‘मन उडू उडू झालं’ मालिका संपवून टीव्ही विश्वातून घेतला ब्रेक, हृता दुर्गुळेने सांगितलं कारण

मुंबई: विज्ञान शाखेची विद्यार्थिनी ते इंजिनीअरिंगचं शिक्षण, भरतनाट्यम नृत्याचं प्रशिक्षण, कॅलिग्राफी शिकलेली हृता दुर्गुळे (Hruta Durgule) मनोरंजनसृष्टी आणि अभिनयाचा काही अनुभव वा पार्श्वभूमी नसताना या क्षेत्राकडे वळली. मालिका, नाटक, सिनेमा, वेब शो या सगळ्यांत व्यग्र असणारी हृतातिची स्वतःशीच स्पर्धा सुरू असल्याचं सांगते.

भूमिका आणि कौतुक

सलग दोन चित्रपटांच्या अनुभवाबद्दल हृता म्हणाली, ‘अनन्या हा २०२० मध्ये मार्चपूर्वी आणि ‘टाइमपास ३’ हा दुसऱ्या लॉकडाउनपूर्वी चित्रित झाला. प्रदर्शनाबद्दल काहीच कल्पना नव्हती. सलग दोन शुक्रवार लागोपाठ हे चित्रपट प्रदर्शित होतील हेही माहीत नव्हतं. त्यात सोमवार ते शनिवार मी टीव्हीवर दिसायचे. दीपू, अनन्या, पालवी या भूमिका सलग साकारता आल्या यासाठी मी स्वतःला नशिबवान समजते. ‘अनन्या’ पाहून माझ्या मैत्रिणीनं मेसेज केलेला, की तू स्वतःसाठीच स्पर्धा निर्माण केली आहेस.’

हे वाचा-वर्षा यांच्या टॉपलेस फोटोशूटनं माजवली होती खळबळ! आता कोळी समाजाच्या निशाण्यावर

अभिनेत्री पुढे म्हणते की, ‘थिएटरमध्ये एकाच वेळी दोन चित्रपटांची पोस्टर पाहणं समाधान देणारी गोष्ट होती. तुम्ही नवखे असताना दोन चित्रपट येणं, ही नक्कीच कलाकार म्हणून सुखावणारी गोष्ट आहे. आता अपेक्षा आणि स्वतःशी असणारी स्पर्धा समोर आहे.’

प्रक्रिया महत्त्वाची

हृताच्या दोन्ही भूमिकांची, त्यांच्या तयारीची बरीच चर्चा झाली. त्याबद्दल ती म्हणाली, ‘तुम्ही चौकटीबाहेर गेलात, तरच तुमच्या क्षमतांची जाणीव होते. मला स्वतःवर खूप काम करावं लागणार होतं. वजन वाढलं होतं. मानसिक तयारीचं दडपण नव्हतं, कारण भूमिका तयार होती. अनन्यासाठी घेतलेल्या शारीरिक प्रशिक्षणाचा अनुभव कायम लक्षात राहील. मी एकांकिका, नाटक काही न पाहता माझ्या पद्धतीनं ती साकारण्यावर भर दिला. स्पृहा जोशी आणि ऋतुजा बागवे या दोघींनीही उत्तम काम केलं आहे. या दोघींनाही मी साकारलेली अनन्याही आपली वाटावी, हेच माझ्या मनात होतं.’

नाटक आणि टीव्ही

नाटकातून घेतलेला ब्रेक आणि मालिकेबद्दल हृता म्हणते, ‘दादा एक गुड न्यूज आहे’ या नाटकाचा १० जुलैला मी शेवटचा प्रयोग केला. मला सलग प्रयोग करणं शक्य नव्हतं. चित्रीकरणासाठी मी परदेशातही जाणार आहे. त्यात मालिकाही बंद झाली. एखादी गोष्ट बंद झाल्यावरच तुम्ही दुसरं काही करू शकता. त्यामुळे मी त्यातून ठरवून ब्रेक घेतला. टीव्हीनं मला आयुष्यात सगळं दिलं आहे. त्यामुळे तिथलं काम बंद करणार नाही; पण आयुष्यात ‘ठहराव’ही हवा. वयाच्या १८व्या वर्षी माझं करिअर सुरू झालं. गेली दहा वर्षं ही धावपळ सुरू आहे, त्यामुळे आता स्वतःला वेळ द्यायची गरजही वाटते.’

हे वाचा-तिरुपती बालाजी मंदिरात अभिनेत्रीसोबत गैरव्यवहार? रडत-रडत शेअर केला Video

चाहत्यांशी संवाद

सोशल मीडियावरची लोकप्रियता, मोठा चाहतावर्ग याबद्दल हृता म्हणते, ‘चाहत्यांशी संवाद ही सुखावणारी गोष्ट आहे. वैयक्तिक आयुष्यात, करिअरमध्ये तुम्ही कुठल्याही टप्प्यावर असलात, तरी खरे चाहते कायम पाठीशी राहतात. आगामी काळातही चाहत्यांचं असंच प्रेम मिळावं, ही इच्छा आहे.’ दोन सिनेमांनंतर काय असं विचारताच ती म्हणाली, ‘माझा तिसरा सिनेमाही तयार आहे. आणखी एक सिनेमा करतेय. दोन वेब शो लवकरच ओटीटीवर येतील. स्त्रीप्रधान भूमिका आणि नव्या लोकांबरोबर काम करतेय याचा आनंद आहे.’