IGNOU TEE Paper Leak: प्रश्नपत्रिका मिळण्याआधीच ‘ती’च्याकडे उत्तरे असायची तयार!

इंदिरा गांधी राष्ट्रीय मुक्त विश्वविदयालय (IGNOU) यांची बॅचलर ऑफ सोशल वर्क (TEE December 20-21)ची परीक्षा वेगवेगळ्या परीक्षा केंद्रांवर चार मार्चपासून सुरू आहे. घाटकोपरच्या के. जे. सोमय्या कॉलेजमध्येही परीक्षा केंद्र असून १ एप्रिल रोजी ‘इंट्रोडक्शन टू सोशल वर्क’ या विषयाचा पेपर होता. पेपर सुरू असताना दुपारी अडीचच्या सुमारास पर्यवेक्षकांना वर्गातील एका विद्यर्थिनीकडे दोन उत्तरपत्रिका असल्याचे दिसून आले. दुसऱ्या उत्तरपत्रिकेची मागणी न करता तिच्याकडे ती आली कुठून? असा प्रश्न पडल्याने पर्यवेक्षकांनी तिला याबाबत हटकले. ती उडवाउडवीची उत्तरे देऊ लागली. पर्यवेक्षकांनी ही बाब कॉलेजच्या प्राचार्यांच्या निदर्शनास आणून दिली. शिक्षकांनी या विद्यार्थिनीकडील दोन्ही उत्तरपत्रिका ताब्यात घेतल्या. एक कोरी, तर दुसरीवर पूर्ण पेपर सोडवलेला होता. पेपरमध्ये आलेल्या सर्व प्रश्नांची उत्तरे यात लिहिण्यात आली होती. पेपर सुरू होऊन अवघी २० मिनिटे झाली असताना इतक्या कमी वेळात पूर्ण पेपर कसा सोडवला गेला, असा प्रश्न पर्यवेक्षकांना पडला.

प्राचार्यांसह सर्वानी याबाबत विद्यार्थिनीला हटकले असता सुरुवातीला तिने उडवाउडवीची उत्तरे दिली. मात्र नंतर, २४ मार्च रोजी झालेल्या पेपरदरम्यान एक उत्तरपत्रिका तिने अधिक घेतली होती. ती कोरी उत्तरपत्रिका घरी नेऊन त्यावर उत्तरे लिहून आणल्याचे तिने सांगितले. येणाऱ्या पेपरमधील प्रश्न तुला कसे समजले? असे विचारले असता तिने काहीच उत्तर दिले नाही. अखेर कॉलेज प्रशासनाच्या वतीने याबाबत टिळकनगर पोलिस ठाण्यात तक्रार करण्यात अली असून पोलिस अधिक तपास करीत आहेत.

HSC Result 2022: बारावी परीक्षेचे उत्तरपत्रिका संकलन ठप्प! एसटी संपाचा फटका

लांबणीवर पडलेली यंदाची शिष्यवृत्ती परीक्षा जूनमध्ये?