हिवाळ्यात सतावत आहेत सांध्यांच्या समस्या? संधिवातापासून दूर राहण्याकरिता टिप्स

सांध्यांसाठी फ्लुएडची गरज

हाडांची मजबूती आणि सांध्यांचं कार्य योग्य पद्धतीने सुरु राहण्याकरिता सायनोव्हायल फ्लुएड गरजेचं असते. हा एक घट्ट द्रव पदार्थ असतो. हा पदार्थ सांध्यांच्या हालचालींसाठी मदत करतो आणि सांधे एकमेकांवर घासण्यापासून रोखतो. हिवाळ्यात सांधेदुखी, संधिवातामुळे होणाऱ्या शारीरिक वेदना टाळण्यासाठी रुग्णाने जीवनशैलीत बदल करणं गरजेचं आहे.अपचन, आहाराच्या चुकीच्या सवयीमुळेदेखील हिवाळ्यात गुडघ्यांचा त्रास होतो. हिवाळ्यातील संधिवातापासून दूर राहण्याकरिता टिप्स पाळल्यास, तुम्हाला याचा त्रास कमी होईल.

हिवाळ्यातील सांधेदुखीच्या समस्यांची कारणे

• हिवाळ्यात, आपल्या सांध्यांचे संरक्षण करणारे वंगण घट्ट होऊन यामुळे सांधे कडक होतात
• हिवाळ्यात सांध्याच्या नसा अधिक संवेदनशील होऊ शकतात, ज्यामुळे अस्वस्थता वाढू शकते
• लोक इतर ऋतूंपेक्षा हिवाळ्यात कमी सक्रिय असतात, जे सांध्यांनर दुष्परिणाम करतात
• हिवाळ्यात खांदे, पाय, हात आणि गुडघ्याच्या सांध्यामध्ये रक्ताभिसरण कमी झाल्याने स्नायुंमध्ये कडकपणा येतो

(वाचा – नैसर्गिकरित्या शरीर डिटॉक्स करण्यासाठी वापरा या सोप्या २ पद्धती, घरगुती उपाय)

सांधेदुखीवर कसे कराल उपचार?

• शारीरिक व्यायामाने हिवाळ्यातील वेदना वेदना कमी केल्या जाऊ शकतात
• एरोबिक्स, वेट ट्रेनिंग,पोहणे (अतिथंड पाण्यात पोहणे टाळा) आणि सायकलिंग करणे आदी स्नायुंमधील कडकपणा दूर करण्यास मदत करु शकतात तसेच रक्त प्रवाह सुधारू शकतात आणि गुडघ्यांना आधार देऊ शकतात
• व्यायाम केल्याने हिवाळ्यातील संधिवात प्रभावीपणे व्यवस्थापित करता येते

आहार कसा असावा?

हाडांच्या आरोग्यासाठी आहार देखील खूप महत्वाची भूमिका बजावत असून प्रथिनयुक्त आहार, फायबर, रिफाईंड कार्बोहायड्रेट्स आणि लो सॅच्युरेटेड फॅट्स यांचा समावेश असलेला संतुलित आहार हिवाळ्यात शरीराला चांगले कार्य करण्यास मदत करू शकतो. दिवसभर पाणी प्यायल्याने हिवाळ्यातील सांधेदुखी आणि वेदना कमी होतात. हिरव्या भाज्या आणि पचायला हलका आहारा घेणे योग्य राहिल. काकडी आणि गाजरचा आहारात समावेश करावा. भरपूर प्रमाणात द्रवपदार्थांचे सेवन हे मूत्रावाटे शरीरातील कचरा काढून टाकण्यास मदत करते.

(वाचा – गुडघे प्रत्यारोपणाची शस्त्रक्रिया केव्हा करावी? डॉक्टरांचा महत्त्वाचा सल्ला)

व्हिटॅमिन डी चा करावा समावेश

व्हिटॅमिन डीच्या कमतरतेमुळे ऑस्टियोआर्थरायटिस आणखी वाढू शकतो. याकरिता व्हिटॅमिन डी सप्लिमेंट्स तसेच व्हिटॅमिन डी युक्त आहाराचे सेवन करावे. ओमेगा -3 फॅटी ऍसिडचा मुख्य स्त्रोत म्हणजे फिश ऑइल. रोजच्या आहारात दुधाचा वापर वाढवा, जे हाडांसाठी कॅल्शियम आणि प्रथिनांचा उत्तम स्रोत ठरते. सूर्यप्रकाशामुळे शरीरात व्हिटॅमिन डीचे शोषण होण्यास मदत होते.

(वाचा – Weight Loss: अतिरिक्त चरबी काढण्यासाठी आणि झटपट वजन कमी करण्यासाठी ग्रीन टीमध्ये मिक्स करा या गोष्टी)

औषधे

वेदना आणि हाडांची जळजळ होणे याकरिता ऍस्पिरिन आणि आयबुप्रोफेन यांसारख्या नॉन-स्टेरॉइडल अँटी-इंफ्लेमेटरी औषधांचा वापर करुन उपचार केले जाऊ शकतात. हाडांचे घर्षण कमी करून या स्थितीवर उपचार करण्यासाठी काही वेळेस इंजेक्शनही दिले जाऊ शकते.

डॉक्टरांच्या सल्ल्यानुसार तुम्ही संधिवातापासून दूर राहण्यासाठी या टिप्सचा वापर करू शकता. यानंतरही तुम्हाला त्रास होत असेल तर तुम्ही तुमच्या डॉक्टरांकडे जाऊन वेळीच अधिक उपचाराची गरज आहे की नाही हे जाणून त्यानुसार उपचार करावेत.

(फोटो क्रेडिटः Freepik.com)

अशाच अधिक लाइफस्टाइल, हेल्थ, फॅशन, ब्युटी, होम डेकोर, रिलेशनशिप, हॅक्स यावरील अधिक माहितीसाठी क्लिक करा maharashtratimes.com