीर करण्यात आले होते. आठवडाभरातच हा निर्णय बदलण्यात आला असून, आता ऑगस्ट महिन्यात परीक्षा होणार असल्याचे ‘सीईटी’ सेलकडून स्पष्ट करण्यात आले आहे. परीक्षा पुढे गेल्याने प्रवेशांची प्रक्रियाही लांबणार असल्याने विद्यार्थ्यांना मनस्ताप होणार आहे.

नव्या वेळापत्रकानुसार दोन ते २५ ऑगस्टदरम्यान पदवी व पदव्युत्तर अभ्यासक्रमांसाठी ‘सीईटी’चे आयोजन केले जाणार आहे. ‘जेईई,’ ‘नीट’परीक्षा आणि विद्यापीठांच्या सत्र परीक्षांमुळे जुलै महिन्यातील वेळापत्रक बदलून ते ऑगस्ट महिन्यात करण्यात आल्याचे ‘सीईटी’ सेलकडून स्पष्ट करण्यात आले आहे. या परीक्षांसाठी अर्ज करण्याची अंतिम मुदत १२ एप्रिल होती. त्यामुळे आता विद्यार्थ्यांकडून अर्ज प्रक्रिया पूर्ण करण्यात आली असून, आता विद्यार्थ्यांना परीक्षेसाठी तीन महिन्यांहून अधिक वाट पहावी लागणार आहे. परीक्षा ऑगस्ट महिन्याच्या शेवटच्या आठवड्यापर्यंत चालणार असल्याने त्यानंतर सप्टेंबर महिन्यात प्रवेश प्रक्रिया सुरू होतील.

हे प्रवेश नोव्हेंबर महिन्यापर्यंत सुरू राहतील. यामुळे विद्यार्थ्यांचे शैक्षणिक वर्ष पुन्हा एकदा उशिराने सुरू होणार असल्याचे स्पष्ट झाले आहे. गेल्या वर्षी करोनाचा प्रादुर्भाव होता म्हणून परीक्षांचे आयोजन आणि प्रवेश प्रक्रियांना उशीर झाला होता. यंदा प्रवेश परीक्षा वेळेत होतील, अशी आशा विद्यार्थ्यांना होती. मात्र, याही वर्षी ‘सीईटी’ लांबणीवर पडणार असल्याने विद्यार्थ्यांसह, उच्च शिक्षण संस्थांनाही मनस्ताप होणार आहे.

NEET 2022: NEET परीक्षा देणाऱ्यांसाठी आनंदाची बातमी, नियमात महत्वाचे बदल
Jee Main Exam 2022: जेईई मेनचे अॅडमिट कार्ड कसे डाऊनलोड कराल?
पुन्हा लाट आली तर काय?
‘सीईटी’ परीक्षा ऑगस्टपर्यंत पुढे ढकलण्यात आल्याने त्या काळात जर करोनाचा प्रादुर्भाव वाढला, तर परीक्षा आणखी पुढे जाण्याची शक्यता नाकारता येत नाही. अशा परिस्थितीत ‘सीईटी’ सेल काय करणार, असा प्रश्न उपस्थित झाला आहे. परीक्षा वेळेत झाल्या नाहीत, तर विद्यार्थ्यांचे २०२२-२३ हे शैक्षणिक वर्ष कसे पूर्ण होणार, असा प्रश्न विचारला जात आहे.

डॉ. बाबासाहेब आंबेडकर मराठवाडा विद्यापीठाच्या पदवी, पदव्युत्तर परीक्षा १ जूनपासून
बारावीसाठी मे महिन्यात सराव अभ्यासक्रमावर भर
मंत्र्यांचे आश्वासन हवेतच
यंदा ‘सीईटी’ परीक्षा कोणत्याही परिस्थितीत वेळेतच होतील आणि जुलै ते सप्टेंबर दरम्यान शैक्षणिक वर्ष सुरू होईल, अशी ग्वाही काही महिन्यांपूर्वी उच्च व तंत्रशिक्षणमंत्री उदय सामंत यांनी दिली होती. ही घोषणा आता हवेतच विरली असून, परीक्षांना उशीरच होणार असल्याचे स्पष्ट झाले आहे. ही घोषणा करताना मंत्री महोदयांनी संबंधित अधिकाऱ्यांशी चर्चा केली नाही का, असाही प्रश्न उपस्थित केला जात आहे.

‘जेईई’ परीक्षा आणि विद्यापीठ परीक्षा यामुळे ‘सीईटी’ पुढे ढकलण्याशिवाय पर्याय नाही. दोन्ही परीक्षा ‘सीईटी’च्या आधीच्या वेळापत्रकाच्या तारखांच्या दिवशीच येण्याची शक्यता होती. यामुळे ‘सीईटी’ पुढे ढकलण्याचा निर्णय घेण्यात आल्याची प्रतिक्रिया ‘सीईटी’ सेलचे आयुक्त रवींद्र जगताप यांनी दिली.

MHT CET 2022: सीईटींसाठी १० लाखांहून अधिक विद्यार्थ्यांची नोंदणी
‘राज्याच्या विविध विद्यापीठांतील परीक्षा ऑफलाइनच होणार’