प्रसिद्ध अभिनेत्याच्या निधनानंतर हळहळले सिनेविश्व; प्रभासने गमावली जवळची व्यक्ती

मुंबई: तेलुगू सिनेसृष्टीतील प्रसिद्ध अभिनेते आणि सुपरस्टार प्रभासचे काका कृष्णम राजू (Krishnam Raju Death) यांचे निधन झाले. कृष्णम राजू हे ८३ वर्षांचे होते आणि ते काही काळापासून आरोग्याशी संबंधित समस्यांनी त्रस्त होते. कृष्णम यांनी ११ सप्टेंबर रोजी पहाटे ३.२५ वाजता हैदराबादमध्ये अखेरचा श्वास घेतला. हैदराबादमधील रुग्णालयातच त्यांच्यावर उपचार सुरू होते. कृष्णम राजू ‘रिबेल स्टार’ म्हणून प्रसिद्ध आहेत. आपल्या पाच दशकांहून अधिक काळच्या कारकिर्दीत कृष्णम राजू यांनी १८३ हून अधिक चित्रपटांमध्ये काम केले. ते शेवटचे ‘राधे श्याम’ चित्रपटात प्रभाससोबत दिसले होते.

कृष्णम राजू यांच्या निधनानंतर दाक्षिणात्य चित्रपटसृष्टीसह अभिनेता प्रभासच्या घरावर शोककळा पसरली आहे. त्यांच्या निधनानंतर चाहत्यांना धक्का बसला आहे. सोशल मीडियावर अभिनेता आणि राजकारणी कृष्णम राजू यांना श्रद्धांजली वाहिली जात आहे.

हे वाचा-अजिंक्यवर कोसळला दुःखाचा डोंगर, तरीही हसऱ्या चेहऱ्यानं सगळ्यांना भेटला

त्यांचे पूर्ण नाव उप्पलापती वेंकट कृष्णम राजू असे होते असून त्यांचा जन्म २० जानेवारी १९४० रोजी आंध्र प्रदेशातील पश्चिम गोदावरी जिल्ह्यातील मोगलथूर येथे झाला. शिक्षण पूर्ण केल्यानंतर त्यांनी काही काळ पत्रकार म्हणूनही काम केले होते. नंतर १९६६ मध्ये ‘चिलाका गोरिंका’ या चित्रपटातून मुख्य अभिनेता म्हणून त्यांनी चित्रपटसृष्टीत प्रवेश केला. ते त्यांच्या नकारात्मक भूमिकांसाठीही विशेष प्रसिद्ध होते.

त्यांनी १९७७, १९७८ साली सर्वोत्कृष्ट अभिनयासाठी राष्ट्रपती पुरस्कार आणि १९७७, १९८४ या वर्षात नांदी पुरस्कार जिंकले होते. ‘अमरदीपम’ (१९७७), ‘बोबिली ब्राह्मण्णा’ (१९८४), ‘तंद्र पापरायुडू’ (१९८६), ‘धर्मातमुडू’ (१९८३) या सिनेमांमधील अभिनयासाठी त्यांना ४ फिल्मफेअर पुरस्कार मिळाले आहेत.

२००६ मध्ये त्यांना फिल्मफेअर दक्षिण जीवनगौरव पुरस्काराने गौरवण्यात आले होते. ‘भक्त कन्नप्पा’ आणि ‘बोबिली ब्राह्मण्णा’ हे त्यांचे चित्रपट आजही खूप लोकप्रिय आहेत. त्यांनी साकारलेल्या बंडखोर भूमिकांमुळे त्यांना ‘रिबेल स्टार’ म्हणून ओळखले जाते. कालांतराने त्यांनी राजकारणातही प्रवेश केला होती. त्यांनी दिवंगत आणि माजी पंतप्रधान अटलबिहारी वाजपेयी यांच्या कारकिर्दीत केंद्रीय मंत्री म्हणून पाहिले आहे.

हे वाचा-‘सुशांतसिंह राजपूतचे ब्रह्मास्त्र बॉलिवूडचा करेल विनाश…’, SSR च्या बहिणीचा संताप

कृष्णम यांनी प्रभाससोबतही अनेक चित्रपटांमध्ये काम केले. यामध्ये ‘रिबेल’, ‘राधे श्याम’, ‘बिल्ला द डॉन’ आणि ‘द रिटर्न ऑफ रिबेल 2’ या सिनेमांचा समावेश आहे. प्रभास आणि त्याचे काका कृष्णम राजू यांचे खूप जवळचे नाते होते. अशी माहिती मिळाली आहे की, शनिवारी १० सप्टेंबर रोजी कृष्णम राजू यांची प्रकृती अचानक बिघडली. त्यानंतर त्यांना तातडीने रुग्णालयात दाखल करण्यात आले, मात्र आजाराशी सुरू असलेली झुंज ते जिंकू शकले नाहीत. त्यांच्या पश्चात पत्नी आणि तीन मुली असा परिवार आहे.