विद्यापीठ परिक्षेत गोंधळ; एमए इंग्रजी विषयाचा पेपर बदलला, परिक्षार्थींची तारांबळ

औरंगाबाद : डॉ. बाबासाहेब आंबेडकर मराठवाडा विद्यापीठ पदवी, पदव्युत्तर परीक्षेतील विद्यार्थ्यांच्या अडचणी थांबलेल्या नाहीत. पदवी परीक्षा मंगळवारपासून सुरू होत असताना अनेक हॉलतिकिटांवर पेपर कोणता याचा उल्लेख नाही, तर विद्यार्थ्याच्या हॉलतिकिटवर चक्क विद्यार्थिनीचा फोटो असल्याचे प्रकार समोर आले आहेत. एमए परीक्षेत सोमवारी झालेल्या इंग्रजी विषयाचा पेपर अभ्यासक्रमा व्यतिरिक्त होता. विद्यार्थ्यांनी ओरड केल्यानंतर प्रशासनाने सुधारित प्रश्नपत्रिका देऊन, परीक्षा घेतली.

विद्यापीठाच्या पदवी परीक्षेत बीए, बीकॉम, बीएससी प्रथम वर्ष परीक्षेला मंगळवार २७ डिसेंबरपासून सुरुवात होत आहे. यंदा परीक्षेत हॉलतिकिटांमधील चुकांमुळे विद्यार्थ्यांची धांदल उडाल्याचे समोर आले. त्यातच मंगळवारपासून सुरू होणाऱ्या प्रथम सत्राच्या परीक्षेच्या हॉलतिकिटांमध्येही त्रुटी असल्याचे समोर आले आहे. अनेक हॉलतिकिटांमध्ये पेपरचा उल्लेख नाही. बीए, बीएस अशा पदवी अभ्यासक्रमांना प्रथम, द्वितीय वर्षाला इंग्रजी विषय अनिवार्य आहे. परंतु, याच विषयाचा उल्लेख काही हॉलतिकिटांवर नाही. हॉलतिकिटांवर विषयाची कल्पना नसल्याने उद्या कोणता पेपर असा प्रश्न असल्याचे विद्यार्थ्यांनी सांगितले. काही विद्यार्थ्यांना हॉलतिकीट सोमवार सायंकाळपर्यंत मिळाले नव्हते.

हॉलतिकिटांमधील चुका, हॉलतिकीट नसणे अशा प्रकारांमुळे पेपरचे काय होणार, याची चिंता विद्यार्थी, पालकांमध्ये आहे. अशा प्रकारामुळे पेपरच्या अदल्या दिवशी विद्यार्थ्यांमध्ये संभ्रमाचे वातावरण दिवसभर होते. अनेक विद्यार्थ्यांचे हॉलतिकीट न मिळण्यामागे विलंबाने अर्ज आल्याचे कारण विद्यापीठ प्रशासनाने सांगितले. सोमवारीही तीन महाविद्यालयांनी परीक्षांचे अर्ज भरल्याचे सांगण्यात आले.

अभ्यासक्रमाबाहेरील प्रश्न

विद्यापीठातर्फे पदव्युत्तर अभ्यासक्रमाच्या परीक्षाही २२ डिसेंबरपासून सुरू आहेत. सोमवारी एमए इंग्रजी विषयाचा पेपर विविध महाविद्यालयांच्या परीक्षा केंद्राहून घेण्यात आला. जुन्या अभ्यासक्रमाच्या पेपरऐवजी नव्या अभ्यासक्रमाचा पेपर दिल्याचा प्रकार समोर आल्यामुळे विद्यार्थ्यांची एकच तारांबळ उडाली. त्यानंतर परीक्षा विभागाने तातडीने विद्यार्थ्यांना पेपर बदलून दिला. परीक्षा विभागाच्या नियोजनशून्यतेवर विद्यार्थ्यांनी संताप व्यक्त केला. डॉ. बाबासाहेब आंबेडकर कला व वाणिज्य महाविद्यालयात हा प्रकार घडला. सकाळी दहा वाजता विद्यार्थ्यांच्या हाती प्रश्नपत्रिका आल्यानंतर विद्यार्थ्यांना प्रश्नपत्रिका दुसरीच असल्याचे लक्षात आले. जुन्या अभ्यासक्रमाच्या पेपरऐवजी नव्या अभ्यासक्रमाचा पेपर देण्यात आला. ‘लिटरेचर इन इंग्लिश’ विषयाचा हा पेपर होता. परीक्षा विभागाने सुधारित प्रश्नपत्रिका पाठवून, पुन्हा पेपर घेतला. यामध्ये तीस मिनिटांपेक्षा अधिक वेळ गेल्याचे विद्यार्थ्यांनी सांगितले.

पदवी अभ्यासक्रमाची स्थिती

परीक्षा केंद्र २४४

विद्यार्थी संख्या ३१२२०९

बीए विद्याशाखा १४८९१७

वाणिज्य व व्यवस्थापनशास्त्र ४३३६९

विज्ञान विद्याशाखा ११९९२३

पदव्युत्तर परीक्षा केंद्र : ११०

पदव्युत्तर परीक्षार्थी : १६१९३

एमएम मराठी विषयाचा पेपर अभ्यासक्रमाबाहेरील होता, अशी विद्यार्थ्यांची तक्रार होती. तत्काळ परीक्षा केंद्रावर दुसरी प्रश्नपत्रिका पाठविण्यात आली. यासह हॉलतिकीटचे प्रश्न असलेल्या विद्यार्थ्यांना पीआरएन क्रमांकावर परीक्षा देता येईल, याबाबत परीक्षा केंद्रप्रमुखांना सूचना देण्यात आल्या. विद्यार्थ्यांचे नुकसान होणार नाही.- डॉ. गणेश मंझा, संचालक, परीक्षा व मूल्यमापन मंडळ, डॉ. बाबासाहेब आंबेडकर मराठवाडा विद्यापीठ