इंजिनीअरिंग कॉलेजांवर कारवाई कधी?

राष्ट्रसंत तुकडोजी महाराज नागपूर विद्यापीठाशी संलग्नित काही इंजिनीअरिंग कॉलेजांमध्ये कर्मचाऱ्यांचा मानसिक छळ केला जात असल्याचा अहवाल व्यवस्थापन परिषदेचे सदस्य डॉ. नितीन कोंगरे व काही सदस्यांच्या तपास समितीने दिला होता. मात्र, कुलगुरू डॉ. सुभाष चौधरी यांनी अभियांत्रिकी महाविद्यालयांच्या विरोधात अहवाल देणाऱ्या या समितीचे काम थांबवून पुन्हा नवी समिती तयार केली. या समितीच्या माध्यमातून महाविद्यालयांना कारणे दाखवा नोटीस बजावण्यात आली होती. मात्र, त्यानंतर महाविद्यालयांवर नेमकी कोणती कारवाई केली, याबाबत व्यवस्थापन सदस्यांच्या समितीला अद्याप कळविण्यात आलेले नाही. तक्रारीचा अंतिम अहवाल अद्यापही तयार करण्यात आलेला नाही. आजही अशा अनेक तक्रारी कुलगुरू कार्यालयात येत असताना, त्याकडे जाणीवपूर्वक दुर्लक्ष होत आहे, अशी टीका करण्यात येते आहे.

प्रियदर्शिनी इंदिरा गांधी इंजिनीअरिंग कॉलेजच्या सहा प्राध्यापकांना निलंबित केले आहे तर अनेकांना नोकरीतून काढण्यासाठी नोटीस मिळाल्या आहेत. अनेकांना मानसिक त्रासही व्यवस्थापनाकडून मिळत असल्याचे दिसून येत आहे. याबाबत कुलगुरूंना माहिती देण्यात आली. मात्र, त्यानंतरही विद्यापीठ त्यावर काहीही करण्यास तयार नाही, असा आक्षेप घेण्यात येतो आहे.

करोनाकाळात महाविद्यालयांचे संपूर्ण शिक्षण हे ऑनलाइन सुरू होते. याचा फायदा घेत अनेक महाविद्यालयांनी प्राध्यापकांना वेतन न देणे, त्यांना मानसिक छळ करणे, नियमानुसार भविष्य निर्वाह निधी (पीएफ) सुविधेचा लाभ न देणे, असा प्रकार सुरू केला आहे. अशा दहा महाविद्यालयांमधील प्राध्यापक व कर्मचाऱ्यांनी विद्यापीठाकडे तक्रार केली होती. त्यात काही महाविद्यालयांनी तब्बल ३५ महिन्यांपासून तर काहींनी सहा महिन्यांपासून वेतन दिलेले नाही. काहींनी तुटपुंजी रक्कम देऊन समाधान केल्याच्या तक्रारी होत्या.

MPSC: ‘सी-सॅट’ गुण केवळ पात्रतेसाठी ग्राह्य धरण्याबाबतचा अहवाल प्रलंबितच

समितीने दिला अहवाल

तक्रारीची दखल घेत, व्यवस्थापन परिषदेचे सदस्य डॉ. आर.जी. भोयर यांच्या समितीने नागपूर आणि वर्धा येथील बापूराव देशमुख अभियांत्रिकी महाविद्यालय सेवाग्राम, प्रियदर्शिनी इन्स्टिट्युट ऑफ इंजिनीअरिंग अॅण्ड टेक्नॉलॉजी नागपूर, प्रियदर्शिनी भगवती अभियांत्रिकी महाविद्यालय नागपूर, प्रियदर्शिनी इंदिरा गांधी अभियांत्रिकी महाविद्यालय नागपूर, प्रियदर्शिनी अभियांत्रिकी महाविद्यालय नागपूर, अण्णासाहेब गुंडेवार महाविद्यालय नागपूर, एसबी जैन इन्स्टिट्युट ऑफ मॅनेजमेंट अॅण्ड रिसर्च नागपूर, कवी कुलगुरू इन्स्टिट्युट ऑफ टेक्नॉलॉजी अॅण्ड सायन्स नागपूर अशा महाविद्यालयांचा तपास केला करून अहवाल विद्यापीठाकडे सादर केला होता.

मराठवाडा विद्यापीठ सत्र परीक्षा होणार ऑफलाइन