BBM 4: नेटकऱ्यांना पटला नाही अपूर्वा नेमळेकरचा अ‍ॅटिट्यूड, म्हणाले- कोणीतरी हिचा माईक बंद करा

मुंबई- बिग बॉस मराठी चा सिझन चौथा सुरू होऊन आता आठवडा झाला. या सीजनमध्ये कोण दिसेल याची उत्सुकता होती. या सर्वांमध्ये एका नावाने सर्वांचं लक्ष वेधून घेतलं आणि ते नाव म्हणजे रात्रीस खेळ चाले फेम शेवंता म्हणजेच अपूर्व नेमाळेकर. रात्रीस खेळ चाले या मालिकेत अपूर्वाच्या शेवंता या व्यक्तिरेखेला प्रेक्षकांनी चांगलाच डोक्यावर घेतलं परंतु बिग बॉस मधला अपूर्वाचा स्पर्धक म्हणून वावर प्रेक्षकांना फारसा काही भावत नाहीये.

नेमकी याचमुळे प्रेक्षकांनी सोशल मीडियावर कमेन्टच्या माध्यमातून नाराजी व्यक्त करत तिला चांगलंच ट्रोल करायला सुरुवात केली आहे. पहिल्याच दिवशी तिने प्रसाद जावडे सोबत केलेल्या भांडणातून बिग बॉसमध्ये आपल्या उद्धट आणि भांडखोर स्वभावाचं दर्शन दिलं. आता बिग बॉस सुरु होऊन एक आठवडा झाल्यावर प्रेक्षकांनी तिच्यावर ना पसंतीचे शिक्के लावले असून बिग बॉसला तिच्या माईकचा आवाज म्यूट करण्याची विनंती केली आहे.

अपूर्वा बिग बॉसची आतापर्यंतची सर्वांकडून द्वेष केली जाणारी स्पर्धक आहे आणि हे सर्व जण मान्य करतील अशा आशयाच्या काहीशा कमेंट सध्या सोशल मीडियावर पाहायला मिळत आहेत. त्याचप्रमाणे महेश मांजरेकर यांना अपूर्वाला स्पर्धेतून बाद करण्यात यावे असेदेखील प्रेक्षक सुचवत आहेत. कॅमेरासमोर येऊन सतत किंचाळणं, भांडण करणं या तिच्या वागणुकीला प्रेक्षक चांगलेच कंटाळले आहेत. असं भांडून तिला पुढे जात येईल असं वाटत आहे जे संपूर्णपणे चुकीचं आहे असं प्रेक्षकांचं म्हणणं आहे.

बाकी सर्वजण बिग बॉसमध्ये हसतमुख चेहऱ्याने खेळत असताना अपूर्वाला नक्की कसला त्रास होतोय हे प्रेक्षकांना समजत नाहीये. जेव्हा अपूर्वा बोलायला लागते तेव्हा टीव्ही फुटेल अशी भीती वाटते. त्यामुळे ती बोलायला लागली की तिचा माईक बंद करावा असंं प्रेक्षक वारंवार म्हणत आहेत. आतापर्यंतच्या बिग बॉसच्या स्पर्धकांमध्ये ती सर्वात भीतीदायक स्पर्धक वाटते असं एकीकडे प्रेक्षक म्हणत आहेत तर दुसरीकडे तिचा हा स्वभाव वगळता ती खूप चांगलं खेळतेय असं देखील म्हटल जातंय.