चंद्रमुखी पाहून अभिनेत्याशी एक दिवस बहिणीने धरला होता अबोला; असं काय घडलं?

अवनी परांजपे, पोदार कॉलेज

मुंबई: एखाद्या कलाकृतीत नायकासह तितक्याच ताकदीनं खलनायकी पात्र सादर करणं आणि लोकांच्या मनावर त्याची छाप पाडणं हे आजवर फार कमी लोकांना जमलं आहे. या यादीत अभिनेता राजेंद्र शिसतकरचं नाव घेता येईल. ‘एक थी बेगम’ वेब सीरिजमधील नाना म्हात्रे तर ‘चंद्रमुखी’मधील आ. नाना जोंधळे (Rajendra Shisatkar in Chandramukhi) यांसारख्या खलनायकी भूमिका त्यानं यशस्वीरीत्या रंगवल्या.

‘चंद्रमुखी’तील त्याच्या पात्राला लोकांच्या मिळणाऱ्या प्रतिक्रिया, त्या व्यक्तिरेखेचा येणारा राग ही त्याच्या कामाला मिळालेली पोचपावती असल्याचं तो म्हणाला. याचं सगळं श्रेय तो दिग्दर्शक प्रसाद ओकला देतो. याबद्दलची एक आठवण राजेंद्रनं सांगितली, ‘माझ्या बहिणीनं ‘चंद्रमुखी’ हा चित्रपट पहिला आणि नंतर ती माझ्याशी एक दिवस बोलली नाही. खऱ्या आयुष्यात मी तसा नसल्यामुळे नाना जोंधळे ही व्यक्तिरेखा तिच्या भावानं साकारली आहे हे पचवायला तिला वेळ लागला. माझ्या बहिणीची ही प्रतिक्रिया खूप बोलकी होती.’

हे वाचा-अनिरुद्धनं लावलाय ओम नम: शिवायचा जप, हा Video पाहिलात की कळेल!

‘एक थी बेगम’ या सीरिजमधून त्यांनी वेबविश्वात पहिलं पाऊल टाकलं. या सीरिजसाठी त्याला यंदाचा सर्वोत्कृष्ट अभिनेत्याचा ‘मटा सन्मान’ पुरस्कारही मिळाला. ‘नाना म्हात्रे ही व्यक्तिरेखा लोकांना आवडेल याचा जराही अंदाज नव्हता. एखादा खलनायक स्क्रीनवर रडताना दाखवल्यानं त्याची ही छटा लोकांना भावली’, अशा भावना त्यानं व्यक्त केल्या. यानंतर राजेंद्र ‘सिटी ऑफ ड्रीम्स’ या नावाजलेल्या वेब सीरिजच्या पुढच्या सीझनमध्ये दिसणार आहे. यामध्ये तो बांदिवडेकर ही भूमिका साकारणार आहे. सचिन पिळगांवकर, अतुल कुलकर्णी आणि नागेश कुकुनूर यांच्यासारख्या दिग्गज, अनुभवी मंडळींसह काम करणं म्हणजे एक पर्वणी असल्याचंही तो म्हणाला.

हे वाचा-नेहाच्या नव्या आयुष्याची सुरुवात! आभार मानताना थकत नाहीये प्रार्थना बेहेरे

त्यानं साकारलेल्या त्याच्या आवडत्या भूमिकेबद्दल तो म्हणाला, ‘प्रत्येक भूमिकेवर माझं खूप प्रेम आहे. कलाकारानं १०० टक्के योगदान दिलं तरच ते प्रेक्षकांपर्यंत तितक्याच ताकदीनं पोहोचतं. मग फक्त भूमिकाच नाही तर ती कलाकृतीदेखील प्रेक्षकांना भावते.’ येत्या काळात राजेंद्र तीन चित्रपटांमधून झळकणार आहे. ‘प्रत्येक गोष्ट, दिग्दर्शक, माध्यम वेगळं आहे. प्रत्येकाची विचारसरणी, कलाकृतीकडे पाहण्याचा दृष्टिकोन वेगळा आहे. त्यामुळे त्या सगळ्यांबरोबर काम करताना भरपूर शिकायला मिळतंय आणि त्या संपूर्ण प्रक्रियेचा मी आनंद घेतोय’, असं त्यानं सांगितलं. ‘अश्वथ’, ‘एकदा येऊन तर बघा’ आणि ‘छत्रपती ताराराणी’ हे त्याचे तीन चित्रपट लवकरच प्रेक्षकांच्या भेटीस येणार आहेत.