अर्जून तेंडुलकरचं रणजी क्रिकेटमध्ये पदार्पण, मुंबई नाही तर या संघाकडून उतरणार मैदानात

Arjun Tendulkar : भारताचा माजी क्रिकेटर आणि महान फलंदाज सचिन तेंडुलकर (Sachin Tendulkar) याच्यासाठी आजचा दिवस फारच आनंदाचा आहे. बऱ्याच दिवसांपासून प्रथम श्रेणी क्रिकेटमध्ये पदार्पणाची वाट पाहत असलेला सचिनचा मुलगा अर्जुन तेंडुलकरने (Arjun Tendulkar) आज फायनली रणजी ट्रॉफीमध्ये पदार्पण केलं. दरम्यान मुलाचं रणजी पदार्पण पाहून सचिनचं एक मोठं स्वप्न नक्कीच पूर्ण झालं असेल. पण तो मुंबई संघाकडून नाही तर गोवा संघाकडून मैदानात उतरला. आज राजस्थानविरुद्ध गोव्याच्या प्लेइंग इलेव्हनमध्ये अर्जुनचा समावेश करण्यात आला. दोन्ही संघांमधील हा सामना गोवा क्रिकेट असोसिएशन अकादमीच्या मैदानावर खेळवला जात आहे. या वर्षाच्या सुरुवातीला अर्जुन तेंडुलकरने महाराष्ट्र सोडून गोवा संघात प्रवेश केला. 

मुंबई क्रिकेट असोसिएशनने (MCA) अर्जुन तेंडुलकरला राज्य बदलण्यासाठी ना हरकत प्रमाणपत्र (NOC) दिले होते. याबाबत गोवा क्रिकेट असोसिएशनचे सचिन विपुल फडके म्हणाले, अर्जुन तेंडुलकरला आगामी हंगामात गोव्याकडून खेळायचे होते. त्यासाठी त्यांने संपर्क साधला. आम्ही यावर उत्तर देत आधी एमसीएकडून एनओसी अर्थात ना हरकत प्रमाणपत्र द्या ज्यानंतर आम्ही तुमचे कौशल्य आणि फिटनेस तपासू, अशी माहिती फडके यांनी दिली. ज्यानंतर सर्व प्रक्रिया पार पडल्यावर अखेर अर्जूननं गोवा संघात पदार्पण केलं. दरम्यान आज रणजी क्रिकेटमध्ये पहिला सामना खेळल्यामुळे अर्जुनसाठी आजचा दिवस नेहमीच अविस्मरणीय असणार आहे.

राजस्थानचा गोलंदाजीचा निर्णय

गोवा क्रिकेट असोसिएशनच्या मैदानावर खेळवल्या जात असलेल्या या सामन्यात राजस्थानने नाणेफेक जिंकून प्रथम गोलंदाजीचा निर्णय घेतला. दरम्यान गोव्याची सुरुवात मात्र चांगली झालेली नाही. त्यांनी अवघ्या 32 धावांवर पहिली विकेट गमावली. सलामीवीर सुमिरन आमोणकर 9 धावा करून बाद झाला. त्यानंतर अमोघ देसाईने 27 धावा केल्या. सिद्धेश लाड 17 आणि एकनाथ केरकरने 3 धावा केल्या. त्याचवेळी स्नेहल कौथुणकरने 59 धावा केल्या. पहिल्या दिवसाचा खेळ संपला तेव्हा गोव्याने 5 गड्यांच्या मोबदल्यात 210 धावा केल्या होत्या. सुयश प्रभुदेसाई 81 आणि अर्जुन तेंडुलकर 4 धावांवर नाबाद आहे. राजस्थानकडून अनिकेत चौधरीने सर्वाधिक दोन बळी घेतले आहेत. दरम्यान आता अर्जून फलंदाजीत आणि नंतर गोलंदाजीत काय कमाल करेल हे पाहावे लागेल.

News Reels

हे देखील वाचा-