इतके क्युट चाहते कधी पाहिलेत का? लतीला सेटवर मिळालं मोठं सरप्राईज

मुंबई, 21  सप्टेंबर-   मराठी मालिकांमध्ये सध्या नवनवीन रंजक विषय हाताळले जात आहेत. अशीच एक मालिका म्हणजे ‘सुंदरा मनामध्ये भरली’ होय. फिटनेसप्रेमी अभिनेता आणि वजनदार अभिनेत्री अशी या मालिकेची कथा आहे. सुरुवातीपासूनच ही मालिका प्रचंड लोकप्रिय ठरली आहे. मालिकेतील अभ्या आणि लतीची केमिस्ट्री प्रेक्षकांना प्रचंड पसंत पडत आहे. परंतु सध्या मालिका उत्कंठावर्धक वळणावर पोहोचली आहे. मालिकेत मोठा लीप आला आहे. या नव्या कथेचं शूटिंगही सुरु झालं आहे. शूटिंगदरम्यान लतिका अर्थातच अभिनेत्री अक्षया नाईकची आपल्या चिमुकल्या चाहत्यांसोबत भेट घडून आली. त्याचे काही फोटो सध्या समोर आले आहेत.

कलर्स मराठीवरील ‘सुंदरा मनामध्ये भरली’ या मालिकेत सध्या रंजक वळण सुरु आहे. मालिकेत काही वर्षांचा गॅप दाखवण्यात आला आहे. मालिकेत एक नवीन ट्रॅक सुरु झाला आहे. यामध्ये अभ्या मालिकेतून गायब दिसत आहे. अभ्याचा शोध सुरू आहे. अभ्याला शोधण्यासाठी मालिकेत इन्स्पेक्टर जामखेड अर्थातच अभिनेता संग्राम समेळची एन्ट्री झाली आहे. विशेष म्हणजे मालिकेत अभ्या आणि लतीची लेक अदिरासुद्धा दाखवण्यात आली आहे. अदिरा शाळेमध्ये जाते.

हे वाचा: Raju Srivastava Death: राजू श्रीवास्तव यांचं शेवटचं स्वप्न अपूर्णच; करायचं होतं ‘हे’ काम

 लती आणि अदिराच्या शाळेतील शूटिंगदरम्यान अक्षया नाईकची आपल्या चिमुकल्या चाहत्यांशी भेट घडून आली. अक्षया नाईक या मालिकेमुळे घराघरात पोहोचली आहे. तिचा मोठा चाहतावर्ग निर्माण झाला आहे. या गोड आणि गोंडस अक्षयाचे काही चिमुकले चाहतेसुद्धा आहेत. नुकतंच सेटवर त्यांची आणि अक्षयाची भेट घडून आली. अक्षयाने या मुलांसोबत खास वेळ घालवला. दरम्यान अभिनेत्रीने आपल्या इन्स्टाग्राम स्टोरीमध्ये फोटोही शेअर केला आहे.

अक्षया नाईक सोशल मीडियावर प्रचंड सक्रिय असते. ती सतत आपले फोटो, रील्स आणि डान्स व्हिडीओ शेअर करत असते. चाहते तिच्या प्रत्येक पोस्टला भरभरून प्रेम देत असतात. अक्षया नाईक नेहमीच उत्साही दिसून येते. सेटवरसुद्धा आपल्या सह कलाकारांशी तिचं फार छान जमतं.सह कलाकारांसोबत अक्षयाचं सुंदर बॉन्डिंग आहे. अक्षया नाईकने मराठीत काम करण्यापूर्वी ‘ए रिश्ता क्या केहेलाता है’ या प्रसिद्ध मालिकेत काम केलं आहे.