Medical Exam: ‘बीडीएस, आयुर्वेद आणि होमिओपॅथीच्या परीक्षा पुढे ढकला’

राज्यातील बहुतांश वैद्यकीय महाविद्यालयांच्या वेळापत्रकानुसार १४ डिसेंबरपासून बीडीएस, बीएएमएस आणि बीएचएमएस या अभ्यासक्रमांच्या अंतिम वर्षाच्या परीक्षा सुरू होत आहेत. त्यापूर्वी, या विद्यार्थ्यांना इंटर्नशिप म्हणून क्लिनिकल पोस्टींगच्या प्रक्रियेला सामोरे जावे लागते. ही प्रक्रिया एक डिसेंबरपर्यंत सुरू राहणार आहे.

त्यानंतर विद्यार्थ्यांना परीक्षेची तयारी करण्यासाठी केवळ १४ दिवसांचा कालावधी मिळणार आहे. विद्यार्थ्यांना अभ्यासासाठी निदान एक महिना तरी उपलब्ध व्हावा, अशी अपेक्षा विद्यार्थ्यांकडून व्यक्त केली जात आहे. या पार्श्वभूमीवर परीक्षा किमान वीस दिवसांनी पुढे ढकलाव्यात, अशी मागणी धनंजय मुंडे यांनी गिरीश महाजन यांच्याकडे पत्राद्वारे केली आहे.

या मागणीला विद्यार्थ्यांकडूनही प्रतिसाद मिळत असून, ‘ट्वीटर’वर अनेक विद्यार्थी महाजन यांच्याकडे परीक्षा पुढे ढकलण्याची मागणी करीत आहेत. दरम्यान, या संदर्भात आरोग्य मंत्रालयाकडून आतापर्यंत कोणतेही स्पष्टीकरण आले नसून, सोमवारी याबाबत स्पष्टीकरण मिळण्याची शक्यता आहे.

मुंबई विद्यापीठातील ‘विधी’च्या विद्यार्थ्यांना अर्ज भरण्यात अडचणी

‘सेट-नेट’साठी आकस्मिक निधी द्या

महात्मा जोतिबा फुले संशोधन व प्रशिक्षण संस्थेकडून (महाज्योती) सेट-नेट परीक्षेची तयारी करणाऱ्या १५०० विद्यार्थ्यांना उदरनिर्वाहासाठी आकस्मिक निधी द्यावा, अशी मागणी विद्यार्थ्यांकडून करण्यात आली आहे. ‘महाज्योती’कडून या विद्यार्थ्यांना दरमहा १० हजार रुपये मिळणार आहेत. मात्र, विद्यार्थ्यांचे वर्ग सुरू होऊन एक महिना पूर्ण झाल्यानंतर हा निधी मिळणार असल्याने पहिल्या महिन्यात विद्यार्थ्यांनी खर्च कसा भागवायचा, अशी विचारणा विद्यार्थ्यांकडून केली जात आहे.

‘महाज्योती’कडून १५०० विद्यार्थ्यांची निवड सेट-नेट परीक्षेच्या तयारीसाठी करण्यात आली आहे. खासगी शिकवण्यांमध्ये या विद्यार्थ्यांनी तयारी करणे अपेक्षित आहे. हे वर्ग आज, सोमवारपासून (२८ नोव्हेंबर) सुरू होत आहेत; परंतु राज्याच्या विविध भागांमधून येणाऱ्या विद्यार्थ्यांनी पुण्यासारख्या शहरामध्ये पहिला महिना कसा काढायचा, असा प्रश्न विद्यार्थी उपस्थित करीत आहेत.