झलक दिखला जा : तू तुझ्या आयुष्याचा सुलतान आहेस, माधुरी दीक्षितनं गश्मीरचं केलं कौतुक!

मुंबई : सध्या गश्मीर महाजनी चर्चेत आहे तो एकाच गोष्टीमुळे. झलक दिखला जा शोच्या १०व्या सीझनमध्ये गश्मीरचा डान्स परफाॅर्मन्स पाहायला मिळतोय. त्याच्या डान्सला प्रेक्षकांची पावती मिळतेच. पण जजेसही त्याचं कौतुक करत आहेत.

एक व्हिडिओ समोर आला आहे. त्यात गश्मीरनं जो डान्स केला आहे, त्यात त्यानं त्याच्या आयुष्याचा संघर्ष दाखवला आहे. तो पाहताना तिथे उपस्थित असलेल्या त्याच्या आईच्या डोळ्यातूनही पाणी आलं. नंतर स्टेजवर येऊन आई म्हणाली, हा नसता तर आम्ही असूच शकलो नसतो. त्यानंतर माधुरी दीक्षितनंही त्याचं खूप कौतुक केलं. ती म्हणाली, ‘गश्मीर तू तुझ्या आयुष्याचा सुलतान आहेस.’

दलेर मेहंदीला दोन महिन्यात कोर्टाचा दिलासा, २ वर्षांची शिक्षा माफ

गश्मीर महाजनी वयाच्या १५ व्या वर्षापासून डान्स अकादमी चालवत आहेत. त्याने आजवर कित्येक डान्सर घडवले आहेत. कौटुंबिक परिस्थिती सावरण्यासाठी गश्मीरने सुरू केलेल्या या अकादमीने त्याला सुखाचे दिवस दाखवले. गश्मीर ‘डान्स महाराष्ट्र डान्स’ या शोच्या लहान मुलांच्या पर्वाच्या परीक्षकाच्या भूमिकेत होता. यामध्ये तो अभिनेत्री सोनाली कुलकर्णीसोबत बाल कलाकारांना प्रोत्साहनही देत असतो. आता ‘झलक दिखला जा या’ शोमध्ये गश्मीर स्पर्धकाच्या भूमिकेत आहे.

मराठी सिनेसृष्टीतील एक सोज्वळ चेहरा आणि मोजक्या पण चांगल्या सिनेमात अभिनयाने नाव कमावलेल्या मुंबईचा फौजदार अर्थात रवींद्र महाजनी यांचा मुलगा असलेला गश्मीर याच्यासाठी अभिनयातील करिअरची वाट निवडणे सोपे नव्हते. गश्मीरने आयुष्यात खूप लहान वयात आर्थिक ओढाताण पाहिली, अनुभवली आणि त्यामुळेच अभिनय ही त्याची आवड नव्हे तर गरज झाली.

Video :आजही पूजाला विसरू शकले नाहीत डाॅ.अमोल कोल्हे,दोघांच्या नात्याबद्दल भावुक झाला

अभिनयासोबत एक जोड व्यवसाय असावा म्हणून रवींद्र महाजनी यांनी बांधकाम व्यवसायात भागीदारी केली आणि तिथे त्यांची फसवणूक झाली. पुण्यातील राहतं घरं जप्त झालं. कर्जाचा डोंगर वाढला. गश्मीरच्या आईवर जेमतेम पगाराची नोकरी करण्याची वेळ आली. तेव्हा गश्मीर फक्त पंधरा वर्षाचा होता. आवड म्हणून जपलेल्या नृत्याला व्यवसाय बनवण्याचा निर्णय गश्मीरने घेतला आणि त्याने अकरावीत असतानाच डान्स क्लास सुरू केला. नाटकांमध्ये मिळेल ती भूमिका करून आर्थिक गरज भागवली.