MajhiNews Marathi News, Latest Marathi News, Marathi News Paper, Maharashtra Breaking News | मराठी ताज्या बातम्या
राज्यभर गाजलेल्या शिक्षक पात्रता परीक्षेच्या (टीईटी) गैरव्यवहारातील साडेसात हजारांहून अधिक शिक्षक अडकले आहेत. त्यापैकी पुणे जिल्ह्यातीसल १६१ शिक्षकांच्या कागदपत्रांची तपासणी जिल्हा परिषद प्रशासनाने सोमवारपासून सुरू केली आहे. त्यामुळे ‘पवित्र पोर्टल’द्वारे नियुक्ती झालेल्या शिक्षकांऐवजी ‘टीईटी’द्वारे नियुक्त झालेल्या शिक्षकांच्या नोकरीवर गदा येण्याची दाट शक्यता व्यक्त होत आहे. त्याबाबत जिल्हा परिषदेचे मुख्य कार्यकारी अधिकारी आयुष प्रसाद यांनी संकेत दिले आहेत.
प्राथमिक शिक्षकांना शिक्षक पदाच्या नोकरीसाठी ‘टीईटी’ परीक्षा देणे राज्य सरकारने सक्तीचे केले होते. त्या सक्तीनंतर राज्यातील प्राथमिक शाळांमध्ये नोकरीसाठी ही परीक्षा देणे बंधनकारक झाले. त्यात या परीक्षांचा निकाल कमी प्रमाणात लागत होता. त्यामुळे परीक्षा देऊनही त्यात उत्तीर्ण होण्याची खात्रीच देता येत नव्हती. त्यामुळे टीईटी परीक्षा देण्यासाठी पैसे देऊन ही परीक्षा उत्तीर्ण करण्याची कामगिरी या उमेदवारांनी केली होती. हा घोटाळा २०२१ मध्ये उघडकीस आल्यानंतर राज्य परीक्षा परिषदेने सुमारे सात हजार ८०० जणांची यादी प्रसिद्ध करून त्यांना अपात्र म्हणून ठरविले होते.
आधारकार्डमधील चुका सुधारण्याचे काम शिक्षकांवर, विद्यार्थ्यांना शिकवणार कधी?
त्यानंतर दर वेळी एकेक माहिती समोर येऊ लागली होती. त्यातच आता राज्य परीक्षा परिषदेने पुणे जिल्हा परिषदेला १६१ जणांची यादी दिली आहे. जिल्हा परिषदेच्या शिक्षण विभागामार्फत टीईटी गैरव्यवहाराशी संबंधित आणि तीन वर्षांचा नियमित शिक्षण सेवकांचा कालावधी संपलेल्या १६१ शिक्षकांच्या कागदपत्रांची तपासणीची प्रक्रिया सुरू केली आहे. त्या दरम्यान सोमवारी ६० शिक्षकांनी त्यांची कागदपत्रे जिल्हा परिषदेच्या शिक्षण विभागाला सादर केली आहे.
शिक्षण विभागाच्या ‘पवित्र पोर्टल’द्वारे रूजू झालेल्या प्राथमिक शिक्षकांना त्यांचा कार्यकाल पुढे कायम ठेवण्यास काहीच अडचण नाही; परंतु टीईटी परीक्षा उत्तीर्ण होऊन त्या प्रमाणपत्राच्या आधार घेऊन नोकरी मिळविलेल्या शिक्षकांच्या कागदपत्राची पडताळणी केली जाणार आहे. त्यादृष्टीने तीन दिवस ही प्रक्रिया सुरू राहणार आहे. शेवटच्या दिवशीच किती शिक्षक अपात्र ठरतील हे स्पष्ट होईल.
– आयुष प्रसाद, मुख्य कार्यकारी अधिकारी
