Ind vs Aus T20 Series : भारताला झटका, शमी संघाबाहेर, या बॉलरला ४३ महिन्यांनी संघात स्थान

मुंबई : ऑस्ट्रेलियाविरुद्ध टी ट्वेन्टी मालिका सुरु होण्यापूर्वीच टीम इंडियाला मोठा झटका बसला आहे. कोरोना टेस्ट पॉझिटिव्ह आढळल्याने वेगवान गोलंदाज मोहम्मद शमी या तीन सामन्यांच्या मालिकेतून बाहेर पडला आहे. २० सप्टेंबर रोजी होणार्‍या ऑस्ट्रेलियाविरुद्धच्या पहिल्या सामन्यात शमीचं खेळणं जवळपास निश्चित होतं, परंतु कोरोना टेस्ट पॉझिटिव्ह असल्याने त्याला आता टी ट्वेन्टी मालिकेत खेळता येणार नाही. महत्त्वाची गोष्ट म्हणजे त्याच्याजागी वेगवान गोलंदाज उमेश यादवला भारतीय संघात स्थान मिळालं आहे. तब्बल ४३ महिन्यांनी त्याला टी ट्वेन्टी भारतीय संघात जागा मिळाली आहे.

उमेश यादवने गेल्या पाच महिन्यांत लीग क्रिकेटमध्ये दमदार कामगिरी केली आहे. भारत आणि ऑस्ट्रेलिया यांच्यात २० सप्टेंबरपासून सुरू होणाऱ्या टी-२० मालिकेसाठी उमेश यादवचा भारतीय संघात समावेश करण्यात आला आहे. शमीची कोरोना टेस्ट पॉझिटिव्ह आल्याने उमेशला ही संधी मिळाली आहे. उमेशला गेल्या काही वर्षात केवळ टेस्ट क्रिकेटमध्ये संधी मिळते आहे, त्यातही ठराविक अंतराने त्याचा भारतीय संघात समावेश होतो आहे. पण आता टी ट्वेन्टी संघात त्याचं परतणं ही निश्चित उमेशसाठी आणि त्याच्या चाहत्यांसाठी आनंदाची गोष्ट असेल.

आयपीएलमध्ये जलवा

उमेश यादवच्या पुनरागमनामागचे मोठे कारण म्हणजे त्याची अलीकडच्या काही महिन्यांतील कामगिरी. या वर्षी आयपीएल स्पर्धेच्या पहिल्याच सामन्यापासून उमेशने आपला दबदबा निर्माण केला. विशेषत: पॉवरप्लेमध्ये तो वेग आणि स्विंगच्या जोरावर विकेट घेत होता. त्याने कोलकात्याकडून १२ सामन्यात १६ विकेट्स घेतल्या.

आगामी टी २० विश्वचषकासाठी शमीची भारताच्या पंधरा सदस्यीय संघात निवड झाली नाहीये. त्याची निवड न झाल्याने सगळ्यांनीच आश्चर्य व्यक्त केलं. त्याला राखीव खेळाडूंमध्ये ठेवण्यात आले आहे. पण ऑस्ट्रेलियाविरुद्ध टी ट्वेन्टी मालिका सुरु होण्यापूर्वीच त्याला कोरोनाची लागण झाल्याने तो टी ट्वेन्टी मालिकेत खेळणार की याबद्दल प्रश्नचिन्ह उपस्थित झालंय.

इंग्लंडमध्येही दबदबा

उमेशने गेल्या महिन्यात इंग्लंडमध्ये काऊंटी क्रिकेट खेळताना आपली चमक दाखवली. रॉयल लंडन एकदिवसीय चषक स्पर्धेत उमेशने मिडलसेक्ससाठी केवळ ७ सामन्यात १६ विकेट्स घेतल्या आणि तो संघाचा सर्वात यशस्वी गोलंदाज ठरला. या स्पर्धेदरम्यान त्याला दुखापत झाली, त्यानंतर तो भारतात परतला.