Mazagon Dock मध्ये बंपर भरती, ८३ हजारपर्यंत मिळेल पगार

म. टा. खास प्रतिनिधी, मुंबई

केंद्र सरकारच्या माझगाव डॉक शिपबिल्डर्स लिमिटेड (Mazagaon Dock Shipbuilders Limited)मध्ये (एमडीएल) एक हजार ४१ जागांसाठी तीन वर्षांच्या कंत्राटी पद्धतीने मोठी भरती होत आहे. त्यामध्ये ४१ प्रकारच्या कामांचा समावेश असून १८ ते ३८ वर्षे वयोगटासाठी ही भरती होत आहे. यासाठी ३० सप्टेंबरपर्यंत ऑनलाइन अर्ज करायचा आहे. त्यानंतर लेखी परीक्षा होईल.

एमडीएल ही केंद्र सरकारच्या अखत्यारितील कंपनी स्वातंत्र्यपूर्व काळापासून युद्धनौका व पाणबुड्यांची बांधणी करत आहे. या क्षेत्रातील जगातील अग्रणी कंपन्यांपैकी एक असलेल्या या कंपनीवर प्रामुख्याने महामुंबई क्षेत्रातील अनेक स्थानिक तरुण-तरुणी रोजगारासाठी अवलंबून असतात. नौका उभारणीसंबंधी तांत्रिक प्रशिक्षण घेतलेल्या अशा होतकरू तरुणांसाठी आता कंपनीने नव्याने संधी उपलब्ध करून दिली आहे.

कंपनीने वेबसाइटवर घोषित केल्यानुसार, गॅस कटर, फिटर, इलेक्ट्रिशियन, विद्युत कर्मचारी, रिगर अशा विविध तांत्रिक कामांसह पॅरामेडिक्स, दर्जा पर्यवेक्षक, हिंदी भाषांतरकार अशा काही बिगर तांत्रिक विभागांसाठीदेखील ही भरती होत आहे. एकूण ४१ प्रकारच्या विभागांचा त्यात समावेश असून एक हजार ४१ जागा त्यात भरल्या जाणार आहेत. सर्वाधिक २१७ जागा फिटर श्रेणीतील आहेत. प्रत्येक कामासाठी शैक्षणिक पात्रता भिन्न आहे. काही जागांसाठी अनुभव अत्यावश्यक असेल. एक हजार ४१पैकी १२९ जागा या अनुशेषातील व ४०९ जागा या अनारक्षित, तर उर्वरित आरक्षित श्रेणीतील आहेत. याशिवाय विविध प्रकारचे अपंगत्व असलेल्यांसाठीही ४२ जागा राखीव ठेवण्यात आल्या आहेत.

या जागांसाठी निवड होणाऱ्या कर्मचाऱ्यांना किमान १३,२००-४९,९१० ते २२,०००-८३,१८० रुपयांदरम्यान मासिक वेतन मिळेल. ही सर्व भरती ‘बिगर कार्यकारी’ श्रेणीसाठी असून तीन वर्षांचे कंत्राट अधिकाधिक एक वर्षासाठी वाढवले जाऊ शकणार आहे. यासंबंधी अधिक माहितीसाठी माझगाव डॉकच्या संकेतस्थळावरील https://mazagondock.in/Career-Non-Executives.aspx या लिंकला भेट देण्याचे आवाहन करण्यात आले आहे.

थेट लिंकवर जाण्यासाठी येथे क्लिक करा

Irrigation Department Job: राज्याच्या पाटबंधारे विभागात भरती, जाणून घ्या तपशील
Government Job: दूरसंचार विभागात अकाऊंटंट पदांची भरती, मुंबईत सरकारी नोकरीची संधी
अनुभव असलेल्यांना अतिरिक्त गुण
माझगाव डॉक कारखान्यात कर्मचारी तीन-तीन कंत्राट कालावधी अर्थात नऊ ते ११ वर्षांपासून कार्यरत आहेत. युद्धनौका बांधणीचा त्यांना दांडगा अनुभव आहे. यामुळेच नवीन भरतीत प्राधान्य देण्याची या कर्मचाऱ्यांची मागणी आहे. याबाबत ‘महाराष्ट्र टाइम्स’ने पाठपुरावा केला. त्यानुसार आता या एक हजार ४१ पदांच्या भरतीत अनुभव असलेल्या कर्मचाऱ्यांना पुन्हा अर्ज करायचा असला, तरी त्यांना अतिरिक्त गुण मिळणार आहेत. एक ते दोन वर्षांच्या अनुभवापासून ते सहा वर्षांहून अधिक अनुभव असलेल्यांना किमान १० ते कमाल २० गुण अतिरिक्त मिळणार आहेत.

BOI Recruitment: आठवी, दहावी ते ग्रॅज्युएट सर्वांना बॅंकेत नोकरीची संधी; ‘येथे’ पाठवा अर्ज