चीनमधील शिक्षण भारतात ग्राह्य नाही; UGC, AICTE ने दिला इशारा

चीनमध्ये विद्यार्थ्यांना अद्याप प्रवासास मुभा देण्यात आली नाही. यामुळे येथील विद्यापीठांमध्ये वैद्यकीय शिक्षण घेणाऱ्या विद्यार्थ्यांना देशात प्रॅक्टिस करण्यासाठी मुभा देता येणार नाही, असे राष्ट्रीय वैद्यकीय परिषदेने यापूर्वीच स्पष्ट केले आहे. यातच आता अन्य शाखांमध्ये पदवी घेऊ इच्छिणाऱ्या विद्यार्थ्यांनाही विद्यापीठ अनुदान आयोग आणि अखिल भारतीय तंत्रशिक्षण परिषदेने इशारा दिला आहे. याबाबत एक जाहीर नोटीस काढण्यात आली. यामध्ये या विद्यार्थ्यांनी आपले उच्च शिक्षण कोणत्या देशात पूर्ण करावे, याबाबत निर्णय घ्यावा, असे स्पष्ट करण्यात आले.

सध्या चीनमधील विद्यापीठांचे ऑनलाइन शिक्षण सुरू आहे. शिक्षण पूर्ण करून पदवी प्राप्त केली, तर भविष्यात रोजगाराचा प्रश्न निर्माण होऊ शकेल, असेही या नोटिशीत म्हटले आहे. चीनने सध्या प्रवासबंदी केली आहे. याचबरोबर नोव्हेंबर २०२०पासूनचे सर्व प्रकारचे व्हिसाही रद्द केले. यामुळे तेथील विद्यापीठांमध्ये शिक्षण घेणाऱ्या विद्यार्थ्यांना प्रत्यक्ष शिक्षण घेणे शक्य झालेले नाही. तसेच अनेक विद्यापीठांचे ऑनलाइन शिक्षणही अद्याप सुरू झालेले नाही. यामुळे आयोग अथवा परिषदेच्या पूर्व परवानगीशिवाय ऑनलाइन शिक्षण घेऊन पदवी घेतली, तर ती ग्राह्य राहणार नाही, असे या परिपत्रकात नमूद करण्यात आले. यामुळे चीनमधील विद्यापीठांमध्ये प्रवेश घेतलेल्या विद्यार्थ्यांना धक्का बसला आहे.

पदवीनंतर थेट ‘पीएचडी’ची मुभा; UGC चा नवा प्रस्ताव

केंद्रीय विद्यापीठांच्या पदवी प्रवेशांसाठी आता CUET परीक्षा