Maharashtra Job: राज्यात ७५ हजार सरकारी नोकऱ्या

पंतप्रधानांच्या घोषणेनुसार राज्य सरकारने स्वातंत्र्याच्या अमृतमहोत्सवी वर्षात ७५ हजार उमेदवारांना शासकीय नोकऱ्या उपलब्ध करून दिल्या आहेत. यातील कोकण विभागातील पात्र उमेदवारांना राज्यस्तरीय रोजगार मेळाव्याअंतर्गत नियुक्तीपत्र प्रदान करण्याचा कार्यक्रम मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या प्रमुख उपस्थितीत गुरुवारी येथे झाला. या पहिल्या टप्प्यातील कार्यक्रमात ६०० उमेदवारांना नियुक्तीपत्रे प्रदान करण्यात आली.

पंतप्रधान नरेंद्र मोदी यांनी दूरदृश्यप्रणालीद्वारे या कार्यक्रमास उपस्थिती लावली. ते म्हणाले, ‘महाराष्ट्र सरकार रोजगार देण्याच्या संकल्पाकडे एका ध्येयाने मार्गक्रमण करीत आहे. केंद्राने महाराष्ट्रासाठी दोन लाख कोटींचे प्रकल्प मंजूर केले आहेत. यातून रोजगाराच्या नवीन संधी निर्माण होत आहेत’. ‘महाराष्ट्रात गृह आणि ग्रामविकास विभागात मोठ्या प्रमाणात भरती प्रक्रिया राबविली जाणार आहे, ही बाब अभिनंदनीय आहे’, असे मोदी यावेळी म्हणाले.

या कार्यक्रमात बोलताना मुख्यमंत्री शिंदे यांनी ७५ हजार सरकारी नोकऱ्या उपलब्ध करून देण्याची घोषणा करताना ‘नवनियुक्त अधिकारी-कर्मचाऱ्यांनी पारदर्शक आणि लोकाभिमुख काम करावे’, असे आवाहन केले. आपल्या भाषणात शिंदे यांनी राज्यातील उद्योग बाहेर गेल्यानंतर विरोधी पक्षाकडून सुरू असलेल्या टीकेचा समाचार घेतला. ‘दोन-तीन प्रकल्प कुठे गेले हे माहिती अधिकार कायद्यातून उघड झाले आहे. प्रकल्प का गेले? कोणामुळे गेले? कधी गेले? हे सगळे तपशीलात समोर येईल. उपमुख्यमंत्र्यांनीही उद्योग का बाहेर गेले हे पुराव्यानिशी मांडले आहे’, असे शिंदे म्हणाले. ‘नगरविकास विभागाच्या १४ हजार कोटींच्या प्रस्तावास केंद्राची मान्यता मिळाली आहे. समृद्धी महामार्गाच्या माध्यमातून मोठ्या प्रमाणात रोजगार निर्मिती होण्याबरोबरच लहान उद्योगांनाही याचा लाभ होईल’, असे ते म्हणाले.
टिम इंडियाचा हॅण्डसम हंक ओपनर KL Rahul कितवी शिकलाय? जाणून घ्या

‘न्यायालयांत जाऊ नका’

‘भरती प्रक्रिया अत्यंत पारदर्शी करण्याचा आमचा प्रयत्न सुरू आहे. मात्र अनेक आरक्षणे असल्यामुळे ही प्रक्रिया किचकट असते. त्यामुळे कृपया तरुणांनी न्यायालयांत जाऊन भरती प्रक्रिया रद्द करू नये’, असे आवाहन उपमुख्यमंत्री फडणवीस यानी यावेळी केले. ‘नोकरभरती पारदर्शी पद्धतीने व्हावी यासाठी अनेक पदे एमपीएससीला दिली आहेत’, असे ते म्हणाले. ‘मागील सरकारच्या काळात या भरतीत घोटाळे झाल्याने तरुणांच्या मनात शंका निर्माण झाली. मात्र आता टीसीएससारखी उत्तम एजन्सी आणि बँकांची परीक्षा घेणारी केंद्र सरकारची एजन्सी आहे. त्यांच्यामार्फत निवड पद्धतीने नेमणुका होतील. वर्षभरात ७५ हजार परीक्षा आटोपून ही नियुक्ती करायची आहे’, अशी पुस्ती फडणवीस यांनी जोडली.

नियुक्तीपत्र मिळालेले उमेदवार…

अमरावती-१०८,

नागपूर-१९१,

औरंगाबाद-२३८,

नाशिक-४५५,

पुणे-३१६.

Police Recruitment: पोलीस भरतीत शेकडो उमेदवारांसाठी शेवटची संधी